Tà ke Maje ke Luc ndang 10 - Nouveau Testament en Gulay 2004

Jésu ule njékuwe-girnge kɔr-ji sejimute-gidé-joo kile mber’t

¹ Go’t gugu, Kuwe-ɓee ɔr njékuwe-girnge ke rang kɔr-ji sejimute-gidé-joo ule de joo-joo nonn’t kété kêm ɓee-bòge se kêm ɓeege malang ke ndi à aw ke tutu ɓai nga.

² E ede de ede nè: – Ko ke ide kum kuje è ngain, nè njékujennge ii lé ɓai. I deji Nube ke è kuwe-ndɔr le kade ule njékuje koge loo sa ko’t le’n.

³ Awi, an-in! sei i tooi asinan se ngann batege ke m’ule de dann heng-ge’t bè.

⁴ Loo ke a awi ɓaa, an-in tá nè a kin-in kunni nar éké mbu ji si’t; i tulei gabang’t nja si’t lé tɔ. Ke nè á a awi ɓaa, i ndai nang se rebe-rebe i rai dooge lapya lé.

⁵ Kêm kei ke rara ke a awi tutu nga, edi dooge ke kêm kei nè titeke bè kété edi nè: «Maje kade ndutɔr nain se si.»

⁶ Ke nè á doo karé ke ndi dè njann’t tchên le kinge ndutɔr ndi kêm kei nè nga ɓaa, ndutɔr le si à nain se’n. Ke nè á è bè lé ɓaa, ndutɔr le si à tel ree kinge sei gugu.

⁷ Kêm kei ke rara ke awi tutu nga, è kuwe i ndii tutu, usei a, an-in nyan ke d’ade sei a tɔ; tede tete ndam á tɔ karè m tete kule tɔ karè lé. Awi asi loo nák-nák tà keige’t le dooge lé.

⁸ Kêm ɓee ke rara ke a awi tutu nga, ke nè á dooge uwei sei ke ra de’t adi sei nyankuse ɓaa, usei.

⁹ Ɔri ratur ra njératurge ke kêm ɓee’t nè a, edi dooge ke kêm ɓee’t nè nga edi nè: «Konɓee le Nube nain ngɔr se si ta.»

¹⁰ Nè kêm ɓee ke rara ke a awi tutu nga, ke nè á dooge ke kêm ɓee’t nè uwei sei ke ra de’t lé ɓaa, undei loo i teei awi ndá-loo’t i tami edi nè:

¹¹ «Bubur ke kêm ɓee’t le si ke uwe nja jé’t nga, jè geke gák-gák j’um dè si’t.» Nè gar-gar, è tà le kade i geri titeke Nube à on ɓee dè si’t ngɔr ta.

¹² Kerɔte kuwe, man m’ede sei ndàt, titeke kêm ndɔn’t nè nga, tà ke d’a gang dè dooge ke kêm ɓee’t nè à tur ngain dum tà ke ndɔ ke Nube à gang dè dooge ke kêm ɓee-bò ke Sodome nga ɓai.

Jésu in se dooge ke mbati turi hal de

¹³ Sei dooge ke kêm ɓee ke Chorazin nga a an-in ɓai! Sei dooge ke kêm ɓee ke Bethsaida nga, a an-in ɓai! Nyankɔbege ke ndɔ ke dé ra dann si’t nè nga, ke nè á ndɔ ke kété dé ra d’ade dooge ke kêm ɓee ke Tyr se Sidon an-in ɓaa, bainléa ɓila à tulei kubu ndoo ndii nang dann bu’t tede turi hal de mari bere.

¹⁴ Gir’n ke nè á, ndɔ gangtà’t ɓaa, tà ke d’a gang dè dooge ke kêm ɓee ke Tyr se Sidon nga à è soo’t dum le si.

¹⁵ Sei dooge ke kêm ɓee ke Capernaum, ké sei giri kêm si’t edi nè ɓee le si nga d’a tel’n ke ɓee ke bò wa? Ḿ-m̀ è bè lé, ɓee le si nga d’a tel’n ke ɓee ke njè kutu go madennge malang.

¹⁶ Jésu tel ede njékuwe-girnge ede nè: – Nanan ke ur mbi’n oo’n tà le si ɓaa, è man kuwe á ur mbi’n oo’n tà le’m. Doo ke rara ke ute sei mbeng ɓaa, è man kuwe á ute’m mbeng. Ke nè á doo ute’m man mbeng ɓaa, è njèkule’m á ute’n mbeng m è man lé.

Njékuwe-gir-Jésuge ke kɔr-ji sejimute-gidé-joo teli mba’t reei

¹⁷ Go’t gugu, njékuwe-gir-Jésuge ke kɔr-ji sejimute-gidé-joo teli se ranel reei edi nin edi nè: – Kuwe-ɓee, ndilge ke majelé géa, loo ke jè tam tà se rii ɓaa, d’ule dè de d’ade jè.

¹⁸ Nè Jésu tel ile de dè’t ede nè: – Loo ke m’an loo gerer ɓaa, m’an Mweisekar’m lé in danrán oso nang tite ndi ke têl bè.

¹⁹ An-in! man m’ade sei tɔgmong le kade i tubei dè li jênênnge se kuju-nang-ge nang a, le kade i leri tɔgmong le njèban nang làr a tɔ. Nyan karé bè géa à ra sei majelé lé.

²⁰ Nè né è bè géa, i rai ranel tede ri si ke dé ndang kêm Konɓee ke danrán’t, m i rai ranel tede ndilge ke majelé ke ulei dè de adi sei nga lé.

Jésu tɔje Bɔ’n njékuwe-girnge ade geri nin

²¹ Kêm kàdenn’t nè nga, Ndil-Kêmnda ade ranel rusu kêm Jésu njin-njin ade tam ede nè: – Bɔ’m, i Kuwe-ɓee ke danrán se ke dè nang nè, m’tɔyi tede i ribe dè nyange nè nga ade dooge ke nyanger le de goto, nè njékumkunjuge se njényangerge ɓaa, i ɓɔyɔ se de dè kák. Oiyo Bɔ’m, m’tɔyi tede i kuwe ɔje nyan nè nga titeke bè se go kêmkanm lei.

²² Bɔ’m tel se nyan malang um jim’t. Doo karè bè ke ger’m man ke Ngonn’n goto, nè Bɔ’m karè bere á ger’m ke ngonn’n. Doo karé ke ger Bɔ’m goto, nè man Ngonn’n kuwe karé bere á m’ger’n. Doo ke man Ngonn’n kuwe m’ndige ɓita m’a m’ribe se’n dè Bɔ’m kade ger’n ke doo ke bè ɓai.

²³ Loo ke dooge ke rang gotoi se njékuwe-girnge ɓaa, Jésu tel tur ra’n dè de’t ede de ede nè: – Doo ke kum’n an nyan ke sei an-in nè nga ɓaa, ra’n à nel’n.

²⁴ Man m’ede sei ndàt, njéribe-dè-tàge ke tà Nube’t se ngar-ɓeege bule ke kété mari ndigi kan-in nyange ke sei an-in ɗarinè, nè d’an lé. Dé ndige koo tàge ke sei ooi ɗarinè, nè d’oo lé.

Sertà le dingem ke njè ra kêmkanm ke ɓee le’n è Samarie

²⁵ Njèkɔrgir gute-ndu Nube karé bè ɔse nang in dɔ, unn tà deje Jésu an-in’n kêm’n ede nè: – Njèndó dooge nyan, ké ri á m’a ra ɗarinè le kinge’n ndikumgajer ke à tò se non nga wa?

²⁶ Jésu tel deje dingem nè nga ede nè: – Ké tà ri á magtub gute-ndu Nube ke ndɔ ke Moise ndang tam wa? Ké ri á i tute kêm magtub’t nè nga wa?

²⁷ Dingem nè nga ile jésu dè’t ede nè: – Magtub gute-ndu Nube ke ndɔ ke Moise ndang nga tam ede nè: «Gar-gar, i tár Kuwe-ɓee Nube lei dè ɓengrei’t se rai bere mbak, se tɔgi a, se tàgir lei bere mbak a tɔ. Taɓai i a tár doo madige titeke i tár’n danrai i kuwe bè.»

²⁸ Jésu tel ede doo nè nga ede nè: – I tam è kum kuwe. Ke nè á i ra titeke bè ɓaa, a i ndi kumgajer sár se non.

²⁹ Nè è njèkɔrgir gute-ndu nè nga ndige le kɔr rasɔl dènn’t ɓaa, è tel deje Jésu ede nè: – Ké doo mademge nga, ei nange wa?

³⁰ Jésu tel ede doo nè ede nè: – Doo karé ndi non. E in kêm ɓee-bò ke Jérusalem ndi aw ke kêm ɓee ke Jéricho. E oso ji gon-ɓogege’t ke ndii umii rebe, ade tundei mbàs-mbàs, tɔri kubuge le’n ke rann’t, ndɔrii ndɔlong ilei se tà’n ɓaa, ɔti ɗák awi.

³¹ Njèkuje nyan-mese karé bè ree tee pan tɔ. Loo ke è tête kum’n an doo nè nga ɓaa, è unn tà rebe le’n unde rang.

³² Go’t gugu, doo karé bè ke è girkà le Lévi ree tee pan loon’t nè nga tɔ. Loo ke è an doo nè nga ɓaa, è unn tà rebe unde rang gang dɔ aw.

³³ Nè dingem karé bè, ke ɓee le’n è Samarie, ndi aw se rebe nè nga tɔ. E age ngɔr ke ra doo’t nè nga an’n. Ke loon’t nè kuwe, kêm’n tɔse’n se non mbik-mbik.

³⁴ E ree ra dingem’t nè tise tà dòge ke rann’t, ra wubu tà’t a, tête mann-nduu tà’t tɔ’n njanm-njanm. Go’t gugu, è unn’n unde’n dè koro’t le’n ke kinge’n, ɔr non’n aw se’n kêm kei tò mbage’t, taɓai tɔse kum’n dènn’t maje.

³⁵ Barè lookar’n, è tɔr nar kule ke ndɔ joo bere mbak ade kuwe kei-mba nè ɓaa, è ede’n ede nè: «I tɔse kumi dè dingem’t nè nga ade’m sei. Nyan malang ke a i tuju’n dum dè nar ke m’adi nè nga, ndɔ ke m’a m’tel ɓaa, man kuwe m’a m’ugei ɓai.»

³⁶ Loo ke Jésu tam gostà nè nga gir gang ɗás ɓaa, è tel deje njèkɔrgir gute-ndu Nube ede nè: – A ɓaa, dann dooge ke mute nè nga, ké è ke ra an titeke è doo-made dingem ke oso ji gon-ɓogege’t nè wa?

³⁷ E ile jésu dè’t ede nè: – E è ke njè ra kêmkanm se doo nè nga. Jésu tel ede njèkɔrgir gute-ndu Nube nè ede nè: – Aw, i ra titeke bè tɔ.

Marthe se Marie uwei Jésu ke ra de’t rai nin mba

³⁸ Loo ke Jésu se njékuwe-girnge à awi rebe ɓai ɓaa, è aw kêm ɓee karé’t bè. Dinye karé ke ri’n nè Marthe aw se’n kêm kei le’n ra’n mba.

³⁹ Marthe aw se ngokon’n ke dinye ke girn’t ri’n nè Marie. Marie ndi nang nja Kuwe-ɓee’t ur mbi’n oo’n tà le’n.

⁴⁰ Nè kêm Marthe tò kekek tede kulege gai-gai an-in dè’n king-king. E unde-loo tee pitring ree ra Jésu’t ede’n ede nè: – Kuwe-ɓee, kinye ke Marie inye’m tà kulege’t se kar’m bere nga, ké usi nyan lé wa? Ede’n ade in ree ra se’m.

⁴¹ Kuwe-ɓee tel ile Marthe dè’t ede nè: – Marthe, Marthe, i ade kêmi olé bɔt-bɔt a, i ndɔje rai ɔje dè nyange bule a tɔ.

⁴² Nè kêl nyan karé ke Marie ɔr dann madege’t nga, è nyan ke maje, doo karé géa ase taa jinn’t lé.