1 Korẽntɩ 14 - Farefare NinkaréTɩ wʋn ẽŋɛ se'em tɩ Nawẽnnɛ Sɩa bɔ'a la sõŋɛ nẽrba 1 Ɛ-ya nõŋlʋm, la ya ken ɛɛra Nawẽnnɛ Sɩa bɔ'a la, lan gãnnɩ, bɔ'a sɛka tɩ ya wʋn to'oge Nawẽnnɛ yetɔga tɔgɛ bɔ nẽrba. 2 Sɛka n tɔgrɩ yetɔg-zãŋsɩ ka tɔgrɩ bɔ'ɔra nẽrba, a tɔgrɩ bɔ'ɔra la Nawẽnnɛ. Se'ere n soe la, nẽra ka wõnnɩ a yetɔga la võorɛ, Nawẽnnɛ Sɩa botɩ a tɔgra la yɛla n sʋgɛ. 3 La sɛka n to'osrɩ Nawẽnnɛ yetɔga tɔgra bɔ'ɔra nẽrba, ẽŋa tɔgrɩ sõŋra la nẽrba, botɩ ba sẽnna nẽŋa Nawẽnnɛ sore doosgo la pʋam, dee kã'ana ba, bɔ'ɔra ba bʋraanɛ. 4 Sɛka n tɔgrɩ yetɔg-zãŋsɩ sõŋrɩ la a mẽŋa. La sɛka n to'osrɩ Nawẽnnɛ yetɔga tɔgra bɔ'ɔra nẽrba sõŋrɩ la Nawẽnnɛ nẽrba. 5 Mam boorɩ nɩ tɩ ya wuu tɔgra la yetɔg-zãŋsɩ, la mam boorɩ tɩ ya tɔ'ɔsra la Nawẽnnɛ yetɔga tɔgra bɔ'ɔra nẽrba gãnna. Nẽra sãn tɔgɛ yetɔg-zãŋsɩ tɩ nẽra ka bɔna wʋn to'oge yetɔga la tɔgɛ a võorɛ pa'alɛ nẽrba la tɩ la sõŋɛ ba, sɛka n to'osrɩ Nawẽnnɛ yetɔga tɔgra bɔ'ɔra nẽrba la n gãnnɩ. 6 M sɔbiisi, mam sãn wa'am ya zẽ'am wa tɔgra yetɔg-zãŋsɩ, mam wʋn ẽŋɛ la wãne sõŋɛ ya? A ka tarɩ võorɛ bɔ ya. Sɛla n wʋn sõŋɛ ya, de la mam sãn pa'alɛ ya sɛla tɩ Nawẽnnɛ Sɩa puke pa'alɛ mam, bɩɩ m botɩ ya bãŋɛ sɛla, bɩɩ m to'oge Nawẽnnɛ yetɔga tɔgɛ bɔ ya, bɩɩ m zãsʋm ya. 7 La ãn wʋ de'eŋo lɔgrɔ la: Wɩa sãn pɛɛbra bʋra bʋra, bɩɩ kõlŋɔ sãn wẽ'era bʋra bʋra, fʋ wʋn ẽŋɛ la wãne bãŋɛ wɩa la peebgo võorɛ, bɩɩ kõlŋɔ la wẽ'a võorɛ? 8 Benkonne sãn peebe bʋra bʋra, ka peebe zɛbrɛ peebgo, ãne n wʋn mãasʋm yese zɛbrɛ? 9 Bɛla mẽ, ya sãn tɔgra yetɔg-zãŋka tɩ nẽra ka wõnnɩ a võorɛ, nẽra wʋn ẽŋɛ la wãne bãŋɛ yãma n boorɩ tɩ ya yele se'em? Ya yetɔga la de la zãŋa. 10 Yetɔga buuri zozo'e n boe dũnia zuo, la ayɩla ka boe ka tara võorɛ. 11 La mam sãn ka wõnna yetɔga, mam na sɛka n tɔgrɩ la de la sãama la taaba. 12 Bɛla, yãma n mõrgɛ ɛɛra Nawẽnnɛ Sɩa bɔ'a la, ɛɛra-ya bɔ'a sɛba n wʋn sõŋɛ Nawẽnnɛ nẽrba tɩ ba sẽŋɛ nẽŋa Nawẽnnɛ doosgo pʋam. 13 Bɛla ĩyã, sɛka n tɔgrɩ yetɔg-zãŋka, a sose Nawẽnnɛ tɩ a botɩ a yãŋɛ tɔgɛ a võorɛ. 14 Mam sãn pʋ'ʋsra Nawẽnnɛ la yetɔg-zãŋka, mam sɩa n pʋ'ʋsrɩ, la mam ka wõnnɩ a võorɛ la m mẽŋa yɛm. 15 Bɛla, mam wʋn ẽŋɛ la wãne? Mam wʋn pʋ'ʋsra la m sɩa, dee ken pʋ'ʋsra la m yɛm, la m yõona la m sɩa, dee ken yõona la m yɛm. 16 Fʋ sãn pʋ'ʋsra Nawẽnnɛ a yel-sõnnɛ la yetɔg-zãŋka, nẽra wʋn ẽŋɛ la wãne ze'ele nẽrba la n lagsɛ la pʋam yetɩ: «Amina», dee ka wõm fõn yele se'em na võorɛ? 17 Baa fõn pʋ'ʋsrɩ Nawẽnnɛ se'em na sãn ãna sõŋa, la ka tarɩ sõŋrɛ bɔ nẽr-ẽŋa. 18 Mam pʋ'ʋsrɩ Nawẽnnɛ a yel-sõnnɛ, mam n tɔgrɩ yetɔg-zãŋsɩ gãnna yãma wuu la. 19 La Nawẽnnɛ nẽrba lagsgɔ zẽ'am, mam boorɩ tɩ m tɔgɛ la yetɔga banuu la m yɛm tɩ nẽrba wõm ba võorɛ tɩ la zãsʋm ba, sõna mam wʋn tɔgɛ yetɔg-zãŋsɩ tʋspia. 20 M sɔbiisi, da ãna-ya wʋ kɔma n tẽ'esrɩ se'em na. La, la sãn dɛna be'em ɩrgɔ yelle, ãna-ya wʋ kɔm-pɩgsɩ n ka ɩtɩ be'em na. La ya tẽ'esgɔ pʋam, ãna-ya wʋ bõnkɛgsɩ la. 21 La gʋlsɛ Nawẽnnɛ gõŋɔ pʋam tɩ Zuudãana Nawẽnnɛ yetɩ: «Mam wʋn basɛ tɩ sãama n tɔgrɩ yetɔg-zãŋsɩ mõolɛ m kõ-yẽlga bɔ m nẽrba. Baa la wãna wuu, ba kãn selse mam.» 22 Bɛla ĩyã, yetɔg-zãŋsɩ de la sɛla n pa'alɩ sɛba n ka bɔ sɩra Nawẽnnɛ pãŋa, la dagɩ sɛba n bɔ sɩra la ĩyã. La nẽra n to'oge Nawẽnnɛ yetɔga tɔgɛ bɔ nẽrba la, n de sɛla n pa'alɩ sɛba n bɔ sɩra Nawẽnnɛ pãŋa, la dagɩ sɛba n ka bɔ sɩra la ĩyã. 23 Sɛba n bɔ sɩra la sãn lagsɛ taaba zẽ'a ayɩla, tɩ nẽra woo tɔgra la yetɔg-zãŋsɩ, tɩ sɛba n ka mi, dee ka bɔ Nawẽnnɛ sɩra kẽ, ba kãn yetɩ ya zallɩ mɛ? 24 La sɛba n bɔ sɩra la sãn lagsɛ taaba, tɩ nẽra woo tɔ'ɔsra Nawẽnnɛ yetɔga tɔgra bɔ'ɔra nẽrba, tɩ nẽra n ka mi, dee ka bɔ Nawẽnnɛ sɩra kẽ, ẽn wõm sɛla woo la, wʋn basɛ tɩ a bãŋɛ a tõon-be'ero, dee pa'alɛ ẽ a tuure. 25 Yel-sɛba n sʋgɛ a sũure pʋam wʋn puke mɛ peelem pʋam, tɩ a wʋn ka dũma dɩkɛ a nẽŋa võglɛ tẽŋa nã'asɛ Nawẽnnɛ, dee yetɩ: «Nawẽnnɛ sɩrɩ boe la ya lɛ.» Ɩta-ya sɛla woo tɩ ba dɔla sore 26 Bɛla, m sɔbiisi, tɩ wʋn ẽŋɛ la wãne? Ya sãn lagsɛ taaba tɩ ya pʋ'ʋsɛ Nawẽnnɛ, ya nẽra ayɩla tã wʋn pʋrɛ yõonɛ, tɩ ayẽma zãsʋm, tɩ ayẽma pa'alɛ bõn-sɛka tɩ Nawẽnnɛ puke pa'alɛ ẽ, tɩ ayẽma tɔgɛ yetɔg-zãŋka, tɩ ayẽma tɔgɛ yetɔg-zãŋka la võorɛ pa'alɛ nẽrba. Ɩta-ya bɛla wuu tɩ la sõŋɛ Nawẽnnɛ nẽrba tɩ ba sẽŋɛ nẽŋa Nawẽnnɛ doosgo pʋam. 27 La sãn dɛna yetɔg-zãŋsɩ tɩ ya yetɩ ya tɔgɛ, nẽrba bayi bɩɩ nẽrba batã mã'a tɔgɛ ayɩla ayɩla, tɩ nẽra ayɩla tɔgɛ ba võorɛ pa'alɛ. 28 La nẽra sãn ka bɔna wʋn tã'agɛ tɔgɛ yetɔg-zãŋsɩ la võorɛ pa'alɛ, sɛba n yetɩ ba tɔgɛ yetɔg-zãŋsɩ la sĩna da tɔgɛ. Ba tɔgɛ ba sũure pʋam bɔ ba mẽŋa, la Nawẽnnɛ. 29 Sɛba n de Nawẽnnɛ nõtɔ'ɔsrɩba la, bayi bɩɩ batã tɔgɛ. Tɩ sɛba n weege la bɩsɛ ba yetɔga la sãn masɛ bɩɩ ka masɛ. 30 La nẽra ayɩla sãn tɔgra, tɩ Nawẽnnɛ Sɩa puke sɛla pa'alɛ nẽrba lagsgɔ la zẽ'am, nẽr-sɛka n dẽŋɛ tɔgra la go'oge. 31 Ya wuu tã wʋn to'oge Nawẽnnɛ yetɔga tɔgɛ bɔ nẽrba mɛ, la ya tɔgra ayɩla ayɩla, tɩ la wʋn zãsʋm nẽrba wuu, dee bɔ ba bʋraanɛ. 32 Nẽr-sɛba n tarɩ Nawẽnnɛ Sɩa tɔ'ɔsra yetɔga bɔ'ɔra nẽrba la tã wʋn yõkɛ ba mẽŋa mɛ. 33 Se'ere n soe la, Nawẽnnɛ boorɩ tɩ sɛla woo dɔla la sore la sũ-mã'asʋm, a ka boorɩ tɩ tɩ tõnna yooro yooro. 34 Pɔgsɩ sĩna Nawẽnnɛ nẽrba lagsgɔ zẽ'am, wʋ ba ɩtɩ se'em zẽ'esɩ wuu la. Sore ka boe tɩ ba darɛ tɔgra Nawẽnnɛ nẽrba lagsgɔ zẽ'am. La ba sakra nõorɛ wʋ Zifdõma lɔɔ n yele se'em na. 35 Sɛla sãn bɔna tɩ ba bɔɔra tɩ ba bãŋɛ, ba soke ba sɩrba ba yiɛ. La ka narɩ tɩ pɔgsɩ tɔgra Nawẽnnɛ nẽrba lagsgɔ zẽ'am. 36 Yãma tẽ'esɛ tɩ la de la yãma zẽ'am tɩ Nawẽnnɛ kõ-yẽlga la pɔsɛ bɩɩ? Bɩɩ yãma mã'a n to'oge yetɔga la? 37 Sɛka n tẽ'esɛ tɩ ẽŋa de la Nawẽnnɛ nõtɔ'ɔsa, bɩɩ ẽŋa de la sɛka tɩ Nawẽnnɛ Sɩa boe la ẽ lɛ, a sakɛ tɩ sɛla tɩ mam gʋlsɛ bɔ'ɔra ya wã de la Zuudãana la nõorɛ tɩ a bɔ. 38 La nẽra sãn ka selse yel-ẽna, yãma mẽ da selse ẽ. 39 Bɛla, m sɔbiisi, mõrgɛ-ya tɔ'ɔsra Nawẽnnɛ yetɔga tɔgra bɔ'ɔra nẽrba, dee da gu-ya nẽrba tɩ ba da tɔgɛ yetɔg-zãŋsɩ. 40 La ɩta-ya sɛla woo tɩ la ãna sõŋa, dee dɔla sore. |
© 2008, 2010, Wycliffe Bible Translators, Inc. All rights reserved.
Wycliffe Bible Translators, Inc.