SALMOS 17 - Biblia Guarani Tumpa Iñee

SALMO 17 Yerure yemborɨ regua

¹ CheYa, eendu cheyerure jupi rupi vae, eïndaivi reendu vaerä cheyerure, eyeapɨsaka cheyerure re, echa mbaetɨ ko cheapu.

² ¡Ndegüi tou ayeepɨ vaerä, echa nde ko reikuaa jupi vae!

³ Nde reikuaa cheyemongeta, pɨ̈tu yave nde remae cheré, cheñono morojäa pe ërei mbaetɨ reväe teko cheré, echa añono chepɨa pe agüɨye vaerä ayavɨ mbae jae.

⁴ Neñee rupi añeñovatu kuimbae reta oyapo vae güi, jekorai vae reta jembiapo güi.

⁵ Chemomɨ̈rata nderemimbota rupi aiko vaerä, agüɨye vaerä apia.

⁶ Che roenɨi cheRu Tumpa, echa nde reendu cheyerure; emboɨke ndeapɨsa chekotɨ, eendu cheñee reta.

⁷ Eechauka ndeporoparareko yae vae cheve, nde ko reroasayepe tovaicho reta güi, oyeko ndembaepuere re vae.

⁸ Eyangareko cheré, neresäɨkunumi re reyangareko rami; cheñomi ndepepo reta igüɨ pe rami,

⁹ jeko kavimbae reta iporogüɨrekoasɨ katu güi, ¡cherovaicho reta oipota cheyuka vae güi!

¹⁰ Iyeupeguaräño oaɨu reta imbaeyekou, oyembotuicha reve imiari reta.

¹¹ Cherape oyopia reta chegüi, omae ñogüɨnoi chereitɨ vaerä ɨvɨ re.

¹² Yaguapope rami jembia pota reta, yaguapope taɨrusu rami oñemi ñogüɨnoi.

¹³ Epüa cheYa Tumpa, ¡eë eñoraro jae reta ndive, emoamɨri reta! Chereepɨ jeko kavimbae reta güi ndekɨsepuku pe,

¹⁴ ndembaepuere pe chereroasayepe chugüi reta cheYa, ¡emokañɨtei reta kuae ɨvɨ güi, echa jae reta imbae güɨnoi kuae ɨvɨ peño! Jae reta oyemboikokatu yae ndeporerekua pe, omoɨ̈vɨata taɨ reta, jembɨre ye jɨmɨmino reta peguarä.

¹⁵ Ërei che, roechata jupi rupi aiko ramo, ¡chepɨakatuta apɨta chemomba ma yave!