1 Timothee 2 - Nouveau Testament en Gulay 2004

Ɔji tà se Nube tede dooge malang

¹ Nyan ke kété non nyange’t malang ɓaa, m’ndeje sei le kade i deji nyange Nube ɔji se’n tà i kati nin kàt-kàt, i rai nin oiyo tede dooge malang a tɔ.

² Ɔji tà se Nube tede ngar-ɓeege, tede le njé ke tɔge konɓee è ji de’t tede kade jè ndii jêke^ se kem̂lom dè kile koje dè Nube’t. Titeke bè á j’à ra’n nyange gai-gai ke maje.

³ E á è nyan ke maje ke taa kum Nube njèkaje jéi

⁴ ke ndige le kade dooge malang ingei kaje a, le kade kum de gang dè ngarankum tà’t maje a tɔ.

⁵ Nube è karé bere luk-luk, njè nda dann Nube’t se dooge géa è karé bere luk-luk a tɔ. Doo nè nga è Jésu-Krist.

⁶ Jésu-Krist inye ra’n è kuwe ade yo uge’n dè dooge malang. E ke nè á è tà ke è ɔrgo kété kem̂ ndɔn’t le’n nga.

⁷ E tede kɔrgo tà nè á Nube ɔr’m unde’m ke njèkile mber a, ke njèkawkule a tɔ. Man nga Nube ɔr’m unde’m ke njèndó nyan dooge ke ei Juipge lé kade undei kem̂ de dènn’t a, dè ngarankum tà’t a tɔ.

⁸ M’lanm lé; è Nube kuwe ɔr’m unde’m ke njèkile mber le’n. Man m’ndige le kade dingemge ɔyi ji de ke unju nyang-nyang ke danrán ɔji tà se Nube se loo malang se kem̂nda káng anje ra wong se naje tà.

Nyan ke kum ra le dinyege ke njétaakem̂-Kristge

⁹ Dinyege géa, m’ndige le kade ulei kubu ke karè ke tuwe de ɗêw se kumkunju’n. Maje kade ebi ra de kuwe dè de se nyange ke mbirin-mbin éké dè tule mede-mbi ke dé ra se nar-ɔr mbi de’t. Maje kade ebi ra de dè tule kubuge ke nar de ur kugu-kugu a tɔ.

¹⁰ Nè maje kade nyanrage ke maje á ei kubu kule ra’t le de. E ke nè á è nyan ke tuwe dinyege ke njétaakem̂-Kristge nga ɗêw.

¹¹ Maje kade dinye ndi loo ndó nyan’t tà’n mundu se ngonn koje ke deri.

¹² Man m’inye loo m’ade dinye kade ndó nyan dingem éké le kade on dè’n lé a tɔ. Nè maje kade dinye ndi tà’n mundu.

¹³ Tede Nube unde Adam kété pa ɓita unde Eve ute’n go’n ɓai.

¹⁴ E Adam á ade dé sú’n lé, nè è dinye á ade dé sú’n d’ade al’n tà tà Nube’t.

¹⁵ Nè né è bè géa, d’a d’ade dinye à aje loo koje ngannge’t ke nè á è nda njáng dè kundekem̂ se dè tár nan’t se dè ra ke unju nyang-nyang a, se dè nal ti ra’t a tɔ.