Tà ke Maje ke Luc ndang 1 - Nouveau Testament en Gulay 2004

Luc ɔrgir nyan ke è ndang’n magtub nè

¹ Dooge bule unni gir ndangi sertà ke ɔje dè nyange ke kété teei dann jéi’t,

² se gonan-gonan titeke njé ke an-in se kum de ɔri adi jéi. Njé ke kété an-in nyange nè se kum de nga, ɓila teli ei njékile mber Tà ke Maje le Nube.

³ M’nder gir nyange nè nga mari. Ɗarinè, man géa, m’an titeke maje kum ndang tà’n kunde non-in’t se gonan-gonan le kade i Théophile ke njè maje dum.

⁴ M’ra titeke bè le kade i ger’n titeke nyange nè ke d’ɔr ser’n d’edi nga, ei nyange kerɔte.

Tà ke ɔje dè koje Jean ke njèkule dooge manné njonm

⁵ Nyange nè malang teei kêm lo ke ngar Hérode ee’n njèkonɓee ke ɓeekon ke Juda. Njèkuje nyan-mese karé bè ndi tutu ri’n nè Zacharie. E dann njé ke le njèyo’t Abia. Dinye le’n ri’n nè Elisabeth, è girkà le Aaron maw njèkuje nyan-mese.

⁶ Zacharie se dinye le’n Elisabeth ei njé ra nyange ke danné sêw tàkum Nube’t a, ei njiyei se go gute-ndu Nube têr-têr a tɔ.

⁷ Nè ei oji ngonn lé tede Elisabeth è kuju. Ei joo mbak ɓugei gɔk-gɔk ta.

⁸ Ndɔ karé bè, Zacharie ndi à ra kule kuje nyan-mese non Nube’t tede è ndɔ le njé ke le’n.

⁹ Se go nyanra njékuje nyan-mesege ke ei ra dɔ-dɔ, ei naji nan tà le kan-in ké nan á jala à ɔse’n dann de’t le kade ra kule kêm ndɔn’t nè wa? Gir’n ke nè á d’ɔr’n Zacharie le kade ró katchatcha kêm kei ke tò se ninn’n le Nube.

¹⁰ Gute kosdooge malang ndai nata kêm kei le Kuwe-ɓee à ɔji se’n tà.

¹¹ Doo ke danrán ke Kuwe-ɓee ule’n tee hɔi ke ra Zacharie’t, è nda se ke dè jikon ɗinger loo ró katchatcha’t.

¹² Loo ke Zacharie an’n ɓaa, tà ige’n sêl ade ɓel unde’n ndàt gang’n.

¹³ Nè doo ke danrán ke Kuwe-ɓee ule’n nga ede Zacharie ede nè: – Ebe rai ɓel, Zacharie, ndinge ndoo lei oso mbi Nube’t. Dinye lei Elisabeth à oje ngonn ke dingem. I a kile ri’n nè Jean.

¹⁴ A i ra ranel ngain dè koje ngonn’t nè nga. E i á se kari lé, nè dooge bule d’a d’al ra de sei nan’t ɔje dè koje ngonn nè nga.

¹⁵ Tede à è doo ke bò tàkum Kuwe-ɓee’t. E à kain yibe nduu ke ate éké yibe ke ate karé ke rang lé a tɔ. Loo ke è nain kêm konn’t ɓai kuwe Ndil-Kêmnda taa kêm’n pel-pel.

¹⁶ Ngonn nè nga à ade ngannkà Israelge à ɔsi wan teli kilei koje dè Kuwe-ɓee’t le de.

¹⁷ E à njiye kété non Nube’t se tɔgmong le Ndil a, se tɔgmong ke Elie njèribe-dè-tà ke tà Nube’t ra’n kule kété mari. E à um bɔ ngannge nan’t se ngann dege. E à tel njékaltàge kade ei njéra nyan danné sêwge. E à uwe dè nja njé ke nange dann kosdooge ke Israel. E ra titeke bè le kade dé ndi dè nja de’t tchên le kuwe Kuwe-ɓee ke ra de’t a tɔ.

¹⁸ Zacharie deje doo ke danrán ke Nube ule’n ede nè: – Ké ri á à ade m’a m’ger titeke tà ke ede’m nga à è tà kerɔte wa? Tede man jè se neen’m jè ɓuge ngain ta.

¹⁹ Doo ke danrán ke Kuwe-ɓee ule’n nga tel ile Zacharie dè’t ede nè: – Man m’ee Gabriel ke njè nda non Nube’t se ndɔge-ndɔge. E Nube kuwe á ule’m rai’t le kade m’ɔje sei tà a, le kade m’ile mber Tà ke Maje nè nga m’adi a tɔ.

²⁰ Nè titeke i um kêmi dè tà’t ke m’edi nga lé ɓaa, ɗarinè kɔbi à utu, i asekum tam tà lé sár kade nyange nè ke m’edi tà’n aw’n loon’t deĵ ɓita.

²¹ Loo ke Zacharie ndi oo tà le doo ke danrán ke Nube ule’n nga ɓaa, gute dooge ke ndii nginei nga, kêm de tò kekek tede è nain kêm kei ke tò se ninn’t le Kuwe-ɓee ade kur’n heb ɗak.

²² Loo ke Zacharie unde loo tee nata ɓaa, è asekum tam tà kede de lé. Mbi’n se kɔbe’n utu ade yei ji’n ɓàk-ɓàk karè. Loon’t nè ɓita kum kosdooge gang reng ade geri titeke nyan-pinde tee dènn’t kêm kei le Nube ɓai.

²³ Ndɔ ke Zacharie tɔl ngang kule le’n kêm kei’t le Nube mbas ɓá ɓaa, è tel aw kêm kei le’n.

²⁴ Mbɔr go’t ɓaa, neen’n Elisabeth ndann ngonn. Elisabeth ɓɔyɔ ra’n kêm kei ase nan mi. E tam ede nè:

²⁵ – An-in nyan ke Kuwe-ɓee ra tede tà le’m. Ɗarinè è ɔr rasɔl dèm’t tàkum dooge’t malang.

Koje ke d’a d’oje Jésu

²⁶ Loo ke Elisabeth ndann ngonn ra nan mute-mute ɓaa, Nube ule Gabriel, doo ke danrán kêm ngonn ɓee karé ke ɓeekon ke Galilée, ri’n nè Nazareth.

²⁷ Doo ke danrán nè nga Nube ule’n ra ngomande karé ke è njènong le dingem ke ri’n nè Joseph. Joseph nga è girkà le ngar David. Ri ngomande ke nal ger dingem ɓai nè nga, è Marie.

²⁸ Doo ke danrán ree ra Marie’t ede’n ede nè: – M’rai lapya, i nga Kuwe-ɓee uwe sei noje a, tɔse kum’n dèi’t a tɔ.

²⁹ Loo ke Marie oo tà nè bè ɓaa, tà ige’n sêl. E deje ra’n tà dè ɓengren’t ede nè: – Ké lapya ke bain á bè wa?

³⁰ Doo ke danrán ke Kuwe-ɓee ule’n nga ede Marie ede nè: – Marie, ebe rai ɓel tede Nube tári ngain.

³¹ An! ɗarinè i a ndann ngonn, i a koje ngonn ke dingem, a ile ri’n nè Jésu.

³² A è doo ke bò a, d’a ɓar’n Ngonn Nube ke njèdum dè nyange malang. Kuwe-ɓee Nube le jéi à ade à è ngar titeke ndɔ ke unn’n ndu’n ade kà’n ngar David.

³³ Ngonn nè nga à on ɓee dè kosdooge ke Israel’t sár se non. Konɓee le’n nga, ngei’n goto.

³⁴ Marie tel deje doo ke danrán ke Nube ule’n nga ede nè: – Dingem ɔde ra’m ndɔ karé lé. Ké m’a m’ndann ngonn titeke bain wa?

³⁵ Doo ke danran nè nga ile Marie dè’t ede nè: – Ndil-Kêmnda à ra kule rai’t a, tɔgmong le Nube Njèdum dè nyange malang à sebe dèi’t titeke ndil oso’n dè doo’t bè. Gir’n ke nè á, ngonn ke tò se ninn’n ke a oje’n nga d’a ɓar’n Ngonn Nube.

³⁶ An! bêni Elisabeth ke d’an’n ke kuju nga, ndann ngonn ke dingem dè ɓugenn’t ase nan mute-mute ɗarinè ta.

³⁷ Tede tɔgmong le Nube asekum ra nyan malang.

³⁸ Marie tel ile Gabriel dè’t ede nè: – Man m’ee ngonn njèndi le Kuwe-ɓee ke dinye karè. Maje kade è ra se’m titeke i tam’n. Ke loon’t nè kuwe Gabriel inye Marie ɔte aw.

Marie aw an Elisabeth

³⁹ Kêm ndɔn’t nè kuwe Marie ɔse nang kalang in aw ngonn ɓee ke tò dè mbalge ke ɓeekon le Juda.

⁴⁰ E aw kêm kei le Zacharie ra lapya Elisabeth.

⁴¹ Loo ke Elisabeth oo ndu Marie ke ra’n lapya ɓaa, ngonn ke kêmn’t unn gir tɔse’n gùl-gùl. Ke loon’t nè kuwe Ndil-Kêmnda taa kêm Elisabeth pel-pel.

⁴² Elisabeth tam tà se ndu’n ke bòi beng ede nè: – Nube tɔr ndu’n dèi’t dum dinyege ke rang malang a, ndutɔr le’n nè nga à nain se ngonn ke a oje’n a tɔ.

⁴³ Ké man nga m’ee nan kade Kuwe-ɓee le’m ree ram’t wa?

⁴⁴ An! loo ke ndui ke i ra’m lapya nga oso mbim’t ɓaa, ra ngonn ke kêm’t nel’n ade tɔse’m gùl-gùl.

⁴⁵ Rai neli tede i naje se rai dè nyange ke Kuwe-ɓee Nube ule doo ke danrán ade edi nga lé. I um kêmi dè’t titeke à aw loon’t deĵ kuwe!

Pa le Marie ke ɔse

⁴⁶ Marie tam ede nè: – Ngarakum ra’m ile riɓar dè Kuwe-ɓee’t a,

⁴⁷ Ngarakum ra’m ra ranel dè Kuwe-ɓee Nube ke njètaa’m tà yo’t a tɔ.

⁴⁸ Man m’ee ngonn njèndi le’n ke dinye karè nè è gir dèm’t. Unn gir’n ɗarinè sár ke kété, girkoje dooge ke ɔsi gonan-gonan à ɓari man dinye ke njèranel.

⁴⁹ Tede Nube ke tɔgmong le’n dum dè nyange malang ra nyange ke tò ɓel tede’m. Ri’n è ri ke tò se ninn’n gai .

⁵⁰ Kêmkanm le’n nga, ngei’n goto tede le njé ke ilei koje dènn’t.

⁵¹ E ra nyange ke bò se go tɔgmong le ji’n. E jɔrè ngarge ke njé tɔgmong-ge

⁵² nang bɔrɔr-bɔrɔr dè kutu-ngarge’t, nè è unn njétɔgmong-ge lé unde de dɔ ɗáng.

⁵³ Njé ke ɓo ra de nga, è uwe se de noje se nyange ndàj-ndàj, nè è rɔ njényan kingege ji de karè ɗáng-ɗáng.

⁵⁴ E din kosdooge ke ei Israel, ngonn njèndi le’n, tede kêm’n olé dè kêmkanm’t le’n titeke è unn’n ndu’n ade Abraham kété mari nga.

⁵⁵ Ndukunn nè nga tò njáng tede le ngannkà Abrahamge.

⁵⁶ Marie ndi se Elisabeth kêm kei le’n ase nan mute ɓita tel aw ɓéee le’n ɓai.

Koje Jean ke njèkule dooge manné njonm

⁵⁷ Loo ke ndɔ koje ngonn le Elisabeth ase ɓá ɓaa, è oje ngonn ke dingem.

⁵⁸ Loo ke njémade tà keige le Elisabeth se njénojege le’n an-in titeke Kuwe-ɓee ra kêmkanm se’n ɓaa, rai ranel se’n nan’t.

⁵⁹ Loo ke ngonn ke kide nè ra ndɔ ji sejimute, njèkon’t sɔsɔ ɓaa, dé ree le kuje tà mɔte’n. Dé ndige le ɓar’n se ri ɓɔ’n Zacharie.

⁶⁰ Nè kon’n ede de ede nè: – Ḿ-m̀, j’à ɓari n’ee Jean tá.

⁶¹ Dé tel d’ile’n dè’t d’ede nè: – Dann njénojege’t lei malang nga, doo karé ke ri’n nè Jean goto.

⁶² Dé tel dé deje Zacharie tà se ji de d’ede nè: – Ké ngonni nga i ndige kade jè ɓarii nan wa?

⁶³ Zacharie ade dé ree se bà ndang magtub d’ade’n. E ndang tà kêm bà’t nè ede nè: – Ri ngonn nè nga è Jean. Dé malang tà ige de sêl dè ri ngonn’t nè nga.

⁶⁴ Ke loon’t nè kuwe ndon Zacharie ɗile warar ade teen tà’n tam’n tà yarar-yarar ɗɔi’n Nube.

⁶⁵ Ɓel unde njé ke kêm ngonn ɓee’t nè nga ndàt gang de malang. Ser nyange nè nga oso se loo mbit-mbit kêm ɓeege ke tooi dè mbalge’t le ɓeekon le Juda bere mbak.

⁶⁶ Dooge malang ke ooi ser nyange nè nga, giri tà kêm de’t edi nè: – Ngonn nè nga ké ndɔ ke rang à è doo ke bain wa? Tɔgmong le Kuwe-ɓee gete’n se ndɔge malang.

Zacharie ɔse pa ɗɔi’n Nube

⁶⁷ Ndil-Kêmnda taa kêm Zacharie bɔ ngonn nè nga pel-pel ade ɔr’n gir nyan ke Nube tɔje’n ede nè:

⁶⁸ – Kuwe-ɓee Nube le kosdooge ke Israel nga, maje kade dooge malang ilei riɓar dènn’t. Tede è ree din jéi balkum kosdooge le’n ke uge dè jéi.

⁶⁹ E ade njètaa dè dooge ɔse nang in dann girkà’t le David ke kété è ngonn njèndi le’n nga.

⁷⁰ E tam tà nè nga kété mari se go rebe ke ra njéribe-dè-tàge’t le’n ke tooi se ninn’n ede nè:

⁷¹ N’a n’taa jéi ji njébange’t le jéi a, se ji dooge’t malang ke ɔri jéi njêt nga a tɔ.

⁷² Nube ra se jéi kêmkanm titeke bè tede kêm’n olé dè mann-ra’t le’n ke tò se ninn’n ke è mann’n ra’n ade kà jéige kété mari nga.

⁷³ E ade kêm’n olé dè mann-ra ke è mann’n ra’n ade kà jéi Abraham ede nè: N’a n’taa jéi ji njébange’t le jéi.

⁷⁴ Loo ke è uwe jéi wont ɔr jéi ji njébange’t le jéi ɓá ɓaa, è ade jéi tɔgmong le ra’n kule kade’n se kêmnda káng.

⁷⁵ Nube ndige le kade jè rai nyan ke se dè naje’n tàkumn’t sár ngei ndɔ ndikumgajer le jéi dè nang nè.

⁷⁶ Ngonn nè nga d’a ɓar’n njèribe-dè-tà ke tà Nube’t ke njè dum dè nyange malang. Ngonn nè nga à njiye non Kuwe-ɓee’t le gɔl rebege le’n ke à ree’n.

⁷⁷ E ade balkum kosdooge le’n à geri titeke Nube aje de a, à ade kêm’n à tin mbit dè kaiyage’t a tɔ.

⁷⁸ Tede Nube le jéi nga, kêmkanm taa ra’n pel-pel. E takul kêmkanm le’n á ade lookar le’n in-in’n danrán nú ree ndogó’n dè jéi’t.

⁷⁹ Lookar nè nga à ndogó dè njé ke ndii dann tilkus’t se njé ke ndii tà yo’t. Lookar nè nga à ɔr non jéi dè rebe ndi se kêmlom dann nan’t a tɔ.

⁸⁰ Ngonn nè nga, ra tɔge ke kété-kété a, hal’n ɓeɓer a tɔ. E ra ɓee kêm dile’t sár kade ndɔ ke rang à kile’n ra’n ke nata tàkum dooge ke Israel.