Nje Ke Rome 10 - Nouveau Testament en Gulay 2004

¹ Ngakonmge, nyan ke m’ndinge dè ɓengrem’t nga, è le kade Juipge malang aji. M’deje Nube kade aje de ade’m.

² M’asekum tam tà nè kɔje’n dè de kuwe: Ngur kunn dè nja Nube ra de pênn-pênn kerɔte kuwe, nè rebe’n ke njai á dé ger lé.

³ Rebe ke Nube ɔr’n tà dè dooge’t nga dé ger lé. Nè dé sang le kade Nube ɔr tà dè de’t se go rebe le de ke kinge de. Gir’n ke nè á dé mbate’n rebe ke Nube ɔr’n tà dè dooge’t nga.

⁴ Krist è njè tɔl tà gute-ndu le Moise tede kade nanan ke unde kêm’n dè Jésu-Krist ɓaa, Nube à ɔr tà dènn’t.

Kaje tò tede le dooge ke undei kêm de dè Kuwe-ɓee’t

⁵ Moise ndang magtub ɔje’n dè rebe ke tà à ɔr’n dè dooge’t takul gute-ndu. E tam ede nè: «Doo ke ra nyange ke gute-ndu ɔje ade ɔr njêt ɓaa à ndi kumgajer takul gute-ndu.»

⁶ Nè an-in! tà ke Moise tam ɔje’n dè rebe ke tà à ɔr’n dè dooge’t takul kundekêm ede nè: «An! tá nè a kin tam kêmi’t kede nè: Ké nan à aw danrán le ree se Krist dè nang nè wa?»

⁷ An tá nè à kin tam kêmi’t kede nè: «Ké nan à rise kêm be ke son’n goto’t le kade Krist unde loo tee dann njé ke koo’t wa?»

⁸ Taɓai Moise tam tà ɔje’n dè rebe ke Nube ɔr’n tà dè dooge’t takul kundekêm ede nè: «Kundekêm nga è rai’t ngɔr a, è tài’t a, è dè ɓengrei’t a tɔ.»

⁹ Ke nè á tà tee tài’t ade i tam ndàt ede nè: Krist ke Nube ade unde loo tee dann njé ke koo’t nga è Kuwe-ɓee ɓaa, Nube à aji kerɔte kuwe.

¹⁰ Kunde ke j’undei ngarankêm jéi dè Nube’t á è ɔr’n tà dè jéi’t. Jè tami tà kundekêm le jéi se tà jéi ndàt á Nube aje’n jèi tɔ.

¹¹ Kerɔte kuwe, Magtub le Nube tam ede nè: «Nanan ke unde kêm’n dè Nube’t ɓaa à ndi dann rasɔl’t ndan lé.»

¹² Bè ɓaa, ɗarinè tò gai le Juipge se njé ke ei Juipge lé goto ta. Nube karé bere á è Kuwe-ɓee le de malang. Dooge malang ke ɓari ri’n nga, è uwe se de noje se nyanbawge.

¹³ Magtub ke tò se ninn’n tam ede nè: «Nanan ke ɓar ri Kuwe-ɓee ɓaa, Kuwe-ɓee à aje’n.»

¹⁴ Ke nè á doo unde kêm’n dè Kuwe-ɓee’t lé ɓaa, è à ɓar Kuwe-ɓee kade ra se’n titeke bain wa? Ke nè á doo oo tà le Kuwe-ɓee lé ɓaa, è à unde kêm’n dènn’t titeke bain wa? Ke nè á doo ile mber Tà ke Maje ade dooge lé ɓaa, ei à ooi tà le Kuwe-ɓee Nube titeke bain wa?

¹⁵ Ke nè á d’ɔr dooge d’ule de lé ɓaa, ké à ilei mber Tà ke Maje nga titeke bain wa? Magtub ke tò se ninn’n tam ede nè: «Kan njékile mber Tà ke Maje loo njiye’t, è nyan ke maje dum: nja de mong nang tchai.»

¹⁶ Nè dooge malang ke mbati taai Tà ke Maje nga, Esaie njèribe-dè-tà ke tà Nube’t ribe dè tà nè ɔje’n dè de ede nè: «Kuwe-ɓee, ké nan um kêm’n dè tà ke j’ede de nga wa?»

¹⁷ Tà ke Maje ke Krist unn ndu’n ade d’ile mber’n d’ade doo á è gir kade doo unde’n kêm’n dè Krist’t.

¹⁸ A ɓaa, ké m’a m’tam kede nè: Ndɔ ke Juipge ooi tà nè nga ndan lé wa? Ḿ-m̀, ei ooi mbak kuwe! Magtub le Nube tam ede nè: «D’oo ndu njékile mberge ke ɔje dè Tà ke Maje se loo malang dè nang nè. Mber kile le de aw sár ɔse ngei dè nang ndi dooge bere mbak.»

¹⁹ A ɓaa, ké m’a tam kede nè: Ndɔ ke Juipge geri gir tà nè nga lé wa? Ḿ-m̀, ei geri mbak kuwe! Ndɔ ke Nube ade Moise tam tà nè nga kété ede nè: «M’a m’ade jang à ra sei dè dooge ke ei girkoje dooge ke kenon-non tàkum si’t. M’a m’ade wong à ra sei dè girkoje dooge ke an-in de ke dooge ke raikarè a tɔ.

²⁰ Esaie, njèribe-dè-tà ke tà Nube’t aw sár tam ede nè: «Njé ke sangi man lé á m’ade ingei man. Njé ke deji ká’m lé á m’tee ke kum de’t pan.»

²¹ Nè Nube tam tà ɔje’n dè kosdooge ke ɓeekon ke Israel ede nè: «Se ndɔge malang, m’ule ji’m njung ke ra kosdooge ke njé dum nange se njé kute tà mbeng-ge se ndɔgé sár loo sɔlé.»