SALMOS 24 - Biblia Guarani Tumpa Iñee

SALMO 24 Mburuvicha guasu tuicha yae ete vae

¹ YandeYa imbae ko ɨvɨ jare opaete mbaembae oï pɨpe vae, jare opaete yogüɨreko pɨpe vae.

² Echa jae oyapo ɨvɨ, omboguapɨ ɨguasu reta re jare ɨ̈aka reta re.

³ ¿Kia pa oyeupita yandeYa iɨvɨtɨ re? ¿Jare kia pa oïta jo oñeñono tee vae pe?

⁴ Ipo ikɨambae Tumpa jóvai vae, jare ipɨa ikɨambae vae; mbaetɨ ipɨa oñono tumpa-raanga reta kotɨ vae, ani mbaetɨ tavɨ rupi oyapo ñererökuavee vae.

⁵ Jókuae nunga güɨnoita mborerekua yandeYa güi, jare Tumpa oporogüɨroasayepe vae oyapota chupe jupi vae.

⁶ Jökorai ko oeka Tumpa vae reta, Jacob iTumpa oeka vae reta.

⁷ ¡Öke reta, peyepea! ¡Öke reta ñɨma vae, peyepea, Mburuvicha guasu imboetea yae vae oiketa!

⁸ ¿Kia pa ko kuae Mburuvicha guasu imboetea yae vae? ¡Jae ko yandeYa imbaepuere jare jëia yae vae! ¡Jae ko yandeYa imbaepuere yae ñeraro pe vae!

⁹ ¡Öke reta, peyepea! ¡Öke reta ñɨma vae, peyepea, Mburuvicha guasu imboetea yae vae oiketa!

¹⁰ ¿Kia pa ko kuae Mburuvicha guasu imboetea yae vae? ¡Jae ko yandeYa Imbaepuere yae ete vae! ¡Jae ko Mburuvicha guasu imboetea yae vae!