Nje Ke Rome 2 - Nouveau Testament en Gulay 2004

Nube à gangtà dè dooge’t malang se go nyan ra de, ra de

¹ I nanan ke i ndi a i gangtà dè dooge ke rang’t nga, i géa ile tà dè rai’t tɔ. Tede nyan ke rai á i gang’n tà dè de’t nè nga, i géa i njè ra nyan nè nga tɔ.

² Nube gangtà dè njé ra nyange ke majelé. Jè geri titeke gangtà le’n è se dè naje’n.

³ I ndi i gangtà dè njé ra nyange ke majelé. Nyange ke rai á i ndi a i gang’n tà dè de’t nga, i géa i njè ra nyange nè nga tɔ. Ké i gir kêmi’t ede nè tà ke Nube à gang dè de’t nga, ké à nali wa?

⁴ Ké bò kêm-maje se kêmkile se korè ke Nube orè tà’n njak ndi nginei nga, ké i an ke nyan lé wa? Bò kêm-maje le Nube ke ɔsi balang-balang le kade i tur hali nga, ké i ger lé wa?

⁵ Nè se go kêmnder lei a, se dum nan lei nga a tɔ nga, i uwe’n bò wong le Nube i ɓuku’n dèi’t i ngine’n ndɔ gangtà. Ndɔ nè nga, Nube à gangtà dè dooge’t se dè naje’n,

⁶ à uge nanan géa se go kule ra’n-ra’n.

⁷ Njé ke sangi le rai nyan ke maje se ndɔ de-ndɔ de tede le kinge’n ndubra le Nube a, riɓar a, se ndikumgajer se non a tɔ nga, Nube à ade à ndii se’n sár se non.

⁸ Nè wong se kêmkon le Nube à nder dè njé naje tàge’t se dè njé ra nyan ke se dè naje’n lé utei ngarankum tà mbeng.

⁹ Njé ra nyange ke majelé nga, nyantosowur se ɓel à rai de kade kàde de à gete get-get. Juipge kuwe nyange nè à ra de kété pa ɓita à ra njé ke ei Juipge lé ɓai.

¹⁰ Nè dooge malang ke rai nyange ke maje nga, Nube à ade de ndubra a, riɓar a, kêmlom a tɔ. Nube à ade nyange nè nga Juipge kété pa ɓita à ade njé ke ei Juipge lé ɓai.

¹¹ Kerɔte kuwe, Nube è njè ndête kum doo karé bè lé.

¹² Dooge malang ke rai majelé anje ger gute-ndu le Moise nga à tuji anje gute-ndu le Moise nga tɔ. Nè dooge malang ke rai majelé gir gute-ndu’t nga, d’ade gangtà dè de’t se go gute-ndu Moise nga tɔ.

¹³ Dooge ke Nube ɔr tà dè de’t nga, ei njé ke dé tute gute-ndu d’ade ooi se mbi de karè lé. Nè Nube ɔr tà dè dooge ke rai nyange ke gute-ndu ɔje.

¹⁴ Dooge ke ei Juipge lé nga geri gute-ndu le Moise lé. Nè né è bè géa, ei kuwe in-in se kêm de rai nyange ke gute-ndu ɔje. Loo ke ei rai titeke bè nga ɓaa, ei tɔji jè titeke awi se gute-ndu ke ɔje dè de ei kuwe tɔ.

¹⁵ Dooge nè nga tɔji jèi titeke nyan ke gute-ndu ɔje nga ei ndangi dè ɓengre de’t a, tàgir ke kêm de’t ɔrgir ke nata a tɔ. Tàgir le de ke ile tà éké ɔr tà dè de’t loo ke nange nga tɔji jèi titeke d’aw se gute-ndu ke ɔje dè de tɔ.

¹⁶ Nyange malang à tooi nata ndái-ndái kêm ndɔ ke Nube à ade Jésu-Krist à gang’n tà dè nyange ke majelé ke dooge rai se go ngein. Tà ke Maje ke m’ile mber’n nga tam bè kuwe.

Juipge ali tà tà gute-ndu’t

¹⁷ Nè i ke i ɓar rai Juip, i ke i ndune rai kàde gute-ndu’t unde’n kàdi se ri Nube;

¹⁸ i ger nyan ke kêm Nube ndige a, i ger kɔr kum nyange ke maje tede dé ndói gute-ndu d’ade i ger ɓá.

¹⁹ I an rai ke njèkɔr non njékumtɔge a, ke lookar le njé ke ndii dann tilkus’t a tɔ.

²⁰ I an rai ke njèndó nyan dooge ke ei njé nyangerge lé. I an rai ke njèndó nyan ngannge ke ndêin bè tede inge nyanger ke get se ngarankum tà ra gute-ndu’t.

²¹ A ɓaa, ké i ke njèndó nyan dooge ke rang nga, i ndó rai i kuwe nyan lé wa? I ke i ra rai ke njèkile mber kade dooge ɓogi lé nga, ké bain taɓai á i ɓoge wa?

²² I ke i tam ede nè: Doo à sang dinye ke rang lé nga, ké bain á i tel i sang dinye ke rang ɓai wa? I ke ɔr magege njêt nga, ké bain taɓai á i tel i ɓoge nyange ke kêm kei gugu magege’t nga ɓai wa?

²³ I ke njèkunde kàdi tede gute-ndu nga, ké bain á altà tà gute-ndu’t ile’n rasɔl dè Nube’t wa?

²⁴ Kerɔte kuwe, dé ndang tà’n kêm Magtub ke tò se ninn’n d’ede nè: «Tede nyanra sige ke titeke bè á dooge ke ei Juipge lé nedi ri Nube.»

²⁵ Kerɔte kuwe, ke nè á an dè gute-ndu sêw-sêw ɓaa, kuje tà mɔte è nyan ke maje. Nè ke nè á altà tà gute-ndu’t ɓaa, kuje tà mɔte lei tel è nyan ke raikarè.

²⁶ Ke nè á doo ke uje tà mɔte’n lé an dè ndukunnge le gute-ndu nga sêw-sêw ɓaa, ké Nube à mbɔje’n ke njèkuje tà mɔte lé wa?

²⁷ I i Juip ke d’uje tà mɔti kuwe. I ndi se magtub gute-ndu ke dé ndang jii’t kuwe. Nè né è bè géa, ke nè á al tà tà gute-ndu’t ɓaa, doo ke d’uje tà mɔte’n lé ke an dè gute-ndu sêw-sêw nga à gangtà dèi’t gar-gar.

²⁸ Kuje tà mɔte ke danra’t nata nga à ade doo ee’n ngarankum Juip lé. Ngarakum kuje tà mɔte nga, è kuje tà mɔte ke danra’t nata lé.

²⁹ Nè ngarankum Juip nga è Juip ke kêm doo’t kei a, ngarankum kuje tà mɔte nga è kuje tà mɔte ke dè ɓengre doo’t. Kuje tà mɔte ke dè ɓengre’t nga in ra Ndil Nube m in ra gute-ndu ke dé ndang’t nga lé. Juip ke get nè nga inge pite ra dooge’t lé nè ra Nube’t.