SALMOS 127 - Biblia Guarani Tumpa Iñee

SALMO 127 Opaete mbae oë kavi vae yandeYa güi ko ou

¹ YandeYa iporomborɨ mbaetɨ yave, oparavɨkɨiño ma ko tupao imopüaa reta. YandeYa mbaetɨ yave oyangareko tëta guasu re, oyangarekoiño ma ko tëta guasu iyangarekoa reta.

² Oparavɨkɨ vae oparavɨkɨiño ma ko ndeimboveasɨ güive kaaruasɨ regua jare jasɨ katu reve oväe jembiurä, echa Tumpa oaɨu vae pe, jae omee oke ipɨagüive vaerä.

³ Mase, michia reta oa vae yandeYa imbae ko, mbota ko michia reta oa yandeve vae.

⁴ Uvɨ rami ko, jëia vae ipo pe, jökorai ko michia reta, ou yandeve yandetaɨrusu yave vae.

⁵ ¡Oyerovia ko kuimbae jökorai michia reta güɨnoi vae! Ngaraa oñemomaraiuka imiari jovaicho reta ndive yave öke pe.