Sâint Makyu 22 - L' Sâint Évàngile Siévant Sâint Makyu 1863 (Georges Métivier)

CHAP. XXII

¹ Jésus, coumme i pâlait acouore en paraboles, leû dît:

² L' royaûme des ciux r'ssemblle à un roué qui, quànd i voulait faire les neuches de sen fiss,

³ Envyit ses serviteurs pour app'laïr ès neuches chaeux qui' étaient conviaïs; mais i r'fûsirent d' ŷ v'nìr.

⁴ Il envyit acouore d' aûtes serviteurs, ôve ordre de dire de sa part à chaeux qui' étaient conviaïs: J' ai préparaï men dînaïr, j' ai fait tuaïr mes bœufs et tout chu qu' j' avais fait engraissier; tout est prêt: v'naïz ès neuches.

⁵ Mais iaeux, n' s' en mettànt miette en pâine, s' en allirent, l' ùn à sa maîson du pâis et l' aûtre à sen négoce:

⁶ L's aûtĕrs mirent leux mâins sus ses serviteurs, et les tuirent, quànd i leû‐s‐aeurent fait bien des vìllanies.

⁷ Quànd le roué ouit chun'na, i s' mît en colére; et quànd il aeut envyaï sĕs armâies, i mît à mort ches meurtriers‐là et i brûlit leû vìlle.

⁸ La‐d'ssus i dît à ses serviteurs: L' festìn des neuches est tout prêt; mais chaeux qu' ŷ avaient étaï conviaïs, n' en ont pas étaï dignes.

⁹ Allaïz don dans les carrefouars, et conviaïz ès neuches tous chaeux qu' ous trouv'raïz.

¹⁰ Ses serviteurs, quànd i s' en furent allaïs là‐d'ssus par les rues, assèmbllirent tous chaeux qu' i trouvirent, bouans et maûvais; et l' endrét des neuches s' èmpllisit d' gens qui s' mirent à tablle.

¹¹ L' roué èntrit après chun'na pour vée chaeux qui' étaient à tablle; et coumme i vît ùn houmme qui n' était pas vétu d' la robe de neuches,

¹² I lli dît: M'n ami, coumme est qu' ous êtes èntraï ichìn sàns la robe de neuches? Et ch't hoummelà n' dît mot.

¹³ Là‐d'ssus le roué dît à ses gens: Amarraïz‐li les mâins et les pids; et houlaïz‐lé dans les ténébres de d'hors: ch' est là qu' ill y' a des plleurs et des grìnch'ments d' dents.

¹⁴ Car ill y' en a ùn grànd nombre d' app'laïs, mais d' élus pas gràndment.

¹⁵ Là‐d'ssus les pharisians, quànd i s' furent r'tiraïs, tìnrent conseil pour le surprendĕr dans ses paroles.

¹⁶ I lli envyirent a' ceulle fìn leux disciplles ôve lĕs hérogyans, et i lli dirent: Maître, j' savons qu' ous êtes véritablle, et qu' ous ensigniz la vouaie de Gyu dans la véritaï, sàns aûcùn égard à qui qu' che sét; parç qu' ous n' considéraïz pas la persounne dans l's hoummes:

¹⁷ Dites‐nous don votre avis sus chun'chìn: Nous est‐i libre d' paiyer l' tribut à Cêsar, ou de n' pas l' paiyer?

¹⁸ Mais Jésus, qui counnîssait leû malice, leû dît. Hypocrites, pourqui' est qu' ous m' tèntaïz?

¹⁹ Mourtraïz‐mé la piéche d' argent qu' nou dounne pour la taille. Et coumme i lli aeurent offert ùn digner,

²⁰ Jésus leû dît: De qui est ch't image et ch't écriture‐ichìn?

²¹ D' Cêsar, c' firent‐i. Là‐d'ssus Jésus leû répounit: Rèndaïz don à Cêsar chu qui' est à Cêsar, et à Gyu chu qui' est à Gyu.

²² Quànd i l' aeurent oui pâlaïr d' la sorte, i furent ravis d' sa réponse; et i l' lâquirent là, et s' en allirent.

²³ Chu jour‐là les saducéians, qui nient la résurrection, vìnrent le trouvaïr, et lli propôsirent une queskyon,

²⁴ Et i lli dirent: Maître, Moïse a ordounnaï qu' si quiquiùn mouarait sàns éfànts, sen frére marierait sa fâme, et suscit'rait d's éfànts à sen frére mort.

²⁵ Ho ill y' avait parmi nous sépt fréres, l' prumier des quaïs a mariaï une fâme, et est mort; et coumme i n' a pas ieue d' éfànts, il a laissi sa fâme à sen frére.

²⁶ La même chôse est av'nue au daeuxiême, au trésiême, et à tous l's aûtres, jusqu' au sepkyême.

²⁷ A la fìn chutte fâme‐là étout est morte ossìn après tous iaeux.

²⁸ Quànd don viendra la résurrection, du quaï d' ches sépt‐là s'ra‐t‐alle fâme, pisqu' i l' ont tous ieue?

²⁹ Jésus leû répounit: Vous êtes dans l' erreur, parç qu' ous n' compĕrnaïz pas l's écritures, ni l' pouvoir de Gyu.

³⁰ Car après la résurrection l's hoummes n' airont pouìnt d' fâmes, ni les fâmes d' hoummes; mais i s'ront coumme lĕs ànges de Gyu dans l' cieil.

³¹ Et pour chu qui' est d' la résurrection des morts, est‐che qu' ous n' avaïz pouìnt llésu ches paroles‐ichìn que Gyu vous a dites:

³² Je sis l' Gyu d' Abĕrham, l' Gyu d' Isas, et l' Gyu d' Jâcob? Ho Gyu n' est pouìnt l' Gyu des morts, mais des vivànts.

³³ Et l' peuplle, quànd i ouit chun'chìn, était ravi d' sa doctrine.

³⁴ Mais les pharisians, quànd i ouirent qu' il avait frumaï la bouche ès saducéians, s' assèmbllirent;

³⁵ Et iùn d' aeux, qui' était docteur de la loué, vìnt lli faire chutte queskyon‐ichìn pour le tèntaïr:

³⁶ Maître, qui' est qui' est l' grànd c'màndement d' la loué?

³⁷ Jésus lli répounit: Vous aïmraïz l' Signeur vote Gyu de tout vote coeur, et de toute votre âme, et de tout votre esprit.

³⁸ Ch' est là l' pus grànd et l' prumier c'màndement.

³⁹ Et v'chìn l' daeuxiême qui r'semblle à ch'tin'na: Vous aïmraïz vote pĕrchaïn coumme vous‐même.

⁴⁰ Toute la loué et les prophétes sont cont'nus dans ches daeux c'màndements‐là.

⁴¹ Ho quànd les pharisians s' furent assèmbllaïs, Jésus leû fit chutte demànde‐ichìn,

⁴² Et leû dît: Qui' est qu' ous pensaïz du Christ? De qui est‐i fiss? I lli répounirent: De Dâvi.

⁴³ Et coumme est‐che don, leû dît‐i, qu' Dâvi l' appelle en esprit sen Signeur par ches paroles‐ichìn:

⁴⁴ L' Signeur a dit à men Signeur: Assiévous à ma dêtre, jusqu' à tànt qu' j' aie mis vos enn'mis pour le scabé d'vos pids?

⁴⁵ Si don Dâvi l' appelle sen Signeur, coumme est‐che qu' il est sen Fiss?

⁴⁶ Fis d' âme ne paeut lli répondre ùn seul mot: et d'pîs chu jour‐là persounne n' ôsit lli faire des queskyons.