SALMOS 4 - Biblia Guarani Tumpa Iñee

SALMO 4 Kaaruasɨ pegua yerure yandeYa pe

¹ CheYa Tumpa, chereepɨ vae, ¡eendu cheve roenɨi yave! Mbɨatɨtɨ pe aï yave, nde chembopɨakatu, ¡cheparareko cheYa! ¡Eendu cheyerure!

² Pe kuimbae reta, ¿kërai yave regua pa perekota cheyemboetea ñemomarai pe? ¿Kërai yave regua pa peipota jare peekata mbaetɨ mbaerä osirive vae jare añetembae vae?

³ Peikuaa, kuae re, yandeYa oiparavo kuimbae jupi vae iyeupeguarä. YandeYa oendu che asapúkai chupe yave.

⁴ ¡Pekɨɨye jare agüɨye peyoa ye! Perupa pe peï yave, peñemokïrii, peyemongeta peyapogüe re.

⁵ Pemee mɨmba oyeyuka oyeapɨ vae añete vae, jare peyeko yandeYa re.

⁶ Jeta vae jei: “¿Kia pa oechaukata yandeve ikavi vae?” ¡OreYa Tumpa, ndepɨakatu oreré!

⁷ Nde chemboyerovia yae chugüi reta, jae reta imbaagüɨye jare vino pɨau güɨnoi yave oyerovia vae güi.

⁸ Mbɨakatu reve ayapakuata jare jökorai aketa, echa ndeño cheYa, remee aiko pɨagüive.