Romanos 6 - Biblia Guarani Tumpa Iñee

Ñamano ma mbaeyoa güi

¹ ¿Mbae pa yaeta? ¿Jeieteñota pa yayapo mbaeyoa, Tumpa ipɨakavi yae vaerä?

² ¡Mbaetɨ ko! Echa yande ñamano ma mbaeyoa güi vae, ¿këraita pa jekuaeño yaiko mbaeyoa pe?,

³ ani ¿mbaetɨ pa peikuaa opaete yande yayembobautisa Cristo Jesús re vae, yayembobautisauka ma ko imano re?

⁴ Echa bautismo rupi, ñañeotɨuka Cristo ndive imano pe, jare Cristo oikove ye omanogüe reta ipɨte güi Tumpa imbaepuere pe rami, jökorai vi yande yaikove tekove ipɨau vae pe.

⁵ Echa yayeapo meteiño Cristo imano re yave, jökorai vi yaikove yeta jae oikove ye rami;

⁶ yaikuaa kërai yandereko indechigüe oyekutu kurusu re Cristo ndive, oyemboai vaerä mbaeyoa yanderete re oï vae, agüɨye vaerä mo jekuaeño yaiko mbaeyoa jeia re.

⁷ Echa omano ma vae re, mbaeyoa mbaetɨ ma güɨnoi mbaepuere jese.

⁸ Ñamano yave Cristo ndive, yarovia yaikoveta vi jae ndive;

⁹ echa yaikuaa ko Cristo oikove ye omanogüe reta ipɨte güi vae, ngaraa ye ma omano. Jare mano mbaetɨ ma güɨnoi mbaepuere jese.

¹⁰ Echa Cristo omano yave, metei veseño omano mbaeyoa güi jekuae avei pegua. Ërei oikove ye yave, oikove Tumpa peguarä.

¹¹ Jaeramiño vi pe reta, perovia vi pemano ma ko mbaeyoa güi, ërei peikove ko Tumpa peguarä yandeYa Cristo Jesús rupi.

¹² Jáeramo, agüɨye pemaeño mbaeyoa re, güɨnoi vaerä mbaepuere perete re, jare jeiete oyapouka pesoo jemimbota peve;

¹³ agüɨye ave vi pemee perete mbaeyoa jembiporurä ikavimbae vae peguarä. Ërei peñemee pe etei Tumpa pe, omanogüe tekove ipɨau vae güɨnoi vae rami, jare pemee perete Tumpa jembiporurä jupi vae peguarä.

¹⁴ Jökorai mbaeyoa ngaraa ma güɨnoi mbaepuere peré. Echa mbaetɨ peï mborookuai igüɨ pe, peï ma ko Tumpa ipɨakavi igüɨ pe.

Mbaejupi jembiokuai

¹⁵ ¿Kërai pa jayave? ¿Jeieteiñota pa yandeyoa, mbaetɨ ramo yaiko mborookuai igüɨ pe, ërei ñaï Tumpa ipɨakavi igüɨ pe? ¡Mbaetɨ ko!

¹⁶ ¿Mbaetɨ pa peikuaa peñemee yave kia jembiokuairä, jókuae ipo pe ko peï vae? Jökorai ko mbaeyoa ipo peï, mano peguarä ani Tumpa jei vae re peï yave, peyembojupi vaerä.

¹⁷ Ërei yasoropai Tumpa pe, echa yepe tëi peikose mbaeyoa jei vae rupi, ërei peyapo ma Tumpa jei vae, jókuae yemboe pemboresive vae rupi;

¹⁸ jare peyeyora ma mbaeyoa güi, peyeapo ma mbaejupi jembiokuairä.

¹⁹ Kuimbae reta ramiño chemiari aï, pepuereä peikuaa kavi ramo. Tenonde yave pemee perete peyapo vaerä mbaeyoa, peyapo vaerä pɨ̈chɨi vae jare jupimbae vae. Jökorai vi añave pemee perete peyeokuai vaerä mbaejupi pe, peñeñono tee reve Tumpa peguarä.

²⁰ Echa peiko mbaeyoa ipo pe yave, peiko güɨraveño mbaejupi güi.

²¹ Echa ¿mbae ikavi vae pa penoi jókuae mbaembae reta añave pemomarai perenoi vae güi? Echa jókuae mbaembae oporogüɨraja mano pe.

²² Ërei añave peyeyora ma mbaeyoa güi jare peyeapouka ma Tumpa jembiokuai retarä ramo, peñeñono teeuka ma jare iyapɨ ete pe penoita tekove opambae vae.

²³ Echa mbaeyoa jekovia ko mano. Ërei Tumpa omee mbota yandeve vae ko tekove opambae vae yandeYa Cristo Jesús re.