Salmos 47 - Tupàn zeꞌeg

Tupàn wiko ywy nànànar waneruze'egar romo

Zegar haw Kora wanemiapo kwer

¹ Pezepopetek penurywete romo nehe, teko paw wà. Pemuzàg ikatu haw rehe zegar haw Tupàn pe wahyhaw rupi nehe.

² Tuwe teko ukyze Tupàn Tuweharupi Wiko Ma'e ywate wera'u har wi a'e wà nehe. Wiko tuwihawete uhua'u ma'e romo a'e, ywy nànànar waneruze'egar romo a'e.

³ Tupàn weityk kar teko amo ywy rehe har zanewe a'e wà. Weruze'eg kar teko ywy nànànar zanewe wà no.

⁴ Wexaexak ywy zanereko haw zanewe a'e. Ikatuahy a'e ywy hemiaihu wanupe, Hemiamutar katu wanupe.

⁵ Tupàn uzeupir oho wenaw pe. Izeupir mehe teko uhapukaz urywete romo wà. Upy uxi'àm oho urywete haw rehe wà no.

⁶ Pemuzàg zegar haw Tupàn ikatu haw rehe nehe. Pemuzàg zegar haw Zaneruwihawete pe nehe.

⁷ Pemume'u Tupàn ikatu haw pezegar pà nehe, Ta'e wiko teko ywy rehe har paw wanuwihawete romo a'e xe.

⁸ Wapyk Tupàn wenaw ikatu ma'e rehe a'e. Wiko teko paw wanuwihaw romo.

⁹ Teko wanuwihaw uzemono'og wà, Àmàrààw izar hemiaihu wainuinuromo wà. Tupàn wiko tuwihawete wakàgaw ywy rehe har paw wazar romo a'e. Wiko ma'e paw teko paw wazar romo no.