SALMOS 116 - Biblia Guarani Tumpa Iñee

SALMO 116 Yasoropai yereroasayepe mano güi vae regua

¹ Aaɨu cheYa, echa jae oendu cheve cheyerure amoñera reve vae,

² echa omboɨke iyapɨsa chekotɨ. Jáeramo, ¡tayerure avei chupe, aikove aiko ramboeve!

³ Mano chemama jɨmasa pe, omanogüe reta ñogüɨnoia pegua mbaeporara ou oväe cheve, mbaeporara jare mbɨatɨtɨ ou oväe cheve.

⁴ Jayave, aenɨi cheYa, jae chupe: “CheYa, chereroasayepe.”

⁵ Iyeaeä jare jupi ko yandeYa, iporoparareko yae ko ñaneTumpa.

⁶ YandeYa oyangareko ipɨa omomichi vae reta re, cherupa rupi aiko yave, chereroasayepe.

⁷ Añave chepuere ma aiko pɨagüive ye, echa yandeYa ipɨakavi chekotɨ;

⁸ echa nde chereroasayepe mano güi, yaeo güi jare agüɨapita tëi vae güi.

⁹ Taiko nde rerea re cheYa, aiko ramboeve kuae ɨvɨ pe, oikove vae reta ipɨte pe.

¹⁰ Che arovia ko; jáeramo jae, aiporara yae aï yave.

¹¹ Ayemongetambae reve jae: “Opaete vae yapu vae päve ko.”

¹² ¿Mbae pe pa amboepɨta cheYa pe, opaete jókuae ikavi vae oyapo cheve vae jekovia pe?

¹³ Tamopüa kopa yereroasayepe pegua, ¡jare taenɨi cheYa jee!

¹⁴ Tambopo cheYa pe opaete arökuavee chupe vae, opaete jae imbae vae reta jóvai.

¹⁵ YandeYa pe jasɨ katu ko imbae vae reta imano.

¹⁶ CheYa Tumpa, nderembiokuai ete ko che, nderembiokuai kuña imembɨraɨe ko che, nde ko cheyora cheñeapɨtía reta güi.

¹⁷ Tamee ndeve mbaemboete, jare taenɨi cheYa jee.

¹⁸ Tambopo cheYa pe opaete arökuavee chupe vae, opaete jae imbae vae reta jóvai,

¹⁹ cheYa jo joka pe, ¡Jerusalén pe! ¡Aleluya!