Santiago 3 - Biblia Guarani Tumpa Iñee

Ñanekü

¹ Cherɨvɨ reta, agüɨye peipota yae peyeapo oporomboe vae retarä. Echa peikuaa ko yande yaporomboe vae reta ñañejäauka yaeta ïru vae reta güi.

² Echa opaete yande reta yayavɨñoi ko. Oime yave kia mbaetɨ oyavɨ iñee rupi vae, jae ko jupi vae, güɨnoi ko mbaepuere opaete jete re.

³ Mase, yande ñañono kayurupegua kavayu reta iyuru pe, yaraja vaerä yande yaipotaa rupi. Jökorai ñanoi mbaepuere opaetei kavayu jete re.

⁴ Jaeramiño vi barco guasu reta: Yepe tëi tuicha yae, jare ɨvɨtu täta vae güɨraja ɨguasu rupi, ërei jeroataa güɨraja jae oipotaa rupi itimón michi yae pe.

⁵ Jökorai vi ko yanderete re ñanekü michi yae tëi, ërei oyapo mbae tuichagüe. Mase, ¡metei tata michi yae vae ipuere ko opa oapɨ kaa tuicha vae!

⁶ Ñanekü metei tata rami ko. Tɨnɨe ikavimbae pe. Ñanekü oï yanderete pe, ërei omongɨa opaete yanderete; tata ogüembae rami ko yaikove yaiko ramboeve. Jare kuae ikavimbae vae ou ko kañɨtei güi etei.

⁷ Ɨvɨ pegua reta omomaso oipotagüe mɨmba tuicha vae, güɨra reta, mboi reta, ɨ rupigua reta. Jare imaso reta.

⁸ Ërei metei ave mbaetɨi ipuere omomaso ikü. Ikavimbae vae oñemaeñombae vae ko. Imbayachi yae vae rami ko.

⁹ Ñanekü pe yamboete yandeRu Tumpa. Pɨpe vi yayepopeyu ïru vae reta re, yepe tëi Tumpa oyapo reta jae etei rami.

¹⁰ Metei vae yandeyuru güiño oë mbaemboete jare yepopeyu. Cherɨvɨ reta, mbaetɨ jaekavi yayapo vaerä jökorai.

¹¹ ¿Oë pa metei ɨkua güiño ɨ ikavi vae jare ɨ jembochɨ vae?

¹² Cherɨvɨ reta, ¿ipuere pa ɨva ia saini ani uva ipuere pa ia ɨva? Jökoraiño vi, metei ɨkua güi ngaraai oë ɨ ikavi vae jare ɨ jembochɨ vae.

Arakuaa ɨvate güi ou vae

¹³ Oime yave kia pepɨte pe iyarakuaa vae, toiko kavi. Toechauka jembiapo reta rupi jeko kavi oñemomichi reve kavi.

¹⁴ Ërei peñemoägüɨro yave ïru vae reta re jare pepochɨ pepɨa rupi yave, agüɨye peyemboete ani peapu añete vae kotɨ.

¹⁵ Echa jókuae arakuaa mbaetɨ ko ou Tumpa güi. Ɨvɨ peguaño ko, kuimbae reta iyarakuaaño ko, aña pegua ko.

¹⁶ Echa oime ñemoägüɨro jare ñeraroa pe, oime jeta teko ikavimbae jare oipotagüe mbae ikavimbae vae.

¹⁷ Ërei arakuaa Tumpa güi ou vae, ikɨambae ko, ipɨakatuta ko, iporoaɨu ko, ipɨakavi ko, iporoparareko ko jare oyapo ikavigüe. Oporombotavɨmbae jare mbaetɨ jova mókoi.

¹⁸ Mbɨakatu iyapoa reta oyapo mbɨakatu rupi kavi vae, oarɨvota jupi vae.