ZACARÍAS 9 - Biblia Guarani Tumpa Iñee

Israel iyɨvɨrigua tëta guasu reta oiporara vae

¹ YandeYa iñee oñemoërakua ɨvɨ Hadrac kotɨ jare Damasco kotɨ: “Echa yandeYa reño omaeta kuimbae reta jare opaete Israel iñemuña pegua.

² Jaeramiño vi Hamat; Tiro jare Sidón yepe tëi yarakuaa yae.

³ Tiro omopüa ikësea jëguambae, jare omboatɨ jeta korepoti ɨvɨkúi rami jare oro tuyuapo tape rupigua rami.

⁴ Mase, ko yandeYa omombaraveteta, jare imbaepuere yae vae omokañɨta ɨguasu pe jare jae okañɨteita tata pe.

⁵ Oechata tëta Ascalón jare okɨɨyeta. Gaza oiporara yaeta vi, jökoraiño vi Ecrón echa oyerovia jese vae okañɨteita jare ¡omanota mburuvicha guasu Gaza pegua, tëta Ascalón opɨtata ipombae!

⁶ Oikota Asdod pe metei ketɨgua, amboapɨta filisteo reta ipɨa pochɨ vae.

⁷ Iyuru güi aekɨta soo jugüɨ reve jou vae jare soo mbaetɨta tëi jou vae, jare chugüi jembɨregüe opɨtata Tumpa peguarä, jare sundaro ruvicha ramita Judá pe jare Ecrón, Jebuseo ramita.

⁸ Jare che aïndaivita aepɨ vaerä chembae oipotagüe oasa koropi vae. Jasɨ katu oporogüɨreko vae ngaraa ma oporogüɨrekoasɨ katu, echa añave che ayangarekota jese.”

Mburuvicha guasu Sión peguarä vae

⁹ ¡Eyerovia yae tuicha tëta Sión! ¡Eyerovia esapúkai reve tëta Jerusalén! Mase, ko nderuvicha guasu outa ndekotɨ, jupi vae jare oporoepɨ vae, oñemomichi vae, opo ou metei mburika kuimbae taɨrusu vae re, mburikamí imembɨ re.

¹⁰ Jae amboaita Efraín ikäretou reta, jare kavayu reta Jerusalén pegua, jare güɨrapa reta ñeraro pegua opata omopë; jare imiarita mbɨakatu re opaete tëtaguasu reta pe, jare opaete oyeokuaita chupe, ɨguasu jembeɨ güive ïru ɨguasu jembeɨ kotɨ, jare ɨ̈aka Éufrates güive ojoita ɨvɨ iyapɨ re oya.

Israel oñemopüa pɨau ye vae regua

¹¹ YandeYa jei körai: “Nde Jerusalén tugüɨ morogüɨrökuavee päve pegua pe reyemboasaukata, che ko anoeta tembipɨɨ reta ɨrɨru güi.

¹² ¡Tembipɨɨ reta peyerova ye peñepɨ̈roa pe, peäro peiko vae! Añave amombeu peve, pomopüa pɨauta oasa ye tenonde peiko vae güi.

¹³ Echa Judá amotäta ma cheyeupe güɨrapa oñemoata kavi rami, jare añono ndeve Efraín uvɨ rami. Jare Sión pegua reta amopüata, Grecia pegua reta kotɨ, jare roapota jëia yae vae ikɨsepuku rami.”

¹⁴ YandeYa oyekuaaukata jese reta, imbae vae reta rupi juvɨ oëta ama-vera rami. YandeYa Tumpa omoñeeta mimbɨguasu, jare ojota ɨvɨtuai arayevɨ pegua ndive.

¹⁵ YandeYa Imbaepuere yae ete vae oyangarekota imbae vae re Jae reta opɨ̈rota ita tamamboka pegua re. Omboaita jovaicho jare oɨuta jugüɨ re vino re rami jare mbaerɨru tɨnɨe rami jɨ̈vɨatata, ani mɨmba oyeyuka oyeapɨ jese vae regua guakarätiecha vae rami.

¹⁶ Jókuae ara yandeYa Tumpa güɨroasayepeta imbae vae, mɨmba iyangarekoa jɨmba güɨroasayepe rami. Jare ita jembipe vae äka-regua rami jembipeta iɨvɨ pe.

¹⁷ Echa ikavi jare ipöra yaeta iɨvɨ. Trigo jeta vae ombovɨakatuta taɨrusu vae reta, jare uva tɨɨgüe kuñatai reta.