Salmos 130 - Tupàn zeꞌeg

Aenoz hepytywà àwàm Tupàn pe ihe

¹ O Tupàn Tuweharupi Wiko Ma'e, Ma'erahy iaiw ma'e ipuraraw mehe uruenoz ihe.

² Herenu pe newe heze'eg mehe wahy haw rupi nehe, o hezar. Herenu pe hepytywà àwàm newe hereminoz nehe.

³ Aze eremuapyk ureremiapo kwer ikatu 'ym ma'e pape rehe, Mo upuner nezepyk àwàm wi uhemaw rehe wà nehe.

⁴ Ne eremunàn ureremiapo kwer ikatu 'ym ma'e ne. A'e rupi urukyze newi.

⁵ Àrogatu hepytywà àwàm iteko Tupàn Tuweharupi Wiko Ma'e henataromo ihe. Azeruzar ize'eg rehe.

⁶ Tawhu rehe uzekaiw ma'e zauxiapekwer wàro iku'emaw wà. Àro wera'u hezar ihe. Wàro kwarahy ihemaw wà. Àro wera'u hezar ihe.

⁷ Teko Izaew izuapyapyr wà, pezeruzar Tupàn Tuweharupi Wiko Ma'e rehe nehe, Ta'e nupytu'u kwaw teko wamutar katu re a'e xe. Tuweharupi ipurupyro wer purehe.

⁸ Upyro putar wemiaihu Izaew a'e wà nehe, Wapyro pà wanemiapo kwer ikatu 'ym ma'e wi a'e wà nehe.