Salmos 127 - Tupàn zeꞌeg

Tupàn omono uze'egatu tàpuz me har wanehe

¹ Aze Tupàn Tuweharupi Wiko Ma'e nuzapo kwaw tàpuz, Iapo har uma'ereko e iapo mehe wà. Aze Tuweharupi Wiko Ma'e nuzekaiw kwaw tawhu rehe, Zauxiapekwer ume'e e hehe uzekaiw mehe wà.

² Aze amo uma'ereko tetea'u wemi'u ràm imono'og pà, Aze upu'àm izi'itahy, aze u'aw wi oho xo pyaze mehe, uma'ereko e a'e. Ta'e Tupàn omono temi'u wemiamutar katu wanupe a'e xe. Te waker mehe Tupàn uzapo ikatu ma'e wemiaihu pe.

³ Zanera'yr a'e wà, wiko Tupàn Tuweharupi Wiko Ma'e hemimur kwer romo a'e wà. Ze'egatu haw romo wanekon wà.

⁴ Aze ta'yr uzexak kar awa pe ipyahu mehe we wà, A'e ta'yr nuzawy kwaw u'yw zauxiapekwer ipo pe har wà.

⁵ Hurywete awa agwer u'yw tetea'u wanereko har a'e. Iàmàtyry'ymar nuweityk kwaw wà nehe, Tuwihaw wanenataromo waneko mehe wà nehe.