Nje Ke Rome 9 - Nouveau Testament en Gulay 2004

Nyan ke Nube ɔje tede kosdooge le’n ke è ɔr de

¹ Man m’ede sei ngarankum tà se ri Krist m m’lanm lé. Ndil-Kêmnda géa ade m’ger se kêm’m tite tà ke m’tam nga è ngarankum tà kuwe.

² Tà tur kêm’m ngain ade ɓengre’m ndir njàk-njàk se ndɔge malang.

³ Ke nè á kɔr ra’m ra Krist’t è nyan ke ase kade ngakonm Juipge ingei kaje ɓaa, m’ndinge le kɔr ra’m kuwe m m’ayé mbate lé.

⁴ Dé nè nga, dé dooge ke ndɔ ke Nube tel de ke ngann’n. D’an ndubra le’n se kum de a, è mann ra’n ade de a, è ade de gute-ndu’n a, inye loo ade dé ra kule d’ade’n a, è unn ndu’n ade de a tɔ.

⁵ Juipge nga ei girkà le dooge le Nube ke ri de ɓar ngain. Krist ke è Nube ke on ɓee dè nyange’t malang nga géa d’oje’n girkà le de dé nè nga tɔ. Maje kade dè Krist mong káng-káng sár se non! Maje kade è titeke bè kuwe.

⁶ Tà ke tee tà Nube’t nga, Nube ade ra nyan m tò karè lé. Kerɔte kuwe, dooge malang ke in-in girkà’t le Israel nga, ei Israelge ke get mbak lé.

⁷ Dooge malang ke d’oje de girkà’t le Abraham nga, ei ngann le Abraham ke get mbak lé. Ndɔ ke Nube ede Abraham ede nè: «Ngannkàige ke ndɔ ke m’unn’n ndu’m m’adi nga à inge de se rebe ke ra Isaac’t.»

⁸ Kɔrgir tà nè nga è titeke bè: dé ke d’oje de se rebe ke dooge ndii oji nan nga, dé ngann le Nube lé. Nè njé ke d’oje de se go kunn-ndu le Nube kuwe karé á ei ngann le Abraham ke get.

⁹ Oiyo, ndɔ ke Nube unn ndu’n ade Abraham ede nè: «Kál, kêm nan ke tite made nè bè ɓaa, m’a m’tel ree, an! neein Sara à inge ngonn ke dingem.»

¹⁰ E ke nè á karé lé. Rébecca géa ndɔ ke oje ndungege se kà jéi Isaac tɔ.

¹¹ Kété ke d’oje ndungege nè lé ɓai nga, Nube ede Rébecca ede nè: «Ngonn ke ngatɔg à ra ɓer le njè ke ndêin. Nube ɔje nyan nè nga kété ɓita kade ngannge nè rai maje éké rai majelé ɓai.

¹² Nyan ke Nube ɔje nga, è se go nyanra dooge lé, nè è se go kêm ndige le’n è Nube ke njè ɓar de kuwe karé bere.

¹³ Se go tà ke dé ndang’n kêm Magtub’t le Nube d’ede nè: «M’tár Jacob ngain nè Esau ɓaa, m’ɔr’n njêt.»

¹⁴ Ké tà ri á j’à tam dè tà’t nè nga wa? Ké Nube è njè ra nyan se dè naje’n lé wa? Ḿ-m̀, è bè lé.

¹⁵ Nube ede Moise ede nè: «Doo ke m’ndige le ra se’n kêmkanm ɓaa, m’a m’ra se’n kêmkanm; doo ke m’ndige le kan kumtondoo le’n ɓaa, m’a m’an kumtondoo le’n.»

¹⁶ Bè ɓaa, Nube ɔr doo ke è ndige le ra se’n kêmkanm. Kɔr ke è ɔr doo nga tò ɔje dè kêmndige le doo éké nyanra doo lé; nè ɔje dè Nube ke njè ra kêmkanm se doo nga kuwe karé bere.

¹⁷ Jè tutei tà kêm Magtub ke tò se ninn’n titeke Nube ede pharaon, ngar ke ɓeekon ke Egypte ede nè: «Man m’ɔri m’undei ngar le tɔje’n tɔgmong le’m rai’t a, tede kade riɓar le’m oso’n se loo mbit-mbit dè nang nè bere mbak a tɔ.»

¹⁸ Titeke bè, Nube ra kêmkanm se nanan ke è ndige le ra se’n kêmkanm a, è ade kêm doo nder titeke è Nube ndige a tɔ.

Nube ra kêmkanm se dooge titeke kêm’n ndige

¹⁹ Bainléa doo karé dann si’t à deje’m kede nè: «Né è titeke bè ɓaa, ké bain á Nube in se jéi dè ra majelé’t nga taɓai wa? Ké nan asekum kɔge’n dè ra nyan ke kêm’n ndige’t nga wa?»

²⁰ Hai! doo, ké i nga i nan á i naje Nube tà’t wa? Jó hanje à deje njèkube’n kede nè: «Ké bain á ube’m bè wa?» lé.

²¹ Ké kɔde jó è doo dè hanje le ra se’n nyan ke kêm’n ndige lé wa? Hanje ke karé nè kuwe è ase kube’n jó-rebe éké jó-gɔr. Le Nube géa è titeke bè tɔ.

²² Nube ndige tɔje wong le’n ke nata; è ndige le kade dooge geri tɔgmong le’n. Nè è ile kêm’n pon dè dooge ke wong ra’n dè de’t a, ke ndii tà tuju’t a tɔ.

²³ Nube ra titeke bè le kade dooge ke è ra se de kêmkanm nga an-in ndubra le’n ke bò se kum de. Dooge ke Nube ra se de kêmkanm nga, ei dooge ke è gɔl de unde de konn kété mari le kade ingei ndubra le’n nga tɔ.

²⁴ Dooge ke Nube ra se de kêmkanm nga, è jèi ke è ɓar jèi. E dann jéi jèi Juipge kuwe se kar jéi á Nube ɓar jèi lé, nè è ɓar njé ke ei Juipge lé nga tɔ.

²⁵ Nube tam tà nè nga kêm magtub’t le Osée, njèribe-dè-tà ke tà Nube’t ede nè: «Kosdooge ke kété ei dooge le’m lé nga, m’a m’ɓar de Kosdooge le’m a, dooge ke kété m’tár de lé nga, ɗarinè m’a m’ɓar de Kotárge le’m.

²⁶ Loo ke ndɔ ke dé tam se kosdooge tutu d’ede nè: «sei sei kosdooge le’m lé», nè loo’n nè á d’a tel ɓar de ngann le Nube ke njèndi kumgajer ɓai.»

²⁷ Esaie géa ndɔ ke tam tà se ndu’n ke bòi ɔje’n dè kosdooge ke Israel ede nè: «Ke nè á ngann Israelge bulei tite nyeenger ke tà bò’t bè géa, kalè de ke ndêin bè á Nube à aje’n.

²⁸ Kerɔte kuwe, nyan ke Kuwe-ɓee Nube ɔje le ra nga à ra kɔr son’n njêt kalang dè nang nè bere mbak.»

²⁹ Esaie njèribe-dè-tà ke tà Nube’t nè nga tam kété ɓá ede nè: «Ke nè á ndɔ ke Kuwe-ɓee ke njèkunde nyange malang ke danrán inye dooge ke nange kumgajer lé ɓaa, né j’ayé tooi tite ɓee-bò ke Sodome, j’ayé tooi kasinan se dooge ke kêm ɓee-bò ke Gomorrhe bè tɔ.»

Ké bain á Nube ute Israel mbeng wa?

³⁰ Ké j’à tami kedi nè ri wa? Dooge ke ei Juipge lé ke sangi le kade tà ɔr dè de’t lé nga, Nube ɔr tà dè de’t takul kundekêm.

³¹ Kosdooge ke Israel ɓaa sangi le kade tà ɔr dè de’t takul gute-ndu, nè tà ɔr dè de’t non Nube’t ndan lé.

³² Ké tede ri á tà ɔr dè Juipge’t lé wa? Tede Juipge sangi le kadi Nube ɔr tà dè de’t se go kule ra dege. Ei sangi kadi Nube ɔr tà dè de’t takul kundekêm nga lé. Gir’n ke nè á tugei nja de tu kuberi her nè awi tebel-tebel.

³³ Titeke dé ndang’n kêm Magtub’t le Nube d’ede nè: «An-in! m’a m’unde kuberi her kêm ɓee-bò ke Sion kade tuge de ade d’aw tebel-tebel a, m’a m’unde kuberi mbal kade tuge de ade d’oso a tɔ. Nè doo unde kêm’n dè kuberi mbal’t nè ɓaa à ndi dann rasɔl’t lé.»