Romanos 8 - Biblia Guarani Tumpa Iñee

Espíritu Santo jei vae rupi yaiko vae

¹ Jáeramo, Tumpa ngaraa etei omboeko Cristo Jesús re güɨrovia vae reta. Jókuae Espíritu jei vae rupi oiko, mbaetɨ isoo jemimbota reño oiko vae.

² Echa mborookuai tekove pegua Espíritu Santo omee Cristo Jesús rupi vae, cheyora ma mbaeyoa imbaepuere güi jare mano güi.

³ Echa Tumpa oyapo, mborookuai mbaetɨ ipuere oyapo vae, echa mborookuai ipuereä yandemborɨ yandeyoa jeko pegua. Jáeramo, ombou Taɨ kuae ɨvɨ pe, metei kuimbae iyoa vae rami, omano vaerä yandeyoa re. Jökorai omoamɨri mbaeyoa jókuae jete rupi;

⁴ kuae oyapo, mborookuai jei vae yayapo vaerä. Echa mbaetɨ ma yaiko yandesoo jemimbota reño, yaiko ma ko Espíritu Santo jei vae re.

⁵ Isoo jemimbota reño yogüɨreko vae reta, oyemongeta soo jemimbota reño. Ërei Espíritu Santo jei vae re yogüɨreko vae reta, oyemongeta Espíritu Santo jei vae re.

⁶ Echa isoo jemimbota reño oyemoambeko vae, mano ko. Ërei Espíritu Santo jei vae re oyemoambeko vae, tekove jare mbɨakatu ko.

⁷ Echa soo jemimbota reta reño oyemoambeko vae reta oyovaicho ko Tumpa kotɨ. Echa ñäteɨ jare ipuereä oyapo reta Tumpa iporookuai;

⁸ jáeramo, soo jemimbota reño yogüɨreko vae reta, mbaetɨ ipuere ombopɨakatu Tumpa.

⁹ Ërei pe reta mbaetɨ ma peiko soo jemimbota rupi, peiko ma Espíritu Santo jei vae re, oime yave jae oiko pe ndive. Ërei kia mbaetɨ güɨnoi Cristo iEspíritu vae, jae imbaeä ko.

¹⁰ Ërei Cristo oiko pepɨa pe yave, peikove mbaejupi jeko pegua, yepe tëi perete omanota ko mbaeyoa jeko pegua.

¹¹ Jare Tumpa omoingove ye Jesús omanogüe reta ipɨte güi vae iEspíritu oiko yave pepɨa pe; jae etei ko omeeta tekove perete mano pegua pe, jae iEspíritu oiko peré vae rupi.

¹² Jáeramo, cherɨvɨ reta, mbaetɨ ma ko yandepía yanderemimbota ae reño yaiko vaerä.

¹³ Echa peiko pesoo jemimbota reño yave, pemanota ko, ërei Espíritu imbaepuere rupi pemaeñoä oikove pesoo jemimbota yave, peikoveta ko.

¹⁴ Echa opaete Espíritu Santo jemimbota re yogüɨreko vae reta, Tumpa taɨ reta ko.

¹⁵ Echa Tumpa omee ko peve iEspíritu, peyeapo vaerä taɨ retarä. Mbaetɨ ko omee peve jekuaeño pekɨɨye reve peiko vaerä. Jókuae Espíritu Santo yandemborɨ yae vaerä: “CheRu.”

¹⁶ Espíritu Santo etei oikuaauka yandeve yande ko jae Tumpa taɨ reta.

¹⁷ Jare yande Tumpa taɨ reta ramo, ñanoita vi yandembaerä jae omeeta yandeve vae. Ñanoita ko yandembaerä Cristo ndive, yaiporara yave jae oiporara rami; jare Tumpa yandemboeteukata Cristo ndive.

¹⁸ Arovia añave yaiporara mbaembae ñaï vae mbaeä ko, jókuae yemboetea Tumpa omeeta yandeve vae güi.

¹⁹ Echa opaete Tumpa jembiapo oäro ñogüɨnoi ikɨ̈reɨ yae reve Tumpa oechauka vaerä taɨ reta.

²⁰ Echa Tumpa jembiapo ikavi yae vae opa oikomegua, ërei iyeugüi aeñoä jökorai opɨta; echa Tumpa ngaraa omaeño jökorai opɨta;

²¹ jaeramiño vi Tumpa oepɨta jembiapo reta ikavimbae güi, jae omboeteuka taɨ reta yave.

²² Echa yaikuaa ko kërai iyɨpɨ güive añave regua opaete Tumpa jembiapo reta oiporara yae oï, metei kuña imembɨrasɨ vae oiporara yae oï rami.

²³ Jökoraiño vi yande, Espíritu räri yamboresive ma yandepɨa pe vae, yaiporara yae ñaï yandepɨa pe, echa ñaäro ñaï yanderete oyeyora ete vaerä, Tumpa taɨ reta yande ramo.

²⁴ Echa ñaäro ko yayemboasauka vaerä. Echa yaecha ma vae, ngaraa ma ñaäro; echa amogüe oecha ma vae, mbaetɨ mbae re oäro vaerä.

²⁵ Ërei ñaäro ñaï mbaetɨ yaecha vae yave, ñaäro yandepɨaguasu reve.

²⁶ Jaeramiño vi Espíritu Santo yandemborɨ, mbaetɨ ñanepɨ̈rata ramo. Echa mbaetɨ yaikuaa kërai yayerure vaerä jaekavi vae re, jáeramo Espíritu Santo etei oyerure yanderé Tumpa pe iä-yekɨi reve ñee ñajäa rapembae vae pe.

²⁷ Tumpa oikuaa opaete vae iyemongeta vae, oikuaa vi Espíritu Santo mbae ko oipota jei vae. Echa Espíritu Santo oyerure Tumpa jemimbota rupi kavi, imbae vae reta re.

Opaete mbaembae ñamoamɨrita

²⁸ Yaikuaa ko Tumpa omborɨ opaete mbaembae rupi, oaɨu Tumpa ramo, jae jemimbota rupi oyeparavo vae reta,

²⁹ iyɨpɨ güive oikuaa vae reta. Jókuae reta oiparavo vi yogüɨreko reta vaerä Taɨ rami; Jae oiko vaerä opaete Tumpa taɨ reta ipɨte pe tenondegua eterä.

³⁰ Jökorai iyɨpɨ güive oiparavo vae reta, oenɨi; jare jókuae oenɨi vae reta ombojupi. Jare ombojupi vae reta omboeteuka.

³¹ ¿Mbae pa yaeta jayave kuae re? Echa Tumpa ko yandemborɨ vae, jayave ¿kia pa ñanemoamɨrita?

³² Echa Tumpa mbaetɨ ñäteɨ omee Taɨ omano vaerä yanderé. Jáeramo jae ¿omee potaä pa opaete mbaembae Taɨ ndive yandeve?

³³ ¿Kia pa ipuereta omboeko Tumpa jembiparavo reta? Tumpa ko jae oporombojupi vae.

³⁴ ¿Kia pa ko jae oporojäata vae? Cristo ko omano jare oikove ye vae, jare oime oï Tumpa iyakatu kotɨ vae. Jae etei oyerure Tumpa pe yanderé vae.

³⁵ ¿Kia ra yandembosɨrɨta Cristo iporoaɨu güi? ¿Tembiporara guasu ra, ani mbɨatɨtɨ, ani ïru vae reta oyapo ikavimbae vae yandeve vae, ani yɨmbɨaɨ, oata temimonde vae, ani manoɨvɨ ani mano?

³⁶ Echa Tumpa Iñee pe oyekuatía oï körai: “Nderé rogüɨrovia ramo, ara ñavo roiko yemomburu rupi. Roiko vecha reta oyereraja mbaeyukaa pe vae rami.”

³⁷ Ërei yepe tëi opaete kuae oyeapo yandeve, jekuaeñoi ñaporomoamɨri jókuae yanderaɨu vae rupi.

³⁸ Che aikuaa ko ngaraa ipuere yandembosɨrɨ Tumpa güi mano, tekove, araɨgua reta, mburuvicha ara pegua reta, imbaepuere vae reta, opaete añave oyeapo oï vae ani oyeapota vae ave,

³⁹ ani ɨvate yae vae, ani ɨ́vɨkotɨ yae vae, ani oipotagüe ïru mbae Tumpa oyapo vae yepe ngaraa ipuere yandembosɨrɨ Tumpa iporoaɨu güi yandeYa Cristo Jesús rupi.