Salmos 52 - Tupàn zeꞌeg

Tupàn ikatu haw imume'u haw

Zegar haw Tawi hemiapo kwer

¹ Awa ikàg ma'e ne. Màràzàwe tuwe eremume'u nekatu 'ymaw amo wanupe ne. — Hekatu 'ymaw ipuràg ihewe, ere wanupe. Tupàn ipuruamutar haw nupaw pixik kwaw nehe.

² Eremume'u amogwer teko wamumaw pàwàm iko nezeupe. Neapeku nuzawy kwaw takihe haime katu ma'e purukixi ma'e a'e.

³ Ikatu 'ymaw ikatu wera'u newe ikatu haw wi a'e. Temu'emaw ikatu wera'u newe ze'eg azeharomoete har wi a'e.

⁴ Hemu'em ma'e romo ereiko. Neze'eg nuzawy kwaw takihe. Erekutuk teko ne wà. Wakutukaw ikatu newe.

⁵ A'e rupi Tupàn nemumaw putar azeharomoete a'e nehe. Nepyhyk putar nehe, neràpuz nereko haw wi nereityk pà nehe. Tupàn nezo'ok putar ywy wikuwe ma'e hereko har wi nehe.

⁶ Teko Tupàn heruzar har wexak putar nezo'okaw a'e wà nehe. A'e rupi ukyze putar wà nehe. Upuka putar nerehe wà nehe, nerehe uze'eg pà wà nehe.

⁷ — Peme'e ko awa rehe nehe. — Hepyro pe nehe, ni'i kwaw Tupàn pe a'e. Uzeruzar wemetarer uhua'u ma'e rehe uma'e tetea'u rehe. Wekar uzepyro àwàm ukatu 'ymaw pupe, i'i putar nerehe wà nehe.

⁸ Ihe aiko uri 'yw ikyr katu ma'e ài ihe. Herezuz tekoko Tupàn hàpuz huwake. Tuweharupi azeruzar ipuruamutar haw rehe hepytu'u 'ym pà.

⁹ O Tupàn, tuweharupi amume'u putar nekatu haw ihe nehe, ta'e neremiapo kwer ikatu a'e xe. Neremiaihu nerehe uzeruzar ire upytu'u 'ym ma'e wainuinuromo amume'u putar nekatu haw ihe nehe.