SALMOS 62 - Biblia Guarani Tumpa Iñee

SALMO 62 Tumpaño ko jae ñepɨ̈roa

¹ Tumpa reño aiko pɨagüive, chugüiño ou cheve yereroasayepe.

² Jaeño ko ita guasu cheñepɨ̈roa jare chereroasayepe vae, ngaraa agüɨapi, echa jae ko cheñepɨ̈roa.

³ ¿Kërai yave regua pa yemongeta ikavimbae peyapota peiko chekotɨ? Echa opaete pe reta peipota chereitɨ, ovapetea oa rami ani kesemba opa oa rami.

⁴ Peporomokañɨtei vaerä reteiño peyemongeta, peaɨu apu; pemiari ñee kavi, ërei pepɨa pe peyepopeyu.

⁵ Tumpa reño aiko pɨagüive, chugüiño ou cheve yereroasayepe.

⁶ Jaeño ko, ita guasu cheñepɨ̈roa jare chereroasayepe vae, ngaraa agüɨapi, echa jae ko cheñepɨ̈roa.

⁷ Tumpa re oï cheyereroasayepe jare cheyemboetea, jae ko ita guasu cheñepɨ̈roa jëguambae jare cheñemía ikavigüe.

⁸ ¡Cherëtaɨgua reta! Jeseño peyeko; pemee pepɨa chupe, Tumpa jae ko yandeveguarä ñaneñemía.

⁹ Añetete, kuimbae reta mbaeä etei ko, paravete vae ani oikokatu vae; mbaejäaka pe oñejäa reta yave, mbaetɨ etei oñejäa ramiñota ko.

¹⁰ Agüɨye eyeko ndepɨarai re, jare repɨ̈rogüe rupi remboatɨ vae re; reikokatu yae ma yave, agüɨye ndepɨa jeseiño.

¹¹ Mbovɨ ye aendu Tumpa jei, jae imbae ko mbaepuere vae.

¹² CheYa Tumpa mboroparareko ndembae ko, echa nde remboekoviata metei ñavo vae pe jembiapo oï rupi.