SALMOS 89 - Biblia Guarani Tumpa Iñee

SALMO 89 Tumpa iporogüɨrökuavee päve David ndive

¹ CheYa, ndeporoparareko atairarita jekuae avei rupi; chetairari rupi, jekuaekuae avei rupi amombeuta ndeporoparareko re jare neñee rembopo avei vae re.

² Amoërakuata ndeporoparareko jae ko opambae vae; mbaetɨi oyepoepɨ, ara mbaetɨi oyepoepɨ rami.

³ Reyapo metei morogüɨrökuavee päve David ndive; reñererökuavee nderembiokuai reiparavo vae pe, rere:

⁴ “Neñemuña reta pe ameeta jekuae avei pegua oporookuai vaerä nderendagüe pe.”

⁵ CheYa Tumpa, opaete araɨgua omboete jupigüe jare mɨakañɨ reta reyapogüe.

⁶ Echa, ¿kia pa ara pe oime ndemboyovake vaerä, cheYa? Imbaepuere vae reta güi, ¿oime pa kia ndemboyovake vaerä?

⁷ Tumpa kɨɨyea araɨgua reta ipɨte pe, tuicha yae opaete iyɨ́vɨri rupi ñogüɨnoi vae reta pe.

⁸ CheYa Tumpa, Tumpa Imbaepuere yae ete vae, ¿kia pa nde rami? Ndembaepuere yae ko cheYa, añete vae pe reñeova etei reï.

⁹ Nde renoi mbaepuere ɨguasu iñaro re, remokïrii opüa yave iɨaparúa reta;

¹⁰ repɨ̈ro mbaeporou ɨguasu rupigua Rahab re, omanogüe re rami; opa remoai moai nderovaicho reta ndembaepuere pe.

¹¹ Ndembae ko ara jare ɨvɨ; nde ko reyapo ɨvɨ jare opaete mbaembae oï pɨpe vae.

¹² Nde ko reyapo ɨvɨtuguasu jare arayevɨ; ɨvɨtɨ guasu Tabor jare Hermón otairari reta nderee re.

¹³ Ndeyɨva imbaepuere yae ko, ndepo akatu ipɨ̈rata jare imbaepuere yae.

¹⁴ Ndeguapɨa mborookuaía pegua oï jupi jare sɨmbi vae re; mboroparareko jare añete vae ojo nderenonde.

¹⁵ CheYa Tumpa, oyerovia ko tëta ndemboete oyerovia katu reve vae; nderemimbota rupi oguata vae,

¹⁶ nderee re oyerovia avei ara ñavo, oyembotuicha ndembae jupi re.

¹⁷ Echa nde ko jae imbaepuere jare iyemboetea; ndepɨakavi rupi rembotuicha orembaepuere.

¹⁸ ¡OreYa Tumpa nde ko jae oreyeopiaka! ¡Oreruvicha guasu jae ko Iyoambae Israel pegua!

¹⁹ Jayave nemiari yepi nderembiokuai reta pe körai: “Aiparavo metei jëia yae vae, chembae vae reta ipɨte pe, ambotuicha yae jare amborɨ.

²⁰ ¡Aväe cherembiokuai David! Aiparavo cheasaite oñeñono tee vae rupi.

²¹ Cheporomborɨ oiko aveita jae ndive. Cheyɨva pe amomɨ̈ratata,

²² jovaicho reta ngaraa oesapɨa, jeko kavimbae reta ave ngaraa omoamɨri.

²³ Jaeño che amoamɨrita jovaicho reta chupe; ¡ayukata jókuae imotareɨa reta!

²⁴ Cheporoparareko jare cheñee añete vae oikota jae ndive, cheree re imbaepuere tuicha yaeta.

²⁵ Imbaepuere añonota ɨguasu güive, ɨ̈aka Éufrates pe.

²⁶ Jae jeita cheve: ‘Nde jae cheRu, cheTumpa, jare ita guasu rami chereepɨ vae.’

²⁷ Jare che amee eteta chupe oï vaerä cheraɨrɨpɨrä, tuicha yae vaerä mburuvicha guasu reta ɨvɨ pegua güi.

²⁸ Cheporoparareko aveita ikotɨ, jare cheporogüɨrökuavee päve oiko aveita jae ndive.

²⁹ Añonota iñemuña reta oiko avei vaerä, iporookuaía oikota ara oiko avei vae rami.

³⁰ Ërei iñemuña reta oeya yave cheporookuai, jare mbaetɨ oguata cheporookuai jei vae rupi yave.

³¹ Omboeteä reta cheporookuai jare mbaetɨ oyapo reta yave,

³² aiporaraukata jókuae ipɨapochɨ re, jare ainupata ikavimbae oyapo vae re.

³³ Ërei ngaraa cheapɨ aiparareko David, cheñee ambopo aveita chupe.

³⁴ Ngaraa cheakañɨ cheporogüɨrökuavee päve güi, ngaraa vi aipoepɨ jaegüe.

³⁵ Añererökuavee cheree ikɨambae re vae, ambopota ko David pe.

³⁶ Añonota iñemuña reta oiko avei vaerä, iporookuaía oikota cheróvai kuaraɨ oiko avei vae rami.

³⁷ ¡Yasɨ rami oikota jekuae avei rupi! ¡Oikota jekuae avei pegua, ara oiko ramboeve!”

³⁸ Ërei ngatu, reröɨro jare remombo mburuvicha guasu nde reiparavogüe; ¡ndearasɨ chupe!

³⁹ Repɨ̈ro chugüi morogüɨrökuavee päve reyapo nderembiokuai ndive vae; remombo chugüi ɨvɨ re iñäka-regua oro pegua.

⁴⁰ Opaetei remboasavi ikësea reta chugüi; ¡reipoepɨ tëta guasu reta tëtagüerä!

⁴¹ Opaete jokoropi oasa vae opaetei mbaembae güɨraja; jëta-ɨpɨ rupigua reta opuka jese.

⁴² Remee jovaicho reta imbaepuere yae vaerä; remee jovaicho reta oyerovia yae vaerä.

⁴³ Jaimbepa reyapo ikɨsepuku reta, mbaetɨ remborɨ ñeraro pe.

⁴⁴ Iyemboetea rembogüe chugüi; iguapɨa mborookuaía pegua reitɨ chugüi ɨvɨ re.

⁴⁵ Oikopuku vaerägüe, remomichi chugüi, jare reñono ñemomarai pe.

⁴⁶ CheYa Tumpa, ¿kërai yave regua pa chereeyata? ¿Jendɨ aveita ra ndearasɨ tata rami?

⁴⁷ Nemaendúa, ngaraa ko ɨma aikove aiko; ¿maera ra reyapoiño kuimbae?

⁴⁸ ¿Oime ra kuimbae mbaetɨta omano vae? ¿Oepɨta ra jekove mano imbaepuere güi?

⁴⁹ CheYa, ¿ketɨ pa oime oï ndeporoparareko, jókuae arakae nderee re ae rerökuavee David pe vae?

⁵⁰ CheYa, nemaendúa nderembiokuai reta oiporara ñemomarai vae re; jókuae ñemomarai aiporara vi.

⁵¹ CheYa Tumpa, ¡nderovaicho reta mbaetɨ oporomboete! ¡Jökorai mbaetɨ omboete reta nderembiparavo!

⁵² ¡Mbaemboete toiko ndeve cheYa jekuae avei rupi! ¡Amén! ¡Amén!