Tà ke Maje ke Luc ndang 2 - Nouveau Testament en Gulay 2004

Marie oje Jésu kêm ɓee ke Bethléhem

¹ Kêm ɓaln’t nè nga, César Auguste, ngar ke bò ke ɓeekon ke Rome unn ndu’n le kade d’unde ri dooge karé-karé malang kêm magtub tute kɔr dooge’t.

² Kunde ri dooge kêm magtub tute kɔr dooge ke desêin sàk-sàk nga, è kêm ɓal ke Kirinius on’n debe ɓeekon ke Rome ke dé ɓar’n Syrie.

³ Gir’n ke nè á, nanan géa tel aw kêm ɓee kojenn’t le kade d’unde ri’n kêm magtub tute kɔr dooge’t nè nga.

⁴ Titeke bè á, Joseph in-in’n kêm ɓee ke ri’n nè Nazareth, ɓeekon ke Galilée aw’n kêm ɓee ke ri’n nè Bethléhem ɓeekon ke le Juda. Bethléhem nga, è ɓee koje ngar David. Joseph aw le kade d’unde ri’n kêm ɓee-bò’t nè nga, tede è géa è girkà le David tɔ.

⁵ Joseph awi se njènong le’n Marie kêm ɓee ke Bethléhem le kade d’unde ri de kêm magtub tute kɔr dooge’t. Nè Marie ndann ngonn kêm’n tɔg lêng-lêng.

⁶ Loo ke dé nain kêm ɓee ke Bethléhem ɓai ɓaa, ndɔ koje ngonn le Marie tee pan.

⁷ E oje ngonn der’n ke dingem. E ɓir’n se tà kubu ile’n kêm begre kuse nyan le dange, tede dooge ubei nan loo njàng-njàng kêm kei tò mbage’t.

Doo ke danrán ede njékul nyange tà ke ɔje dè koje njèkaje dooge

⁸ Njékul nyange ndii kêl loo’t nè nga tɔ. Dé ndi ngang loo’t walé, d’ade ngonm nyankulge.

⁹ Doo ke danrán ke Kuwe-ɓee ule’n tee hɔi ke ra de’t. Ndubra le Kuwe-ɓee ndogó gan dè de wàk ade ɓel unde de ndàt gang de.

¹⁰ Nè doo ke danrán nè nga, ede de ede nè: – Ebi ra si ɓel, tede m’ree le kede sei Tà ke Maje. Tà ke maje nè nga è gir kalra le kosdooge malang ke Israel.

¹¹ Ɓila d’oje njèkaje sei kêm ɓee’t le ngar David. E nè nga à è Kuwe-ɓee a, Krist a tɔ.

¹² Nyan ke à tɔje sei se’n kade i geri á tò ne: Loo ke ingei ngonn ke kide ke dé ɓir’n se tà kubu d’ile’n kêm begre kuse nyan le dange ɓaa, è è kuwe.

¹³ Ke loon’t nè kuwe, kosdooge ke danrán teei pan gan-in dè made de ke Kuwe-ɓee ule’n nga wàk. Dé mbak d’ɔse pa dé ɗɔi’n Nube d’ede nè:

¹⁴ – Maje kade dooge ulei ndubra dè Nube ke njèndi sêm danran’t. Maje kade kêmlom le Nube nain se dooge ke taai kêm’n dè nang nè a tɔ.

Njékul nyange awi kêm ɓee ke Bethléhem

¹⁵ Loo ke dooge ke danrán inyei njékul nyange le teli kawi ɓaa, njékul nyange edi nan edi nè: – Kuwe-ɓee ade jè geri nyan ke tee nè nga ɓá. Bè ɓaa, ade j’awi sár kêm ɓee-bò ke Bethléhem j’an-in nyan nè nga se kum jéi.

¹⁶ Njékul nyange ɔti kalang awi Bethléhem ɓaa ingei Marie se Joseph se ngonn ke kide.

¹⁷ Njékul nyange awi an-in ngonn ke kide nè ɓaa, unni sertà ke doo ke danrán ede de kété ɔje dè ngonn nè tami.

¹⁸ Dooge malang ke ooi sertàge ke njékul nyange tami nga ɓaa, tà ige de sêl.

¹⁹ Nè Marie girtà dè nyange’t nè nga malang ke kété a, ke gugu a, m ade kêm’n wei nal dè’t lé.

²⁰ Loo ke njékul nyange à teli ke ra nyankulge’t le de gugu ɓaa, ei ulei ndubra dè Nube’t a, ɔsi pa ɗɔyi nin a tɔ. Nyange malang ke ei ooi tà’n se mbi de a, an-in se kum de a tɔ nga, awi loon’t deĵ titeke doo ke danrán ke Nube ule’n ede’n de kété nga.

D’ile ri Jésu

²¹ Loo ke ngonn ke kide nè nga ra ndɔ sɔsɔ ɓaa, njékojennge adi d’uje tà mɔte’n, taɓai d’ile ri’n nè Jésu. Ri nè nga è ri ke doo ke danrán ke Kuwe-ɓee ule’n ede de kété ɓita kon’n ndann’n ɓai.

D’aw se Jésu kêm ɓee-bò ke Jérusalem dé tɔje’n Nube

²² Ndɔ kɔr se ra le Marie ase deĵ se go gute-ndu Nube ke Moise ndang kêm magtub’t. Joseph se Marie unni ngonn ke kide nè nga awi se’n kêm ɓee-bò ke Jérusalem le tɔje’n Kuwe-ɓee le kade è nyan kinge’n è kuwe deri gai.

²³ Gute-ndu Kuwe-ɓee ke Moise ndang kêm Magtub’t nga tam ede nè: «Loo ke dinye oje ngonn dè der’n, ke nè á ngonn nè è dingem ɓaa, d’a d’unde’n se ninn’n kade è nyan kinge Kuwe-ɓee kuwe deri.»

²⁴ Joseph se Marie adi der-nda joo éké ngann der-dum joo ke nyankuje-mese se go gute-ndu Kuwe-ɓee ke Moise ndang kêm magtub’t nga.

²⁵ Dingem karé bè, ri’n nè Siméon, è ndi kêm ɓee-bò ke Jérusalem. Dingem nè nga, è njè ra nyan se dè naje’n tàkum Nube’t a, è njè kile koje dènn’t a tɔ. E ndi ngine è ke njèkaje ngannkà Israel nga tchên. Ndil-Kêmnda nain se Siméon.

²⁶ Nube ade Ndil-Kêmnda ede Siméon kété titeke ayé kwei lé sár kade an Kuwe-ɓee Krist ke Nube ule’n nga se kum’n ɓita.

²⁷ Ndil-Kêmnda ɔse Siméon balang-balang ade aw kêm kei le Nube. Loo ke Joseph se Marie reei se ngonn de ke kide nè nga le tɔje’n Nube titeke gute-ndu tam’n ɓaa,

²⁸ Siméon taa’n uwe’n kàdenn’t sêm ɗɔi’n Nube ede nè:

²⁹ – Kuwe’m, inye’m man ngonn njèndi lei ade m’aw se kêmlom ɗarinè ta se go tà ke tee tài’t kété.

³⁰ Tede m’an njèkaje dooge ke i ule’n nga se kum ndan-ndan ɓá ta.

³¹ Kaje ke i uwe dè nja kété nga, tò nata tàkum kosdooge’t malang ɓá.

³² Njèkaje dooge nga, è lookar le kade dooge malang ke dè nang nè dé geri a, à è riɓar le kosdooge ke ei ngannkà Israel a tɔ.

Tà ke Siméon tam ɔje’n dè Jésu

³³ Loo ke Joseph bɔ Jésu se kon’n Marie ooi tà ke Siméon tam ɔje’n dè ngonn de nè nga ɓaa, tà ige de sêl.

³⁴ Siméon tɔr tà’n dè de’t ɓaa, è ede Marie ede nè: – An! ngonn nè nga Nube ɔr’n unde’n ke nyan-tɔje. A è gir koso a, à è gir kɔse nang kin le dooge bule ke ɓeekon ke Israel. Ngonn nè nga, à è nyan-tɔje le Nube. Nè dooge à uteii mbeng.

³⁵ Ngonn nè nga à ade tàgir le dooge bule ke dè ɓengre de’t à kuje ke nata. Nè i Marie kuwe géa, nyankêmkon à ribei danné titeke kuye kaskar ribe’n nyan danné bè tɔ.

Tà ke Anne tam ɔje’n dè Jésu

³⁶ Njèribe-dè-tà ke tà Nube’t ke dinye karé ri’n nè Anne. E ndi kêm ɓee-bò ke Jérusalem. E ngonn le dingem karé ke ri’n nè Phanuel. Phanuel nga è girkà le Aser, njèribe-dè-tà ke tà Nube’t. Dinye nè nga ɓuge gɔk-gɔk. Ndɔ ke è ndi kêm kei ngaw mandenn’t ase ɓal ji sejimute.

³⁷ Loo ke ngaw’n wei ɓaa, è tel taa ngaw gugu lé sár ade ɓal koje’n ase’n kɔr-sɔsɔ-gidé-sɔ. Anne ra kule ade Nube se ndɔge malang. Gir’n ke nè á è inye’n kêm kei le Nube sengel lé. E ɔge kêm’n ɓo dɔ-dɔ tede ndinge’n ndoo tà Nube’t kada a, ndɔ a tɔ.

³⁸ Loo ke Siméon ndi à tam tà ɔje’n dè ngonn nè nga ɓaa, Anne géa tee hɔi tɔ. E unn gir ra Nube oiyo tede tà le ngonn nè. Dooge malang ke ndii nginei ndɔ ke Nube à ɔr’n dooge ke Jérusalem dann kumndoo’t le de nga, Anne ede de tà ke ɔje dè ngonn ke kide nè nga.

Joseph se Marie teli awi se Jésu Nazareth

³⁹ Loo ke Joseph se Marie tɔli ngang nyan ke gute-ndu Kuwe-ɓee ɔje ɓá ɓaa, ei teli awi ɓéee Nazareth kêm ɓeekon ke Galilée.

⁴⁰ Ngonn nè nga ra tɔg ke kété-kété a, tàgir le’n ɓeɓer a tɔ. Kumkunju rusu ɓengre’n njin-njin. Dooge d’an titeke Nube tár’n ngain a tɔ.

Jésu naje tà se njékɔrgir gute-nduge kêm kei le Nube

⁴¹ Ɓal karé-karé malang Joseph se Marie awi kêm ɓee-bò ke Jérusalem le rai nan ke dé ɓar’n Paque.

⁴² Loo ke ɓal koje Jésu ase dɔg-gidé-joo ɓá ɓaa, è aw se njékojennge nan’t titeke rai se ɓal-ɓal nga.

⁴³ Ndɔ ke gir ra nan gang ɗás ɓá ɓaa, Joseph se Marie teli awi ɓéee le de, nè ngonn de Jésu tel ɔɔ nain gugu Jérusalem nal kade dé ger.

⁴⁴ Dé gir kêm de’t d’ede nè bainléa Jésu nain se njémade-loo-kawge le de. Dé njiye dé sang’n ase ndɔ karé dann njénojege’t le de se njé ke geri dege’t a tɔ.

⁴⁵ Nè loo ke d’inge’n lé ɓaa, d’ɔse wan dé tel dè nja de’t d’aw Jérusalem gugu, dé sang’n se loo malang.

⁴⁶ Ndɔ ke njèkon’t mute ɓita d’inge’n kêm kei le Nube. Jésu ndi dann njékɔrgir gute-nduge ur mbi’n oo tà ndó le de a, tel deje de tà dè’t a tɔ.

⁴⁷ Dooge malang ke ooi tà ke Jésu tam nga, tà ige de sêl dè gos nyanger’t le’n se dè tà ke è ile de dè’t se kumkunju’n a tɔ.

⁴⁸ Loo ke njékoje Jésuge an-in nin ɓaa, ndil de tee an-in soin-soin. Kon’n deje’n ede nè: – Ngonn’m, ké bain á i ra se jé ndáng bè wa? An! jè se bɔi joo mbak jè sangi j’ɔr yàl-yàl.

⁴⁹ Jésu tel ile de dè’t ede nè: – Ké i sangi man tede ri wa? Gar-gar è tà le’m le ndi kêm kei le bɔ’m Nube. Ké sei geri bè lé wa?

⁵⁰ Nè dé ger girtà ke Jésu tam nè nga njai lé.

⁵¹ E oo tà tà njékojennge’t tel aw se de ɓéee Nazareth. Kon’n Marie girtà ke kété a, ke gugu a, dè nyange malang ke teei nè nga m ade kêm’n wei nal dè’t lé.

⁵² Danra Jésu ra tɔg ke kété-kété. Kumkunju le’n géa in dè made’t ke kété-kété a tɔ. Nube a, dooge malang a, tárii ngain.