Tà ke Maje ke Luc ndang 3 - Nouveau Testament en Gulay 2004

Mber kile le Jean ke njèkule dooge manné njonm

¹ Ngar ke bò, Tibère César on ɓee ɓal dɔg-gidé-mi. Ngar Ponce Pilate on ɓee dè nang’t le Juda. Ngar Hérode Antipas on ɓee dè nang ke Galilée. Kêm ɓalnge’t nè nga, ngar Philippe ngokon Hérode Antipas ke tɔg on ɓee dè nang ke Iturée se Trakonite. Ngar Lysanias è njèkonɓee ke dè nang ke Abilène a tɔ.

² Hanne se Caiphe ei maw njékuje nyan-mesege a tɔ. E kêm ɓaln’t nè á tà le Nube oso’n mbi Jean ngonn le Zacharie kêm dile’t.

³ Gir’n ke nè á, Jean unn’n gir kaw se loo-loo kêm ɓeege ke an-in dè ba ke Jourdain ile’n mber ade dooge ede nè: – I turi hal si, adi d’ule sei manné njonm ɓaa, kêm Nube à tin mbit dè kaiyage’t le si.

⁴ Titeke bè á, tà ke Esaie, njèribe-dè-tà ke tà Nube’t ndang kêm magtub’t kété mari nga aw loon’t deĵ. E tam kété ede nè: «Doo karé tam tà kêm dile’t se ndu’n ke bòi bèng ede nè: I gɔli rebe ree le Kuwe-ɓee adi nda danné jap, i rai rebe ree le Kuwe-ɓee adi asenan lêtêt a tɔ.

⁵ Gute loo malang ke oso nang nga, umi nang tutu adi ndal dɔ ɗaks. I tugei dè mbal se dè herge malang ke in-in dɔ, i ribei de adi d’asenan lêtêt. Rebege ke bòi ke ɗugi kongel-kongel nga i rai de adi tooi danné. Kum ngann rebege ke tɔri ɓɔrɔk-ɓɔrɔk nga, uti adi asenan lêtêt-lêtêt a tɔ.

⁶ Titeke bè á, dooge malang à an-in titeke Nube è njèkaje jéi.

⁷ Kosdoo-bulege reei ra Jean’t le kade ule de manné njonm. E deje de ede nè: – Sei njé ra gos tite jênênnge bè nga, ké nan á tɔje sei rebe kain wong le Nube ke ndi à ree nga wa?

⁸ Ke nè á i ndigi kan-in wong le Nube ke ndi à ree nga ɓaa, i rai nyanra ke maje ke tɔje titeke i turi hal si. Ebi’t tam kêm si’t kedi nè: «Jè jè ngannkà Abrahamge.» Man m’ede sei ndàt titeke ngann herge ke tooi nè nga, Nube asekum tel de ke ngannkà Abraham karè.

⁹ Ɗarinè kunge tò ɔje dè ngire nja kage karé-karé malang. Sei géa, i tooi asinan se kagege bè tɔ. Kage ke rara ke ann majelé ɓaa, d’a tuge’n gang’n kile’n poro.

¹⁰ Kosdoo-bulege deji Jean tà ke kété-kété edi nè: – Ké ri á Nube ndige kade jè ra ɗarinè ta wa?

¹¹ E tel ile de dè’t ede nè: – Ke nè á doo karé dann si’t aw se kubu joo ɓaa, maje kade unn karé ade doo ke le’n goto. Doo ke inge nyankuse géa, maje kade ra titeke bè tɔ.

¹² Njétaa tirge géa reei le kade Jean ule de manné njonm tɔ. Dé deje’n d’ede nè: – Njèndó dooge nyan, ké ri á Nube ndige kade jè ra tɔ wa?

¹³ Jean tel ile de dè’t ede nè: – Nyan ke kuwe sige ɔji kade i taai nga, ilei made dè’t lé.

¹⁴ Njérɔge ke le de tɔ dejii edi nè: – A jè ɓaa, ké ri á tò ɔje dè jé tɔ wa? Jean tel ile de dè’t ede nè: – Ulei ɓel kêm doo’t éké i banmi doo i taai nyan le’n lé a, i têti tà undei tà doo’t i taai nyan le’n lé a tɔ. Nè umi kêm si dè nar kuge dè ji si’t kuwe.

¹⁵ Kosdooge malang ke reei ra Jean’t nga, kêm de tò kekek. Nanan géa dann de’t deje ra’n tà dè ɓengrenn’t ede nè: – Ké doo nè nga è Krist nga lé ɓai wa?

¹⁶ Nè Jean ede de ndàt ede nè: – Man m’ɔr sei kunde sei se ninn si gai se mann. Nè doo karé ke tɔgmong le’n dum dè le’m à ree goom’t non. Man m’ase tutu sa ke njann’t lé. Doo nè nga, à ɔr sei kunde sei se ninn’n gai se Ndil-Kêmnda a, se por a tɔ.

¹⁷ Doo nè nga aw se nyan gɔl nyinge dè ko le’n jinn’t. E à gɔl dè njar ko le’n yák-yák kɔse nja nan’t kum damé. Nè à ró tise’n rák-rák se por ke à wei ndan lé.

¹⁸ Jean ede dooge ke rang tàge bule ndeje’n de titeke bè a, ile’n mber Tà ke Maje ade’n de a tɔ.

¹⁹ Nè né è bè géa, Jean in se ngar Hérode dè tà ke ɔje dè Hérodiade, dinye le ngokon’n Philippe nja bule. E in se’n dè nyange ke majelé ke rang malang ke è ra nga a tɔ.

²⁰ Taɓai kuwe ke Hérode ade d’uwe Jean d’ile’n dangai’t nga, è majelé ke è ra ile dè made’t.

Jean ule Jésu manné njonm a, Nube ɓar’n Ngonn’n a tɔ

²¹ Loo ke Jean ule kosdooge malang manné njonm ɓá ɓaa, Jésu géa ree ade ule’n manné njonm tɔ. Loo ke Jésu nda ɔje tà se Nube bè-bè ɓai ɓaa, kum danran teen ngalal.

²² Ndil-Kêmnda ree uwe dènn’t ade d’an tò asenan se der-nda bè. Ndu Nube ɓar danrán nú ede nè: – I nga i ngonn’m ke m’tári ngain. Ra’m nel’m dè kɔr ke m’ɔri’t nga ngain a tɔ.

Girkà le Jésu

²³ Loo ke Jésu unn gir kule le’n nga, ɓal koje’n ase kɔr-mute. Dooge an-in nin ke ngonn le Joseph. Joseph nga è ngonn le Eli.

²⁴ Joseph nga è ngonnkà dɔg Matthat, ngonnkà Lévi, ngonnkà Melki, ngonnkà Jannai, ngonnkà Joseph,

²⁵ ngonnkà Matthatias, ngonnkà Amos, ngonnkà Nahum, ngonnkà Esli, ngonnkà Naggai,

²⁶ ngonnkà Maath, ngonnkà Matthatias, ngonnkà Séméin, ngonnkà Josech, ngonnkà Joda,

²⁷ ngonnkà Joanan, ngonnkà Rhésa, ngonnkà Zorobabel, ngonnkà Salathiel, ngonnkà Néri,

²⁸ ngonnkà Melki, ngonnkà Addi, ngonnkà Kosam, ngonnkà Elmadam, ngonnkà Er,

²⁹ ngonnkà Jésu, ngonnkà Eliézer, ngonnkà Jorim, ngonnkà Matthat, ngonnkà Lévi,

³⁰ Lévi ngonnkà Siméon, ngonnkà Juda, ngonnkà Joseph, ngonnkà Jonam,

³¹ ngonnkà Eliakim, ngonnkà Méléa, ngonnkà Menna, ngonnkà Matthata, ngonnkà Nathan, ngonnkà David,

³² ngonnkà Isai, ngonnkà Obed, ngonnkà Boaz, ngonnkà Salmon ngonnkà Naasson,

³³ ngonnkà Aminadab, ngonnkà Admin, ngonnkà Arni, ngonnkà Esrom, ngonnkà Pharès, ngonnkà Juda,

³⁴ ngonnkà Jacob, ngonnkà Isaac, ngonnkà Abraham, ngonnkà Thara, ngonnkà Nahor,

³⁵ ngonnkà Seruch, ngonnkà Ragau, ngonnkà Phalek, ngonnkà Eber, ngonnkà Sala,

³⁶ ngonnkà Kainam, ngonnkà Arpaksad, ngonnkà Sem, ngonnkà Noé ngonnkà Lémek

³⁷ ngonnkà Metushela, ngonnkà Hénok, ngonnkà Yared, ngonnkà Maléléel, ngonnkà Kainan,

³⁸ ngonnkà Enos, ngonnkà Seth, ngonnkà Adam, Adam è ngonn le Nube.