Tà ke Maje ke Luc ndang 22 - Nouveau Testament en Gulay 2004

Judas ɔje njáng le kule Jésu ji njékɔr non Juipge’t

¹ Ndɔ ra nan ke anje pululu ke dé ɓar’n Paque nain ngɔr.

² Maw njékuje nyan-mesege se njékɔrgir gute-nduge sangi gos ke le tɔl’n Jésu, nè dé ɓel kum kosdooge.

³ Njè sú dooge ur kêm Judas’t ke ri tɔy’n nè Iskariot. Judas nga è è ke karé dann njé ke dɔg-gidé-joo’t.

⁴ E aw inge maw njékuje nyan-mesege se maw le njérɔge ke ngonmi tà kei le Nube ɔje se de tà dè gos ke ayé ra le kule’n Jésu ji de’t.

⁵ Dé ra ranel ngain taɓai d’unn ndu de le kade Judas nar ndêin.

⁶ Judas ndige se de dè’t. E unn gir sang loo ke kanm le kule’n Jésu ji de’t mundu anje kade doobulege geri.

Jésu ule njékuwe-girnge joo le kade uwei dè nja nyan ra nan Paque

⁷ Ndɔ tɔl nyankulge ra’n Paque ke anje pululu ase ɓá ta.

⁸ Jésu ɔr Pierre se Jean ule de ede nè: – Ɔti awi uwei dè nja nyan ra nan Paque le kade j’usei.

⁹ Dé tel deje’n d’ede nè: – Ké loo ke ra i ndige le kade j’uwe dè nja nyan ra nan nè nga tutu wa?

¹⁰ Jésu tel ede de ede nè: – An-in! loo ke sei a kuri kêm ɓee-bò’t nga, a ingei dingem karé ke oto ku mann dènn’t. Kêm kei ke à aw tutu nga ɔri dè njà’n têr-têr awi se’n.

¹¹ Taɓai edi kuwe-kei edi nè: «Kuwe-ɓee le jé ule jè le kade jè deji ké kêm kei ke ra nè se jé jè njékuwe-girnge j’à j’use nyan ra nan Paque nga tutu wa?»

¹² Doo nè nga à tɔje sei kei ke bòi ke dè made’t dɔ. D’uwe dè nja nyan malang tutu ɓá. E kêm kei nè á sei a kuwei dè nyan ra nan Paque.

¹³ Loo ke d’ɔte d’aw ɓaa, d’inge nyange nè nga se loo’n-loo’n titeke Jésu ede’n de kété nga tɔ. Dé d’uwe dè nja nyan ra nan Paque.

Jésu unde gir mur le Kuwe-ɓee

¹⁴ Loo ke kàde ase ɓá ɓaa, Jésu se njékawkulege unni gir kuse nyan.

¹⁵ E ede de ede nè: – M’ndinge ra’m ngain le kade j’usei nyan nan Paque nè nan’t kété ɓita kade nyantosowur ra’m ɓai.

¹⁶ Man m’ede sei ndàt, m’a tel kuse se si nyan ra nan Paque nè nga gugu ndan lé sár kade maje’n ɔr’n njêt kêm Konɓee’t le Nube.

¹⁷ Loo ke Jésu taa nyankain mann-nduu nè nga ɓá ɓaa, è ra Nube oiyo kété ɓita è tam ede nè: – I taai umi pêrm-pêrm adi nan gute.

¹⁸ Man m’ede sei ndàt, unn gir’n ɗarinè m’a kain mann-nduu nè nga gugu ndan lé ta sár kade Nube unde’n gir Konɓee le’n.

¹⁹ Loo ke è unn mapa nè ɓá ɓaa, è ra Nube oiyo kété ɓita uwe tête danné ade de ede nè: – Mapa nè nga è danra’m ke m’a m’inye kade tede le si. I têti nan usei adi kêm si olé’n dèm’t.

²⁰ Go’t gugu è taa nyankain mann-nduu nè nga ade de titeke è ra’n se mapa ede nè: – Mann-nduu nè nga è mann-ra ke kige ke Nube mann’n ra’n takul mese’m ke d’a d’ade à an-in nang tede le si.

²¹ Nè an-in! è ke njèkule’m ji de’t nga ndi se’m nan’t tà nyankuse’t nè.

²² Loo naje’n goto, man ke m’ee Ngonn doo nga, m’a m’ɔte kaw se maje’n se go rebe nyan ke d’ɔje’n dè’m. Nè doo ke njèkule’m ji de’t nga à an ɓai!

²³ Njékuwe-girnge unni gir deji nan tà dann de’t kuwe edi nè: – Ké nan dann jéi’t ayé ra nyan titeke bè wa?

Ké nan à è doo ke bò dum dè njékuwe-gir-Jésuge wa?

²⁴ Tà naje ke ɔje dè doo ke d’a d’an’n ke doo ke bò dum dè njékuwe-gir-Jésuge oso tip dann de ei’t kuwe.

²⁵ Jésu ede de ede nè: – Girkoje dooge gai-gai ke dè nang nè, ngar-ɓeege le de on-in de njanm-njanm a, njékan dè dege adi dé ɓar de njéra majege a tɔ.

²⁶ Maje kade sei i rai titeke bè dann si’t lé. Nè è ke è doo ke bò dum dè madennge nga, maje kade tel ra’n ke ngonn gir si. E ke è njékɔr non madennge nga, maje kade tel ra’n ke ngonn njèndi le si a tɔ.

²⁷ Bainléa dooge ei joo. E ke karé ndi tà table kuse-nyan’t a, è ke karé è njèkunn nyankuse ree’n a tɔ. Ké nan è doo ke bò dum made’n dann de ei ke joo nè nga wa? Ké è doo ke ndi tà table kuse-nyan’t nè lé wa? Man géa m’ndi dann si’t asenan se ngonn njèndi bè.

²⁸ Nè sei nga, ulei ra si ndibe se’m nan’t dann nyange ke nanm’t.

²⁹ Gir’n ke nè á m’uwe’n dè nja Konɓee m’ɔje’n dè si titeke Bɔ’m uwe’n dè nja Konɓee ɔje’n dè’m man nga tɔ.

³⁰ Titeke bè á sei a usei a, a an-in nyan a tɔ dè table’t kêm Konɓee’t le’m. Sei a ndii dè kutu-ngar’t le gangi tà dè girkà kosdooge ke dɔg-gidé-joo ke ei girkoje le Israel.

Jésu ede Pierre ede nè: a i naje se rai dèm’t

³¹ Go’t gugu Jésu ɓar Pierre ede’n ede nè: – Simon, Simon, an! Nube inye loo ade Njè sú dooge le kade yei sei titeke dé yeii’n ko le kɔr’n yinge-dè’n gai bè.

³² Nè man m’ɔje tà se Nube le kade kundekêm tchên lei tel wei soin lé. I nga, loo ke a kɔse wan tel ke ram’t ɓaa, ule dingem kêm ngakoinge’t.

³³ Pierre tel ede Jésu ede nè: – Kuwe-ɓee, m’uwe dè nja ra’m le kaw sei nan’t dangai’t éké le kwei sei nan’t a tɔ.

³⁴ Jésu ede Pierre ede nè: – Pierre, man m’edi ndàt, ɓila dann ndɔɔ nè kuwe kété ɓita kade kuren kunje non kɔkerɔ kon ɓaa, a i naje se rai dèm’t ase nja mute kede nè i ger’m lé.

Jésu ede njékuwe-girnge kade ndii dè nja de’t

³⁵ Jésu tel deje njékuwe-girnge ede nè: – Ké loo ke ndɔ ke m’ule sei anje kunn mbu-nar éké mbu-kɔnyan éké awi anje tule gabang nja si’t nga, ké nyan ri á nal sei wa? Dé tel d’ile’n dè’t d’ede nè: – Nyan karé géa nal jè lé.

³⁶ Jésu ede de ede nè: – Nè ɗarinè ɓaa, nanan ke aw se mbu-nar éké mbu-kɔnyan le’n ɓaa, maje kade unn jinn’t a, nanan ke aw se kuye kaskar lé ɓaa, maje kade ige kubu le’n ke bòi yul inye nar’n ndogo’n kuye kaskar karé pa ɓita.

³⁷ Man m’ede sei ndàt, tà nè ke dé ndang kêm Magtub’t d’ɔje’n dè’m d’ede nè: «Dé tute’n nan’t se njékaltà tà gute-ndu’t» nga, gar-gar à aw loon’t deĵ.

³⁸ Njékuwe-gir-Jésuge teli edii edi nè: – Kuwe-ɓee, kuye kaskar joo tò ji jé’t laa. E tel ede nè: – E kuwe ase bè.

Jésu ɔje tà se Nube dè mbal ke kage-olivierge ndai tutu

³⁹ Go’t gugu Jésu unde loo tee aw dè mbal’t ke kage olivierge ndai tutu titeke è ra’n kété-kété. Njèkuwe-girnge ndolèi goo’n.

⁴⁰ Loo ke Jésu aw tee dè mbal’t ɓá ɓaa, è ede njékuwe-girnge ede nè: – Ɔji tà se Nube dɔ-dɔ le kade osoi dann nyan sú’t lé.

⁴¹ Go’t gugu, è ɔr ra’n aw heb ɗêk. E ɔse keje’n nang ɔje tà se Nube ade koo’n tò mbɔr dum è ke kété ede nè:

⁴² – Bɔ’m, ke nè á i ndige ɓaa, ute nyankêmkon nè dèm’t kɔke ke rang. Nè né è bè géa, i ra nyan ke kêm’m man ndige lé, nè nyan ke kêmi á ndige. [

⁴³ Ke loon’t nè kuwe doo ke danrán tee hɔi ke rann’t ule dingem kêmn’t.

⁴⁴ Kàde Jésu gete get-get ade ɔje tà se Nube dum dè tà ke è ɔje se’n kété-kété. Tete unn gir ndeen rann’t ɗêin-ɗêin tite mese ke ndeen nang bè.]

⁴⁵ Loo ke è ɔje tà se Nube gir gang ɓá ɓaa, è ɔse nang in ree ra njèkuwe-girnge’t ɓaa kumndoo tɔl de singling se ɓi.

⁴⁶ E deje de ede nè: – Ké bain á i tooi ɓi titeke bè wa? Ɔsi nang in-in dɔ ɔji tà se Nube kade osoi dann nyan sú’t lé.

D’uwe Jésu

⁴⁷ Loo ke tà nè nain tà Jésu’t ɓai ɓaa, an! dooge ɔri nan mbuu teei pan ke rann’t. Nè njèkuwe-gir-Jésu karé dann njé ke dɔg-gidé-joo’t ke ri’n nè Judas ɔr non de. E ree ngɔr ke ra Jésu’t le kuwe’n kàdenn’t sêm ra’n lapya.

⁴⁸ Nè Jésu deje Judas ede nè: – Judas, ké man ke m’ee Ngonn doo nga ké uwe’m kadi’t sêm i ra’m lapya tá le kule’m ji njébange’t le’m wa?

⁴⁹ Loo ke njé ke le Jésu an-in nyan ke ayé tee nga ɓaa, ei dejii edi nè: – Kuwe-ɓee, ké i ndige le kade jè ra de se kuye kaskar j’ade d’an-in nan wa?

⁵⁰ Ke loon’t nè kuwe è ke karé dann de’t tuge mbi ngonn njèndi ke dingem le maw njékuje nyan-mese ke dè jikon yap.

⁵¹ Nè Jésu ede de ede nè: – Adi ase bè. E ɔde mbi dingem nè nga ade tel tò karè ndát-ndát.

⁵² Go’t gugu è deje maw njékuje nyan-mesege se maw njé ngonm tà kei le Nube, se dooge ke kum de unju ke ɔri nan mbuu reei nga, è ede de ede nè: – Ké bain á sei reei mbuu se kuye kaskarge se ɗugur kagege ji si’t kêl-kêl titeke man ngar le njékɔse tà se njékonɓeege bè wa?

⁵³ M’ee nan’t se si se ndɔ’m-ndɔ’m kêm kei le Nube nè sei ulei ji si lêm ɔdii man ndɔ karé lé. Nè ɗarinè è kàde’n le si a, è kàde’n le njèkonɓee tilkus’t a tɔ.

Pierre tam njáng ede nè n’ger Jésu lé

⁵⁴ D’uwe Jésu d’aw se’n kêm kei le maw njékuje nyan-mesege. Pierre ndolè goo’n nè ade dann de heb ɗêk ndêin.

⁵⁵ Dé ra por ndá tà-ɓee’t dé ndii’n dè nan’t girm. Pierre aw ndi dann de’t jêke^.

⁵⁶ Loo ke Pierre ndi nang tà por’t nga ɓaa, ngonn njèndi ke dinye karé an’n ke dɔ a ke nang a ɓaa, è ede nè: – Dingem nè nga géa ndɔ ke è sée nan’t tɔ.

⁵⁷ Nè Pierre naje ede nè: – Dinye, man m’geré lé.

⁵⁸ Mbɔr go’t gugu dingem karé tête kum’n an Pierre ɓaa, è tam se’n ede nè: – I géa i dann de’t tɔ. Nè Pierre ile’n dè’t ede nè: – Dingem, man m’ee dann de’t lé.

⁵⁹ Ase kàde karé gugu ɓai ɓaa, dingem karé ke rang tam njáng ede nè: – Loo naje’n goto, doo ke nè nga ndɔ ke è sée nan’t tɔ tede è doo ke Galilée.

⁶⁰ Nè Pierre ile’n dè’t ede nè: – Dingem, tà ke i tam nga, m’ger gir lé. Loo ke tà nain tànn’t ɓai ɓaa, kuren kunje non kɔkerɔ kon.

⁶¹ Kuwe-ɓee tel mer Pierre an’n gerer. Kêm Pierre olé dè tà ke ndɔ ke Jésu ede’n: «Ɓila kuwe a i tam njáng kede nè i ger’m lé ase nja mute ɓita kuren kunje à non kɔkerɔ kon ɓai.»

⁶² Pierre unde loo tee nata non ɓɔkl-ɓɔkl.

Njérɔge taji Jésu a, tundei nin a tɔ

⁶³ Dooge ke uwei Jésu ngonmii nga telii ke kurkogo le de a, tundeii a tɔ.

⁶⁴ Dé tɔ kum’n se tà kubu ɓaa dé deje’n d’ede nè: – Ede jè ké nan undei wa?

⁶⁵ Taɓai d’unngir taje’n nduge ke rang gai-gai a tɔ.

Juipge gangi tà dè Jésu’t

⁶⁶ Loo ke loo ar yerer ɓá ɓaa, dooge ke kum de unju dann Juipge se maw njékuje nyan-mesege se njékɔrgir gute-nduge ɔsi nja nan nam-nam. Ei adi dé ree se Jésu non de’t loo gangtà’t.

⁶⁷ Dé deje’n d’ede nè: – Ede jè, ké i á i Krist ke Nube ule’n nga wa? Jésu tel ile de dè’t ede nè: – Ke nè á m’ede sei m’ede nè: man Krist nga géa a umi kêm si dè tàge’t le’m ndan lé.

⁶⁸ Ke nè á m’deje sei tà karé bè ɓaa, a ilei man dè’t lé karè.

⁶⁹ Nè unn gir ɗarinè man Ngonn doo m’a m’ndi dè jikon Nube’t ke njètɔgmong le konɓee se’n.

⁷⁰ Dé malang dé tel deje’n d’ede nè: – A ɓaa, ké i nga i Ngonn le Nube wa? E ile de dè’t ede nè: – I tami è kum, man Ngonn’n kuwe.

⁷¹ E á dé tel d’ede nan d’ede nè: – Ké tà ri á j’awi ndoo kade d’ɔr go d’ade jéi ɓai wa? Tede jéi kuwe j’ooi tà ke tee tàyé’t nga se mbi jéi ɓá ta.