Nje Ke Philippes 1 - Nouveau Testament en Gulay 2004

Lapya ke Paul ra de

¹ Man Paul se Timothée, ɓer kulege le Jésu-Krist. Jè ndang magtub nè j’ade njé ke tooi se ninn de ke umi nan’t bɔk se Jésu-Krist. Jè ndang magtub nè nga j’ade njékɔr non dege se njékan dè nyange le njékebe nange le Nube ke ndii kem̂ ɓee-bò ke Philippes tɔ.

² Maje kade kem̂noje se kem̂lom ke in ra Bɔjéi Nube’t se ra Kuwe-ɓee Jésu-Krist nain se si.

Paul ɔje tà se Nube tede le njétaakem̂-Kristge ke kem̂ ɓee-bò ke Philippes

³ M’ra Nube oiyo dɔ-dɔ loo ke kem̂’m olé dè si’t.

⁴ Se ndɔge-ndɔge loo ke m’ɔje tà se Nube le’m tede le si malang nga, m’ra se ranel kuwe,

⁵ tede unn gir kem̂ ndɔ ke desêin sár tee ɓila, sei i rai se’m dè kile mber Tà ke Maje’t.

⁶ Man m’ger è nè mbak: Nube ke unn gir ra kule ke maje kem̂ si’t nga à ra kɔr son’n njêt sár ndɔ tel ree le Jésu-Krist.

⁷ Gir ke m’gir dè si’t malang bè nga, è loon’t kuwe. M’ndige sei dè ɓengrem’t. Kété ndɔ ke m’nain se si ɓai nga, m’an-in ngang Tà ke Maje gar-gar m’ade tò loo toon’t njáng. Ɗarinè ke m’tò dangai’t nè nga géa, sei malang oréi se’m nan dè noje ke Nube uwe sem’t nga.

⁸ Oiyo, Nube an a, ger a, titeke m’tár sei malang dè ɓengrem’t se kem̂nda káng titeke Jésu-Krist tár’n jéi bè tɔ.

⁹ An-in! nyan ke m’kɔ Nube tede le si á nè: Maje kade tár nan le si in dè made’t ke kété-kété a, ade kum si gang dè ngarankum nyanger’t a tɔ.

¹⁰ Titeke bè á a i geri loo kɔr kum nyan ke maje dum tede kade ndɔ tel ree le Jésu-Krist ɓaa, sei dooge ke unji nyang-nyang. Doo karé bè géa à kile tà dè si’t lé.

¹¹ Jésu-Krist à ra se si kade i rai nyange ke se dè naje’n le kade d’ile’n riɓar dè Nube’t a, dé ɗɔi’n a tɔ.

Ndikumgajer le jéi è Jésu-Krist

¹² Ngakonmge, m’ndige le kade i geri titeke nyan ke tee dèm’t nga ade Tà ke Maje aw kum’n ke kété-kété m nda nang lé.

¹³ Njé ke kem̂ kei le ngar ke bò se dooge ke rang malang nga, doo karé ke nal ger titeke è tede tà le Krist á m’ndii’n se sulge jim’t nè nga goto.

¹⁴ Sulge ke m’ndii’n jim’t nga ule dingem kem̂ njétaakem̂-Kristge ke nange ade ilei mber Tà le Nube se kem̂nda anje ɓel nyan karé.

¹⁵ Kerɔte kuwe, loo naje’n goto, dooge ke nange dann de’t ilei mber Tà le Krist se kem̂kein a, se ra jang a tɔ. Nè njé ke karége ɓaa ilei mber se tàgir ke maje.

¹⁶ Njé ke ilei mber se tàgir ke maje nga, m’ee kotár le de tede geri titeke m’ndi loo ke nè’t m’a m’ɔde nan kan-in ngang Tà ke Maje nga garar-garar ɓai.

¹⁷ Njé ke ilei mber le Krist se ra jang nga ilei mber se kem̂nda káng lé. Ndii’m se sulge jim’t nè nga, d’an ke nyantosowur lé ɓai á dé gir le kile made dè’t kade’m.

¹⁸ Ké usu’m ri wa? Ke nè á d’ede’n gos éké dé tam’n ngarankum tà géa, dé malang d’ile mber tà le Krist. M’ra ranel dè mber’t le Krist ke d’ile. M’a m’ra ranel kum’m ke kété-kété ɓai.

¹⁹ M’ger titeke nyan nè nga malang à tel gir kaje’m se go tà ke a ɔji se Nube a, se ra ke Ndil Jésu-Krist à ra se’m a tɔ.

²⁰ Se go nyan ke m’ndi m’ngine tchên a, ke m’unde kem̂’m dè’t tchên a tɔ nga, nyan karé ke à ile rasɔl dèm’t goto. Nè ɗarinè, m’nda kem̂’m káng se ndɔge malang titeke kété, kade né è kaje éké yo géa, danra’m à ile riɓar dè Krist’t.

²¹ Oiyo le’m man ɓaa, ndikumgajer è Krist; yo è nyankinge le’m. Tede ke nè á m’wei ɓaa, m’a m’an kum’n è Krist nga kuwe mbain.

²² Nè ke nè á ndii’m kumgajer dè nang nè à ade m’a m’ra nyan ke soo’t ɓai ɓaa, m’ger nyan ke kum ra get lé tede kem̂’m naje nan tà.

²³ Nyange ɔsi kàde’m loo joo, ngur kin kaw ndi se Krist ra’m pênn-pênn. E á m’an ke nyan ke à too’m soo’t ngain.

²⁴ Nè nyan ke sei awi ndoo’n ngain ɗarinè ɓaa, è ndii’m kumgajer dè nang nè.

²⁵ M’ger kem̂’t mbak titeke m’a m’ndi se si, m’a m’ra ɓee se si malang dè nang nè mbɔr ɓai, tede le kade awi kum si ke kété-kété a, le kade ingei ranel dè kundekem̂’t le si a tɔ.

²⁶ Titeke bè á ndɔ ke m’a m’tee dangai’t le tel kaw ra si’t ɓaa, dè si à in-in’n tchakm takul kum nan’t bɔk le si se Jésu-Krist nga.

²⁷ Nyan karé ɓaa, adi pa njiye si uwe made nan se Tà ke Maje le Krist. Titeke bè á, né m’aw m’an sei, éké m’aw lé géa, m’a m’oo titeke sei umi tàgir le si nan’t bɔk a, undei tɔge si nan’t i rɔi se kem̂ karé. I rai titebè tede kade dooge ke rang undei kem̂ de dè Tà ke Maje’t nga.

²⁸ Inyei loo adi njébange le si umi ɓel dè si’t ɔje dè nyan karé lé. Mbate Tà ke Maje le de nga tɔje jéi titeke dé dooge ke tuju. Nè sei ɓaa, nda njáng dè nja’t le si tɔje titeke sei ingei kaje ke in ra Nube’t nga ɓá ta.

²⁹ Tede Nube uwe se si noje le kade undei kem̂ si dè Krist’t á go karé lé, nè le kade ingei nyankem̂konge tede le Krist.

³⁰ I rai rɔ titeke ndɔ ke m’rɔ’n kété made an-in. Rɔ ke m’ndi m’rɔ ke sei ooi ser’n ɗarinè nga, m’ebe’t lé bai.