Tito 3 - Biblia Guarani Tumpa Iñee

Tumpa yandembojupi ipɨakavi rupi

¹ Emomaendúa oyeapɨsaka nderé vae reta yogüɨreko vaerä mburuvicha reta jare mbaepuere güɨnoi vae reta jeia re, jare tikɨ̈reɨ ngatu avei reta oyapo vaerä mbae ikavi vae.

² Agüɨye tei ikavimbae vae oipotagüe vae kotɨ, agüɨye tijovaicho pota, ërei toporoaɨu, toñemomichi opaete vae ndive.

³ Echa tenonde yave yandearakuaambaese yepi, yandepɨapochɨ, yanderopa, yaikose yanderete jemimbota reta reño, yaiko ikavimbae rupi, yandepɨakatúä,

⁴ ërei oyekuaa yave Tumpa iporoparareko jare iporoaɨu opaete vae pe,

⁵ yandemboasa, mbaetɨ jupi vae yayapo ramo, jaeño yandemboasa iporoparareko rupi, yandeyoe ɨ pe, ombopɨau yanderekove Espíritu Santo rupi.

⁶ Echa Tumpa ñanemotɨnɨe Espíritu Santo pe, Yandemboasa vae Jesucristo rupi.

⁷ Jökorai Tumpa oyapo ñanoi vaerä tekove opambae vae, jare jókuae ñaäro ñaï yayerovia reve. Echa Tumpa yandembojupi ipɨakavi rupi.

⁸ Kuae ko jae ñee añete vae, jare aipota jekuaeño täta reporookuai vaerä kuae mbaembae re, Tumpa re güɨrovia vae reta oyapo vaerä ikavi vae, kuae mbaembae ikavi ko opaete vae pe.

⁹ Ërei agüɨye eyoaka osirivembae re, iñemuñagüe reta regua re omoërakua vae reta re, ñeraro reta re jare yoaka mborookuai re, echa mbaeä ko jare osiriveä ko.

¹⁰ Oime yave kia oporomboyaouka vae, ere chupe metei ani mókoi vese agüɨye vaerä oyapo jökorai. Ërei oipotaä yave oeya jeko, emoë oporogüɨrovia vae reta ipɨte güi,

¹¹ echa reikuaa jókuae nunga oikomegua ko, iyoa etei ko omboeko güɨnoi.

Mborookuai reta Tito pe

¹² Amondo yave ndépɨri Artemas ani Tíquico, eyu jarembaeño chépɨri Nicópolis pe. Echa chekɨ̈reɨ apɨta joko pe iroɨguasu oasa regua.

¹³ Emborɨ opaete nekɨ̈reɨ ngatu reve, mborookuai re oporomboe vae Zenas jare Apolos, yogüɨraja kavi vaerä, agüɨye vaerä mbae oata chupe reta.

¹⁴ Jare oporogüɨrovia vae reta toyemboe jekuaeño oyapo vaerä ikavi vae, ipuere vaerä omborɨ mbae oata chupe vae reta. Echa jökorai oyapo reta yave, oyeokuai ko Tumpa pe.

Tamaraeme reta

¹⁵ Opaete che ndive ñogüɨnoi vae omondo peve tamaraeme. Tamaraeme toñogüɨnoi opaete oporogüɨrovia vae reta oreraɨu vae. Tumpa ipɨakavi toï opaete pe reta ndive. ¡Amén!