SALMOS 43 - Biblia Guarani Tumpa Iñee

SALMO 43

¹ CheRu Tumpa, toyeapo cheve jupi vae; ¡chereepɨ iyoa vae reta güi! ¡Chereepɨ iyapu jare ipɨapochɨ vae reta güi,

² echa nde jae ko cheTumpa cheñepɨ̈roa! ¿Maera pa chemombo? ¿Maera pa aikota mbɨatɨtɨ pe, cherovaicho reta jasɨ katu cherereko vae pe?

³ Emboesape cheve neñee añete vae, chemboe vaerä nderemimbota re, jókuae tachereraja ndeɨvɨtɨ reñono tee vae kotɨ nde reikoa pe.

⁴ Taja taväe, ndembae mɨmba oyeyuka oyeapɨ jese vae pe, joko pe toromboete arpa ndive, yerovia reve cheRu Tumpa.

⁵ ¿Maera pa ayembopɨtuta? ¿Maera pa ayemoambekota? Cheporoäro anoi Tumpa kotɨño, jekuae ñotai amboete. ¡Jae ko cheRu Tumpa chereroasayepe vae!