Tà ke Maje ke Luc ndang 23 - Nouveau Testament en Gulay 2004

D’aw se Jésu non ngar Pilate’t

¹ Go’t gugu ɓaa dé malang ke d’ɔse nja nan nam-nam nè nga, d’ɔse nang d’in se Jésu d’aw se’n non ngar Pilate’t.

² Ke loon’t nè kuwe d’unn gir tête tà kunde tànn’t d’ede nè: – Doo nè nga j’inge’n dè ndi ke è ndi tur kum kosdooge le jé. E ede de le kade d’ɔge tir ngar César. Taɓai è ede nè: nè kuwe karé bere n’ee Krist ngar ke Nube ule se’n ade jéi.

³ Pilate deje Jésu ede nè: – Ké i á i ngar le Juipge wa? Jésu tel ile’n dè’t ede nè: – E kuwe tò tài’t non.

⁴ Ngar Pilate ede maw njékuje nyan-mesege se dooge ke kebi nan ede nè: – Doo nè nga man m’an tà karé bè ke uwe dè’n lé.

⁵ Nè dé tel d’uwe tà de mong d’ede nè: – E sule kosdooge se go rebe nyan-ndóge le’n. E unn gir ndó dooge nyan kêm ɓeekon ke Judée bere mbak unde’n ɓeekon ke Galilée ndàt gang sár tee’n nè ɗarinè tɔ ta.

⁶ Loo ke Pilate oo tà ke dé tam dé ɓar’n ri Galilée ɓaa, è deje de ede nè: – Ké doo nè nga è doo ke ɓeekon ke Galilée wa?

⁷ Loo ke d’ede Pilate d’ade ger maje titeke Jésu è doo ke kêm ɓeekon le ngar Hérode Antipas ɓaa, è unn ndu’n ade d’aw se’n rann’t. Kêm ndɔn’t nè ngar Hérode kuwe géa ree ndi kêm ɓee-bò ke Jérusalem.

D’aw se Jésu non ngar Hérode Antipas’t

⁸ Loo ke Hérode Antipas an Jésu ɓaa, ra’n nel’n ngain. E ndige le kan Jésu mari-mari tede ndɔ ke oo tàge ke dé tam d’ɔje’n dè’n. E ɔje kêm’n tchên tede kade Jésu ra nyankɔbe karé ade an.

⁹ Hérode deje Jésu tà ase tà’t nè è ile’n dè tà karé’t lé.

¹⁰ Maw njékuje nyan-mesege se njékɔrgir gute-nduge ke ndai loon’t nga in-in se tà de jik-jik têti tà undei tà Jésu’t.

¹¹ Hérode se kos njérɔge le’n t’ulei mbe dè Jésu’t a, ilei rasɔl dènn’t a tɔ. Taɓai Hérode ade d’ule kubu ke ndolé kein-kein rann’t ɓaa tel ule se’n gugu ade’n Pilate.

¹² Hérode se Pilate nga kété ei njébange le nan. Nè kêm ndɔn’t nga ei teli ei made nange.

Pilate ule Jésu ji de’t kade dé tɔl’n

¹³ Pilate ɓar maw njékuje nyan-mesege se njékɔr non dooge a, se kosdooge a tɔ, ɔse nja de nan’t.

¹⁴ Go’t gugu è ede de ede nè: – Sei reei se doo nè ram’t, i tami edi nè è njètur kum kosdooge. M’deje’n tà non si’t malang nè m’an tà karé bè ke uwe dè’n ɔje dè nyange ke sei ilei tà dènn’t nga lé.

¹⁵ Hérode kuwe géa an tà karé ke uwe dè’n lé tɔ, gir’n ke nè á è tel ule’n se’n ra jéi’t gugu. An-in! doo nè nga ra nyan karé bè ke ase yo’n lé.

¹⁶ Bè ɓaa, m’a m’ade d’ɔje’n kumkunju se ndêin ɓita m’a m’ade d’inye’n dɔ ɓai. [

¹⁷ Se ɓal karé-karé Pilate ade d’ɔr dangai karé d’inye’n dɔ d’ade dooge loo ke raii nan ke ri’n nè Paque.]

¹⁸ Dé malang dé ra nyan wuu d’ede nè: – Nè n’ee ɓaa, ade kumé udu, Barabbas tá inye’n dɔ ade jè.

¹⁹ Barabbas nè nga d’uwe’n d’ile’n dangai’t tede è njè sule dooge ade tà oso’n kêm ɓee’t. Taɓai loo ke tà oso kêm ɓee’t nga, è tɔl doo a tɔ.

²⁰ Pilate tel deje de tà ɓai tede ndige kinye Jésu dɔ.

²¹ Nè dé tel dé ra nyan wuu d’ede nè: – I ɓeré kàde kage-ke-dese’t ke ɓer kuwe bè.

²² Pilate deje de ke njèkon’t mute ede nè: – Ké ri á è majelé ke doo nè ra wa? Man m’an nyan karé ke ase kade inge’n yo weii’n lé. M’a m’ade d’a d’ɔje’n kumkunju se ndêin ɓita m’a m’ade d’inye’n dɔ ɓai.

²³ Nè d’uwe tà de mong le kade dé ɓer’n kade kage-ke-dese’t ke ɓer kuwe. Dé ra nyan wuu dé tête’n Pilate mbɔrɔk d’ade inye loo ade de.

²⁴ Loo tɔl tà’n ɓaa, Pilate ɔje njáng le gangtà se go deje ke dé deje’n.

²⁵ Pilate inye Barabbas dɔ ade de titeke dé deje’n. Barabbas nga è doo ke ndɔ ke sule dooge ade tà oso’n kêm ɓee’t a, è tɔl doo a tɔ. Gir’n ke nè á d’uwe’n dangai’t. Nè è ule Jésu ji de’t le kade dé ra se’n nyan ke kêm de ndige.

D’aw se Jésu loo tɔln’t

²⁶ Loo ke d’a d’aw se Jésu gide ɓee’t nata le tɔl’n ɓaa, d’inge dingem karé ke in ndɔrɔ à ree ke ɓéee rebe deĵ. D’uwe’n mêtch d’unde tɔg dènn’t d’ade oto kage-ke-dese njiye’n go Jésu’t. Dingem nè nga ri’n nè Simon ɓee koje’n è Cyrène.

²⁷ Dooge ngain dann kosdooge ke Jérusalem ndolèi go Jésu. Dinyege bule dann de’t undei kàde de dai-dai se non jik-jik tede Jésu.

²⁸ Nè Jésu tel mer de, ede de ede nè: – Mande ɓeege ke Jérusalem, i noin tede le’m man lé. Nè è soo’t kade i noin tede le si sei se ngann sige.

²⁹ An-in! kêm ndɔge ke à ree, d’a tam kede nè: «Dinyege ke asikum koji ngonn lé, se njé ke oji ngonn nja karé lé a, se njé ke ngannge ili mba kàde de’t njêb lé a tɔ nga, ra de à nel de.»

³⁰ Kêm ndɔn’t nè nga dooge à unni gir kedi mbalge kedi nè: «I ɓungei osoi dè jé’t», à kedi ɗinger looge kedi nè: «I jɔréi uti dè jé.»

³¹ Ke nè á dé ra nyange nè titeke bè se’m man kage ke tebe, à ɓaa sei ke i tooi asinan se kage ke tutu nga, ké le si à tò titeke bain wa?

Njérɔge ɓeri Jésu kàde kage-ke-dese’t

³² Dé ree se njé ra majelége ke rang joo le ɓer de kàde kage-ke-dese’t se Jésu nan’t.

³³ Loo ke njérɔge reei teei se Jésu loo karé bè ke dé ɓar’n «Ngó-non-doo» nè nga ɓaa, dé ɓer’n tutu. Njé ra nyan majelége ke joo nè géa dé ɓer de se’n nan’t, è ke karé dè jikonn’t a, è ke karé dè jigeln’t a tɔ.

³⁴ Nè Jésu tam ede nè: – Bɔ’m i tin kêmi mbit dè de’t, tede nyan ke dé ra nga kum de gang dè’t lé. Dé tur jala dè kubuge le’n ke rann’t ɓita dé kai nan ɓai.

³⁵ Kosdooge ke ndai loon’t nè nga an-in nin sikm. Njékɔr non Juipge géa teli Jésu ke kurkogo le de edi nè: – E aje njé ke rang. Ke nè á è Krist ke Nube ɔr’n unde’n se ninn’n kerɔte ɓaa, maje kade taa ra’n è kuwe tà yo’t.

³⁶ Njérɔge géa teli Jésu ke kurkogo le de tɔ. Ei reei ngɔr ke rann’t undei mann-nduu ke mase tànn’t.

³⁷ Taɓai ei tami se’n edi nè: – Ke nè á i ngar le juipge kerɔte ɓaa, i taa rai i kuwe tà yo’t ade j’an.

³⁸ Taɓai ei ndangi tà nè tà kage-ke-dese’t dènn’t dɔ edi nè: – E nè nga è ngar le Juipge.

³⁹ Njé ra majelége joo ke dé ɓer de se’n nan’t nga, è ke karé tule mbe dènn’t tɔ ede nè: – Ké i i Krist ke Nube ule’n nga lé ɓai wa? I taa rai i kuwe tà yo’t ɓaa, i taa jè tà yo’t sei tɔ.

⁴⁰ Nè njè ke karé ke rang in se’n dè’t ede nè: – Ké Nube géa i ile koje dènn’t lé wa? Tà ke karé ke dé gang dènn’t nga kuwe è lei tɔ.

⁴¹ Jè sei ɓaa tà ke dé gang dè jé’t nga è kum kuwe. Tede è kure nyan ra jé á ɔde kum jé. Nè è nè nga, ra nyan karé bè ke majelé lé.

⁴² E ke njè kin se made’n nga tel tur tà’n ede Jésu ede nè: – Kuwe-ɓee, ade kêmi olé dèm’t loo ke ndɔn’t a i tel ree kon ɓee dè dooge’t.

⁴³ Jésu tel ilé dè’t ede nè: – Kerɔte kuwe, man m’edi ndàt, ɓila kuwe a i ndi se’m nan’t Loo ke Maje’t.

Tà Jésu tête nyonk

⁴⁴ Kàde nda dann ɓee bɔp. Loo tel tuge ndul bigm dè nang nè bere mbak ade kàde tel’n ra’n se mbɔr sár kàde ke mute ke tà loo sɔl’t ase’n.

⁴⁵ Tilkus utu kum kàde. Tà kubu ke bòi ke dé gang’n gir kêm kei le Nube ke tò se ninn’n ribe danné banjang oso nang.

⁴⁶ Jésu ra nyan beng ede nè: – Bɔ’m, m’inye ndil’m kêm jii’t. Loo ke è tam tà nè nga bè ɓaa, tà’n tête nyonk.

⁴⁷ Loo ke kuwe njérɔge ke njèkunn dè de an nyange ke teei nè bè ɓaa, è ule ndubra dè Nube’t ede nè: – Loo naje’n goto, doo nè nga è doo ke danné sêw kuwe.

⁴⁸ Loo ke doobulege reei som-som an-in nyange ke teei nga bè ɓaa, ei teli undei kàde de dai-dai ke ɓéee.

⁴⁹ Nè dooge malang ke geri Jésu maje se dinyege ke unni gir dannii ɓeekon ke Galilée nú ndai heb an-in nyange ke desi nè nga.

Joseph ke ɓee le’n è Arimathée dubu ninn Jésu

⁵⁰ Dingem karé bè ndi tutu, ri’n nè Joseph, ɓee koje’n è Arimathée ɓeekon ke Judée. Dingem nè nga è balkum njégangtàge. E doo ke njèkêm-maje se njè ra nyan danné sêw a tɔ.

⁵¹ E ndige se madennge dè nyan ke ɔji le rai nga lé a, è um nan’t se de dè nyan ra de’t lé a tɔ. E ndi ngine Konɓee le Nube tchên.

⁵² Joseph nè nga aw ra ngar Pilate’t ede’n ede nè: – Kɔkrɔ karè, ade’m m’ɔr ninn Jésu m’aw m’dubu.

⁵³ Go’t gugu Joseph aw ɔr ninn Jésu kàde kage-ke-dese’t, è um’n ngire se tà kubu dubu ninn. E unn’n aw unde’n kêm bolè mbal ke dé son. Bolè mbal nè nga dé dubu ninn doo nja karé bè tutu ndan lé ɓai.

⁵⁴ E ndɔ ke d’uwe dè nja nyange malang tede nain ngɔr ɓaa kàde le ndɔ taa kebe à ase .

⁵⁵ Dinyege ke in-in se Jésu ɓeekon ke Galilée nú nga, ndolèi goo Joseph awi se’n le kan be-ɓade a, le kan ké à ile ninn Jésu tutu titeke bain wa a tɔ.

⁵⁶ Dinyege nè nga, go’t gugu teli awi ɓéee le de uwei dè nja wubuge ke ete sununn tede le ndum ninn Jésu nga. D’uwe ra de nang se ndɔ taa kebe titeke gute-ndu ɔje’n.