ZACARÍAS 11 - Biblia Guarani Tumpa Iñee

¹ ¡Líbano, eipea neröke, jare ndeɨvɨra ɨ̈vɨrare reta tomokañɨtei tata!

² ¡Ɨvɨra pino jee vae, peyaeo, echa ɨ̈vɨrare ikavi yae vae oyemboai ma! ¡Ɨvɨra reta encina jee vae Basán pegua, peräse peyaeo, echa kaa tëɨ yae vae oyemboai!

³ Maangarekoa reta, peräse peyaeo, echa oasa ete ikavi kapii vae oyemboai. Oyeendu yaguapope ndeigüe iñee, echa Jordán pegua kaa tëɨ yae vae oyemboai.

Maangarekoa reta iyakɨ vae

⁴ Körai jei cheYa Tumpa: “Eyangareko vecha reta oyereraja mbaeyukaa pe vae re,

⁵ ogua vae reta oyuka oyemboekombae reve; jare omee vae reta jei: ‘¡Yasoropai cheYa, echa aikokatu ma!’ Iyangarekoa reta ave mbaetɨ mboroparareko güɨnoi jese.

⁶ Jáeramo, ngaraa ye ma aiparareko kuae ɨvɨ pegua reta jei yandeYa: Echa ko che amee kuimbae reta iñeïru ipo pe, jare juvicha guasu ipo pe; omboai retata ɨvɨ, jare che ngaraa aepɨ chugüi reta.”

⁷ Jare ayangareko vecha reta oyereraja mbaeyukaa pe vae re, kuae ko jae, paravete vae reta re. Aipɨɨ mókoi popoka: Metei ambojee “Ikavi vae” jare ïru “Maapɨtía”, jare ayangareko vecha reta re.

⁸ Jare metei yasɨ pe mboapɨ maangarekoa amboai, echa mbaetɨ ma chepɨaguasu ikotɨ reta, chereröɨro reta jeko pegua.

⁹ Jare jae chupe reta: “¡Mbaetɨta ma aiko peangarekoarä! ¡Omanota vae, tomano! ¡Okañɨta vae, tokañɨ! ¡Jembɨregüe, toyou!”

¹⁰ Jayave aipɨɨ popoka “Ikavi vae” pe ambojee vae, jare aakɨo; jökorai amboai vaerä morogüɨrökuavee päve opaete vae ndive ayapo vae.

¹¹ Jare jókuae ara oyemboai, jökorai paravete vae reta omae cheré vae ou oikuaa yandeYa iñee ko.

¹² Jare jae chupe reta: “Jaekavi peve yave, pemboepɨ cheve cheparavɨkɨ jepɨ; jare mbaetɨ yave peeya jökoraiño.” Jare ojäa reta cheparavɨkɨ regua, omboepɨ reta cheve treinta reare korepoti pegua.

¹³ YandeYa jei cheve: “Eñono korepoti rɨru tupao pegua pe jókuae korepoti, chemboepɨ kavi pɨpe vae.” Jare aipɨɨ jókuae treinta reare korepoti pegua añono korepoti rɨru tupao pegua pe.

¹⁴ Aakɨo ye ïru popoka “Maapɨtía” pe ambojee vae, jökorai amboai vaerä Judá jare Israel güi metei rami yogüɨreko vae.

¹⁵ YandeYa jei cheve: “Eyeapo maangarekoa iyakɨ vae rami.

¹⁶ Echa che amopüa kuae ɨvɨ pe metei omaangareko vae mbaetɨta oeka okañɨgüe, mbaetɨta vi oeka ndeigüe ani oipoano ipere vae, ikangɨgüe ave mbaetɨta ovoɨ güɨraja, jaeño jouta ikɨra vae isoo jare ipɨ̈sagüe ave mbaetɨta oeya.

¹⁷ ¡Paravete maangarekoa iyakɨ vae, oeya mɨmba vae! ¡Kɨsepuku toekɨ iyɨva jare jesa iyakatu kotɨgua! ¡Totini iyɨva jare topɨta jesambae!”