Nje Ke Rome 12 - Nouveau Testament en Gulay 2004

Unni ra si bere adi Nube

¹ Ngakonmge, Nube ra se jéi kêmkanm ke bò. Gir’n ke nè á m’ndeje’n sei le kade unni ra si bere adi Nube ke nyankuje-mese ke tò kumgajer ke ɔje dè Nube a, ke taa kum’n a tɔ. E ke nè á è nyan kunn ke gete ke uwe made nan se tà le Nube.

² Umi nan’t lêtêt se dooge ke ndii dè nang nè ɗarinè nga lé. Nè inyei Nube adi tel sei ke dooge ke kige a, ade ade sei tàgir ke kige a tɔ. Titeke bè á a i teri nyan ke maje ke kêm Nube ndige a, nyan ke maje ɔr njêt ke à taa kum’n ɗekm a tɔ.

³ Nube uwe se’m noje ke bò. Gir’n ke nè á m’ede’n sei karé-karé malang le kade undei kumkunju dè ra si’t ɔje dè tàgir le si. Maje kade nanan géa aw se tàgir ke ase dè tɔge kundekêm ke Nube ɔje ɗike’n ade’n nga.

⁴ J’awi se balkum ra jéige bule kêm danra jéi ke karé’t nè kuwe. Nè kule ra de tò gai-gai.

⁵ Titeke bè, jèi géa jè bulei tɔ; jè teli jèi danra ke karé bere takul kum ke j’umi nan’t bɔk se Krist nga. Bè ɓaa, jèi malang jèi balkum ra nan.

⁶ Nè nanan géa dann jéi’t aw se nyan-noje ke ɔje dè’n-dè’n se go noje ke Nube uwe se’n. Ke nè á doo karé inge nyan-noje ke ɔje dè ribe dè tà ke tà Nube’t ɓaa, maje kade ule’n dingem kêm ngakonnge’t ade ase dè tɔg kundekêm ke Nube ɔje ɗike’n ade’n nga.

⁷ Ke nè á doo karé inge nyan-noje ke ɔje dè nobo nyan njéndooge ɓaa, maje kade tɔse kum’n dè’t. Ke nè á doo karé inge nyan-noje ke ɔje dè ndó nyan dooge ɓaa, maje kade tɔse kum’n dè nyan-ndó’t.

⁸ Ke nè á doo karé inge nyan-noje ke ɔje dè ndeje madennge ɓaa, maje kade tɔse kum’n dè ndeje madennge’t. Nanan ke inge nyan-noje ke ɔje dè kade nyan dooge ɓaa, maje kade ade se kêm’n ke karé. Nanan ke inge nyan-noje ke ɔje dè kɔr non dooge ɓaa, maje kade ra se rakɔlé. Nanan ke inge nyan-noje ke ɔje dè ra kêmkanm ɓaa, maje kade ra se ranel.

⁹ Maje kade tár nan le si è ngarankum tár nan. Ɔri nyan ke majelé njêt. Nè i ligri dè nyanra ke maje’t lagr-lagr.

¹⁰ I tári nan tite ngakon nange bè se kêmnda káng. Ilei riɓar dè njé ke rang’t adi dum dè riɓar le si sei.

¹¹ Adi ra si wɔi sei lé. Nè i rai kule se rakɔlé adi Kuwe-ɓee.

¹² I rai ranel dè nyan ke sei undei kêm si tchên dè’t nga. Oréi tà si njak dann nyantosowur’t ɔji tà se Nube se ndɔge malang m ebi’t lé.

¹³ I rai se njétaakêm-Kristge dè nyange ke nal de. I pabri mbage par-par.

¹⁴ I tɔri ndu si dè njé ra kum si ndooge. I tɔri ndu si dè de’t m ɔri se de lé.

¹⁵ I rai ranel se njé ke ndii à rai ranel; i non-in se njé ke ndii à non-in.

¹⁶ Adi tàgir le si è karé. Adi ngur k’ee doo ke bò dann made sige’t ra sei pênn-pênn lé. Nè adi ngur ra kule ke pêli-pêli se ngonn koje tá ra sei. An-in ra si ke njékumkunjuge lé.

¹⁷ Ke nè á doo ra sei majelé ɓaa, i tel i ra se’n majelé gute made’t lé. I sangi rebe le ra nyan ke maje tàkum dooge’t malang.

¹⁸ I ndii se kêmlom se dooge malang; ke nè á asikum ra ɓaa, i rai.

¹⁹ Ngakonmge ke m’tár sei, i dali ban le si sei kuwe se dè ra si lé. Nè inyei loo adi Nube kuwe gangtà dè njé ra sei majelége, tede Kuwe-ɓee Nube kuwe tam kêm Magtub ke tò se ninn’n ede nè: «Dalban nga ɔje dè’m, è man kuwe á m’a kade kure nyanra nanan géa à ɔde kum’n.»

²⁰ Ke nè á ɓo ra njèban lei ɓaa, ade’n nyan use. Ke nè á kunde mann ra njèban lei ɓaa, ade’n mann an-in. Ke nè á i ra titeke bè ɓaa tò asenan se yal por ke uge um dènn’t.

²¹ Ade majelé unn banga dèi’t lé. Nè unn banga dènn’t se go nyanra ke maje.