Salmos 8 - Tupàn zeꞌeg

Tupàn ikàg wera'u haw, teko wakatu haw no

Zegar haw Tawi hemiapo kwer

¹ O Tupàn Tuweharupi Wiko Ma'e, Urezar ne. Teko ywy nànànar wexak nehua'u haw wà. Nekatu haw imume'u haw uhem ywak rehe.

² Kwarearer uzegar nehua'u haw rehe wà. Te kwarera'i uzegar hehe wà no. Erezapo tàpuztàtà nezepyro kar pà neàmàtyry'ymar wanuwi ne, Eremumaw nerehe ipureityk wer ma'e ne.

³ Ame'e ywak neremiapo kwer rehe. Ame'e zahy ywak rehe neremimupyta kwer rehe. Ame'e zahytata ywak rehe Neremimupyta kwer wanehe. Wanehe heme'e mehe aze'eg nezewe hezeupe.

⁴ Màràzàwe tuwe nema'enukwaw teko wanehe. Na'ikàg kwaw wà. Màràzàwe tuwe umàno ma'e ràm wanehe erezekaiw.

⁵ Nezewe rehe we erezapo teko ikàg ma'e romo ne wà. Xo ne zo nekàg wera'u teko wanuwi ne. Kàgaw eremono teko wanupe. Nuzawy kwaw tuwihawete wà.

⁶ Teko eremuigo kar ma'e neremiapo kwer paw wazar romo ne wà. Ma'e paw wanuwi ikàg wera'u wà.

⁷ Wiko àràpuhàràn wazar romo wà no. Wiko tapi'ak wazar romo wà. Wiko miar wazar romo wà no.

⁸ Wiko wiràmiri wazar romo wà. Wiko pira wazar romo wà no. Wiko yryhu pupe har wazar romo paw rupi wà no.

⁹ O Tupàn Tuweharupi Wiko Ma'e, urezar, Teko ywy nànànar wexak nehua'u haw wà.