Tà ke Maje ke Luc ndang 4 - Nouveau Testament en Gulay 2004

Sú nan kêm Jésu kêm dile’t

¹ Ndil-Kêmnda taa kêm Jésu pel-pel loo ke in-in’n tà ba ke dé ɓar’n Jourdain ree’n. Ndil-Kêmnda ɔr non’n aw se’n kêm dile’t.

² Sú ree nan kêm Jésu ase ndɔ kɔr-sɔ loo ke è ndii’n kêm dile’t nú nga. Loo ke ndɔ kɔr-sɔ nè nga dese ɓá ɓaa, ɓo ra Jésu tede nyankuse ke ndêin bè géa ɔde tà’n lêm lé.

³ Ke loon’t nè kuwe sú ree ra Jésu’t ede’n ede nè: – Ke nè á i Ngonn le Nube kerɔte ɓaa, unn ndui ade kuberi mbal nè nga tel nyankuse ade use.

⁴ Jésu tel ilé dè’t ede nè: – Gute-ndu Nube ke dé ndang kêm magtub’t kété nga tam ede nè: «Nyankuse kuwe go karé á doo à ndii’n kumgajer lé.»

⁵ Taɓai njè sú dooge ree ɔr’n aw se’n dɔ mbeng ɓaa, ke loon’t nè kuwe, è tɔje’n ɓeekonge malang ke dè nang nè ede nè:

⁶ – Tɔgmong se nyankingege malang le ɓeekonge nè nga ei kêm jim’t. M’ase kade nanan géa titeke kêm’m ndige.

⁷ Ke nè á i ɗɔi’m ɓaa, m’a m’adi nyange nè malang ke nyan kingei i kuwe.

⁸ Jésu tel ile sú de’t ede nè: – Magtub ke tò se ninn’n tam ndàt ede nè: «Kuwe-ɓee Nube lei nga, i a ɗɔi’n è a , è kuwe karé bere á i a ra kule kade’n a tɔ.»

⁹ Go’t gugu njè sú dooge ɔr non Jésu aw se’n kêm ɓee-bò ke Jérusalem. Taɓai unn’n unde’n sêm kei’t le Nube ɓaa, è ede’n ede nè: – Ke nè á i Ngonn le Nube kerɔte ɓaa, inye jii dɔ oso nang ade j’an.

¹⁰ Tede magtub ke tò se ninn’n tam ede nè: «Nube à unn ndu’n kade dooge le’n ke danrán an-in dèi sêw-sêw.»

¹¹ Taɓai: «Nube à kade dé lái dɔ d’uwei nal kade oso njanm unde njai dè her’t.»

¹² Jésu tel ile sú dè’t ede nè: – Magtub le Nube tam ede nè: «Kuwe-ɓee Nube lei nga, i a nan’n ndan lé.»

¹³ Loo ke sú nan kêm Jésu se nyange gai-gai gir gang ɓá ɓaa, inye’n ɓanm ngine’n ndɔ ke rang.

Jésu unn gir kule le’n kêm ɓeekon ke Galilée

¹⁴ Loo ke Jésu à tel kêm ɓeekon ke Galilée ɓaa, tɔgmong le Ndil-Kêmnda taa ra’n pel-pel. Kɔbe tà le Jésu nga unn gir koso se loo mbit-mbit kêm ɓeekon ke Galilée bere mbak.

¹⁵ Tà ke Jésu ndó dooge kêm kei kebe nange’t nga, nel de ngain ade dé malang d’ule ndubra dènn’t.

Dooge ke Nazareth utei Jésu mbeng

¹⁶ Jésu in loon’t nè aw ɓee ke Nazareth. Nazareth nga, è ɓee ke ndɔ ke d’oto’n tutu d’ade tɔge. E aw se de kêm kei kebe nan’t se go ra ke è ra’n kété-kété se ndɔ taa kebe. E ɔse nang in dɔ le tute magtub le Nube kade de.

¹⁷ Dé ree se magtub ke Esaie, njèribe-dè-tà ke tà Nube’t ndang d’ade’n. Loo ke Jésu teen kêm magtub inge tà nè nga ɓaa, è tute se ndu’n ke bòi ede nè:

¹⁸ – «Ndil Kuwe-ɓee nain se’m. Kuwe-ɓee ɔr’m le kade m’ile mber Tà ke Maje m’ade njéndooge. E ule’m le kade m’ile mber m’ade njé ke tooi dangai’t titeke d’a d’inye de dɔ a, le kade m’ede njékumtɔge titeke d’a tel kan loo gugu a, è ule’m le kade m’ede njé ke dé ra de ndoo titeke Nube à taa de kinye de dɔ ɓai a,

¹⁹ è ule’m le kade m’ile mber ɔje dè ɓal ke Kuwe-ɓee à uwe’n de ke rann’t a tɔ.»

²⁰ Loo ke Jésu tute magtub nè nga gir gang ɓá ɓaa, unde nan’t tel’n ade njè ngonm tà kei kebe nan ɓaa, è tel ndi nang ndó de nyan. Dooge malang ke kêm kei kebe nan’t nè nga d’an’n sikm.

²¹ Taɓai Jésu unn gir kede de ede nè: – Nyange ke Magtub tam tà’n ade ooi se mbi si nga ɓila aw loon’t deĵ ɓá ta.

²² Dooge malang d’ɔr go tà le Jésu maje. Tà ige de sêl dè tà kêmnoje le Nube ke tee tann’t ade d’oo. Dé tam tà d’ede nè: – Ké n’ee nga, n’ee ngonn le Joseph karè lé wa?

²³ Jésu ede de ede nè: – Kerɔte kuwe, sei a kundei se’m kuju-tam kedi nè: «Njèkuge-kaje i kuwe aje rai ɓita.» Taɓai sei a tami se’m kedi nè: «J’oo tà nyange malang ke i ra kêm ɓee-bò ke Capernaum. I ra nyange nè nga kêm ɓee koji’t ade j’an tɔ.»

²⁴ Go’t gugu, Jésu ede de ede nè: – Kerɔte kuwe, man m’ede sei ndàt, njèribe-dè-tà ke tà Nube’t karé bè ke d’oo tà tànn’t ɓee kojenn’t nga goto.

²⁵ Kerɔte kuwe, man m’ede sei ndàt, kété kêm ndɔn’t le Elie nga, ɓo-bò oso se loo malang kêm ɓeekon ke Israel tede ndi ede lé ase ɓal mute se nan mute-mute. Kêm ndɔ’n nè nga, njékei-kingege bule ndii kêm ɓeekon ke Israel.

²⁶ Nè né è bè géa, Nube ule Elie le kade ra se è ke karé bè dann de’t lé, nè è ule’n le kade ra se njèkei-kinge karé ke kêm ɓee ke Sarepta ɓeekon ke Sidon nú.

²⁷ Kété kêm ndɔn’t le Elie, njèribe-dè-tà ke tà Nube’t nga géa, njébanjege bulei ndii kêm ɓeekon ke Israel tɔ. Nè né è bè géa, doo karé bè dann de’t ke banje ɔr rann’t goto. Nè Naaman, doo ke ɓeekon ke Syrie nú nga kuwe karé á ndɔ ke banje ɔr rann’t ndát-ndát.

²⁸ Loo ke dooge malang ke ndii kêm kei kebe nan’t ooi tàge nè bè ɓaa, wong ra de ade kêm de aw biriri-biriri.

²⁹ Dooge ke ndii kêm kei kebe nan’t nè nga rai keige le de kàde mbal’t. Loo ke ooi tàge nè bè ɓaa, ɔsi nang in-in uwei Jésu ndɔrii ngander-ngander awi se’n gide ɓee’t nata sêm mbal’t. D’aw se’n titeke bè, tede le kaw sure’n kile’n nang barak.

³⁰ Nè è tee dann de’t njɔl aw.

Jésu ade ndil ke majelé unde loo tee kêm dingem karé’t

³¹ Jésu in loon’t nè aw kêm ɓee-bò ke Capernaum, ɓeekon ke Galilée. E ndó dooge nyan kêm kei kebe nan’t se ndɔ taa kebe karé bè.

³² Ndil de tee an-in soin-soin dè gos nyange ke è ndó de’t, tede è ndó de nyange nè nga se tɔgmong.

³³ Dingem karé ke ndil ke majelé tò kêmn’t ndi kêm kei kebe nan’t nè nga tɔ. E tam tà se ndu’n ke bòi beng ede nè:

³⁴ – Hai, Jésu ke Nazareth! Ké usi ri ra jé’t wa? Ké i ree le tuju jè kɔke ta wa? Man m’geri mbak: i i njèkawkule le Nube ke è kuwe ɔri undei se ninn’n gai.

³⁵ Jésu in se ndil ke majelé nè ndáng’n ede nè: – Ebe rai tam tà, unde loo i tee kɔke kêm dingem’t nè. Ndil ke majelé unn dingem nè nga ile’n nang njanm dann dooge’t ɓaa, unde loo tee nyɔrong aw nal ra se’n nyan karé ke majelé.

³⁶ Dooge malang ke ndii tutu nga, tà ige de sêl ade ei deje nan tà edi nè: – Ké è tà ri á bè wa? Doo nè nga on ndilge ke majelé njanm-njanm ede nè: «Undei loo i teei» ɓaa, ke loon’t nè kuwe, undei loo teei an-in nan.

³⁷ Nyan ke Jésu ra nga, kɔbe’n oso se loo mbit-mbit kêm ɓeekon ke Galilée.

Jésu aje njératurge bule

³⁸ Jésu unde loo kêm kei kebe nan’t tee aw kei le Simon. Wum Simon ke dinye oso se ratur ade ra’n taa por làm-làm. Dé deje Jésu le kade ra se’n.

³⁹ Jésu age ngɔr ke ra njèratur’t nè nga, ɗuge nang dènn’t, taɓai è ndáng ratur le kade unde loo tee ɓaa, ratur nè nga unde loo tee kuwe tɔ. Tajinan’t nè kuwe, wum Simon ke dinye nga ɔse nang in dɔ ɓaa, è unn gir kade de nyankuse d’use.

⁴⁰ Loo ke gir ndɔ taa kebe gang ade kàde ur ɓá ɓaa, dooge malang otoi njératurge ke raturge gai-gai ra de reei se de som-som ra Jésu’t. E ile’n ji’n dè de’t karé-karé malang, ɔr’n ratur ra de’t.

⁴¹ Ndilge ke majelé géa undei loo teei kêm dooge’t bule se non tà de’t beng-beng edi nè: – I i Ngonn le Nube. Jésu on de njanm-njanm ɔge de tam tà, tede dé ger’n mbak titeke è Krist.

Jésu in ɓeekon ke Capernaum aw rang

⁴² Loo ke loo ar yerer ɓaa, Jésu unde loo tee kêm ɓee’t aw ngang loo’t nata. Dooge ngain unni gir sang’n par-par. Loo ke ingeii deĵ ɓá ɓaa, ei ndigi kɔgii nang edi nè: – Inye jè aw rang lé ta.

⁴³ Nè Jésu ede de ede nè: – Gar-gar, m’a m’ile mber Konɓee le Nube nga kade dooge ke kêm ɓeege ke rang tɔ. E tede è ke nè á Nube ule’m.

⁴⁴ E ile mber Tà ke Maje nè nga, kêm kei kebe nange’t ke ɓeekon ke Judée.