Nje Ke Rome 4 - Nouveau Testament en Gulay 2004

Nube ɔr tà dè Abraham’t takul kundekêm

¹ Se go danra nga ké tà ri á j’à tam ɔje dè kà jéi Abraham wa? Ké ri á è inge se go danra wa?

² Ke nè á ndɔ ke Nube ɔr tà dè Abraham’t se go nyan ke è ra ɓaa, nè dè’n à in tchakm kuwe. Nè dè’n asekum kin tchakm non Nube’t lé.

³ Ké tà ri á Magtub ke tò se ninn’n tam wa? E tam ede nè: «Abraham unde kêm’n dè Nube’t á Nube ɔr’n tà dènn’t.»

⁴ Nyan ke doo ra kule á inge’n nga, è nar kuge dè ji’n m è nyan kunde nja’n lé: nè è nar kuge dè ji’n è kuwe.

⁵ Ke nè á è ra kule lé, nè è unde kêm’n dè Nube ke njè kɔr tà dè njè ra nyan majelé’t nga ɓaa, Nube ɔr tà dènn’t takul kundekêm le’n.

⁶ Titeke bè á David géa tam tà ɔje’n dè ranel le doo ke Nube ɔr tà dènn’t nal mbɔje nyan rannge. David tam ede nè:

⁷ «Dooge ke Nube inye go nyanrage le de ke pás-pàs a, ade kêm’n tin mbit dè majelége’t le de a tɔ nga, ra de à nel de kuwe.

⁸ Doo ke Kuwe-ɓee mbɔje go majelé le’n lé ɓaa, ra’n à nel’n kuwe.»

⁹ Ké ranel nè nga tò tede le Juipge ke njékuje tà mɔte dege kuwe se kar de bere wa? Njé ke ei Juipge lé nga, ké ranel nè tò tede le de tɔ lé wa? Kété jè tam j’ede nè: «Nube ɔr tà dè Abraham’t takul kêm’n ke unde dè Nube’t.»

¹⁰ Ké ndɔ ke ra á Nube ɔr’n tà dè Abraham’t wa? Ké Nube ɔr tà dè Abraham’t kété ɓita d’uje tà mɔte’n éké d’uje tà mɔte’n pa ɓita Nube ɔr tà dènn’t wa? Ḿ-m̀, Nube ɔr tà dè Abraham’t kété ɓita uje tà mɔte’n ɓai.

¹¹ Abraham nga ndɔ ke d’uje tà mɔte’n le tɔje’n dooge titeke Nube ɔr tà dènn’t ɓá takul kêm’n ke unde dènn’t. Nube ɔr tà dè Abraham’t kété pa ɓita d’uje tà mɔte’n ɓai. Titeke bè á Abraham tel ee’n bɔ dooge malang ke undei kêm de dè Nube’t nal kuje tà mɔte de. Nube ɔr tà dè njé ke undei kêm de dènn’t nal kuje tà mɔte de.

¹² Abraham tel è bɔ njékuje tà mɔte dege nga tɔ. E bɔ njé ke d’uje tà mɔte de ɔje dè danra karè lé, nè njé ke unni dè nja kundekêm le’n. Bɔ jéi Abraham nga, ndɔ ke unde kêm’n dè Nube’t kété pa ɓita d’uje tà mɔte’n ɓai.

Nube unn ndu’n ade njé ke undei kêm de dènn’t

¹³ Ndɔ ke Nube unn ndu’n ade Abraham se ngannkànnge titeke à ingei dè nang nè bere mbak ke nyan-ndube le de. Abraham inge kunn-ndu nè nga bè tede kan ke è an dè gute-ndu sêw-sêw lé, nè tede kɔr ke Nube ɔr tà dènn’t takul kundekêm le’n.

¹⁴ Ke nè á dooge ingei nyan-ndube se go kile koje dè gute-ndu’t ɓaa, kundekêm dè Nube’t tel è nyan ke raikarè a, kunn ke Nube unn ndu’n ade Abraham nga géa tel è nyan ke nuju a tɔ.

¹⁵ Kerɔte kuwe, gute-ndu nga tɔje wong le Nube ke nata. Loo ke gute-ndu goto tutu nga, kaltà tà gute-ndu’t géa goto tutu a tɔ.

¹⁶ Titeke bè ɓaa, kunn-ndu nè nga tò ɔje dè kundekêm tede le kade è nyan-noje le Nube. Kunn-ndu nè nga tò njáng tede le ngannkà Abrahamge malang. Kunn-ndu nè nga è tede le njé ke ilei koje dè gute-ndu’t á se kar de lé, nè è tede le njé ke undei kêm de dè Nube’t tite bɔ jéi Abraham bè tɔ.

¹⁷ Dé ndang kêm Magtub’t le Nube d’ede nè: «I Abraham nga, m’teli ke bɔ dooge ke bulei ɗik-ɗik.» Abraham è bɔ jéi malang non Nube’t ke è unde kêm’n dènn’t. E Nube ke njè kade dooge ke weii teli ndii kumgajer a, nyange ke gotoi ɓai géa è ɓar de ade undei loo teei a tɔ.

¹⁸ Nyan kunde kêm tchên dè’t le Abraham goto dè ɓugenn’t ta. Nè né è bè géa, è unde kêm’n tchên ke dè Nube’t. Gir’n ke nè á tel ee’n «bɔ girkoje dooge ke bulei ɗik-ɗik» se go tà ke ndɔ ke Nube ede’n ede nè: «Ngannkàige à bulei titeke bè tɔ.»

¹⁹ Abraham an ra’n ke doo ke wei ɓá m n’ase koje ngonn lé ta, tede nain ngɔr ɓaa ɓal koje’n à ase aru karé. Neen’n Sara géa ɓuge ngain ase koje ngonn lé ta. Nè né è bè géa, Abraham ade kundekêm le’n yɔk lé.

²⁰ E naje se ra’n dè kunn-ndu’t le Nube nga lé. Takul kundekêm á è inge’n tɔge’n ile’n riɓar dè Nube’t.

²¹ Abraham ger kêmn’t mbak titeke nyan ke Nube unn ndu’n le ra nga, Nube asekum ra tɔl mbas kuwe.

²² Gir’n ke nè á «Nube ɔr’n tà dè Abraham’t» takul kundekêm le’n.

²³ Dé ndang kêm Magtub’t d’ede nè: «Nube ɔr tà dè Abraham’t.» Dé ndang tà nè nga d’ɔje’n dè Abraham á se kar’n lé,

²⁴ nè dé ndang tà nè d’ɔje’n dè jéi jèi ke Nube ɔr tà dè jéi’t takul kêm jéi ke j’undei dè’n è ke njè kade Kuwe-ɓee le jéi Jésu unde loo tee dann njé ke koo’t nga.

²⁵ Kuwe-ɓee le jéi Jésu nga, d’ule’n ji dooge’t d’ade tɔli nin tede ra majelége le jéi. E unde loo tee dann njé koo’t tede kade Nube ɔr’n tà dè jéi’t.