SALMOS 13 - Biblia Guarani Tumpa IñeeSALMO 13 Yemborɨ oyeporu mbɨatɨtɨ iara pe vae 1 CheYa, ¿neakañɨta pa jekuae avei pegua chegüi? ¿Kërai yave regua pa reyerovata oregüi? 2 ¿Kërai yave regua pa cheyemongeta rupi aiporara poita ara ñavo chepɨatɨtɨ vae? ¿Kërai yave regua pa cherovaicho reta jeia re aikota? 3 CheYa, Tumpa, ¡emae cheré, emaeño tamae tembipe re! ¡Agüɨye tamano! 4 ¡Agüɨye vaerä cherovaicho jei cheve: “Amoamɨri”! ¡Cherovaicho reta oyeroviata ko, chemoamɨri yave! 5 Ërei che ayeko ndeporoparareko re, chepɨa oyeroviata ndeporogüɨroasayepe re. 6 ¡Atairarita nde cheYa, echa nde reyapo ikavi vae cheve! |
Biblia DC Guaraní Bolivia © Bolivian Bible Society, 2001.
Bolivian Bible Society