Salmos 54 - Tupàn zeꞌeg

Tupàn pe upytywà haw henoz taw

Zegar haw Tawi hemiapo kwer

¹ O Tupàn, hepyro pe nekàgaw pupe nehe. Hemunyryk kar pe katu 'ymaw wi nekàgaw pupe nehe.

² Einu, o Tupàn, newe heze'egaw nehe. Ezeapyaka katu heze'eg rehe nehe.

³ Ta'e amo wanuwi wiko wera'u ma'e uhem wà waiko heàmàtyry'ym pà a'e wà xe. Ipuruzukaiw ma'e ipuruzuka wer herehe wà. A'e teko nuzekaiw kwaw Tupàn rehe wà.

⁴ Akwaw Tupàn hepytywà har romo heko haw ihe. Heàmàtyry'ymar waneitykar romo heko haw akwaw no.

⁵ Tuwe Tupàn umuzewyr kar heàmàtyry'ymar wakatu 'ymaw a'e nehe, wakutyr a'e nehe. Tupàn nutyryk kwaw wemiaihu wanuwi. A'e rupi umumaw putar heàmàtyry'ymar a'e wà nehe.

⁶ O Tupàn Tuweharupi Wiko Ma'e. Azuka kar putar ma'ea'yr neruwa rupi ihe wà nehe, ta'e heporomono wer wanehe newe ihe xe. Amume'u putar nekatu haw nehe, ta'e nekatuahy ne xe.

⁷ Erezo'ok ma'erahy heremipuraraw paw ihewi. Aexak heàmàtyry'ymar waneityk awer no.