Romanos 16 - Biblia Guarani Tumpa Iñee

Tamaraeme reta

¹ Poyókuai yandereindɨ Febe re. Jae ko oyeokuai ïru oporogüɨrovia vae Cencrea pegua reta pe vae.

² Pemboresive kavi yandeYa jee re, jupi ko körai oyapo vaerä oporogüɨrovia vae reta. Jare pemborɨ, opaño mbaembae pe, echa jae omborɨ jeta vae, jare chemborɨ vi.

³ Pemee tamaraeme Priscila jare Aquila. Cristo Jesús iparavɨkɨ pe chemborɨ vae reta;

⁴ jae reta oñemoëgua mano pe chereepɨ vaerä. Jáeramo cheñoä amee yasoropai chupe reta, opaete judiombae vae oporogüɨrovia vae reta vi omee yasoropai chupe reta.

⁵ Pemee vi tamaraeme oporogüɨrovia vae reta oyemboatɨ Priscila jare Aquila jo pe vae. Pemee vi tamaraeme cherɨvɨ Epeneto pe. Jae ko jae räri güɨrovia Cristo re Acaya pe vae.

⁶ Jaeramiño vi tamaraeme toï María, kërai jae oparavɨkɨ täta pepɨte pe.

⁷ Jaeramiño vi tamaraeme toï Andrónico jare Junias. Jae reta ko cherëtaɨgua reta, yogüɨrekose tembipɨɨrɨru pe che ndive vae. Imboetea yae temimondo reta ipɨte pe vae, jae reta ko güɨrovia Cristo re ndei che arovia mbove vae reta.

⁸ Jaeramiño vi tamaraeme toï Amplias. Aaɨu yandeYa jee re vae.

⁹ Jaeramiño vi tamaraeme toï Urbano. Cristo Jesús iparavɨkɨ pe oremborɨ vae. Jare vi cherɨvɨ Estaquis.

¹⁰ Tamaraeme vi Apeles. Iporogüɨrovia Cristo re oyekuaa ikavi vae. Tamaraeme toñogüɨnoi Aristóbulo jo pegua reta.

¹¹ Tamaraeme vi toï cherëtaɨgua Herodión. Jaeramiño vi Narciso jo pegua oporogüɨrovia vae reta.

¹² Tamaraeme vi toñogüɨnoi Trifena jare Trifosa. Jae reta oparavɨkɨ ñogüɨnoi yandeYa peguarä. Tamaraeme vi toï yandereindɨ Pérsida. Jae vi oparavɨkɨ täta yandeYa peguarä.

¹³ Tamaraeme vi toï yandeYa jembiparavo Rufo jare ichɨ. Jare ichɨ oyangareko kavi cheré chesɨ rami vae.

¹⁴ Tamaraeme vi toñogüɨnoi Asíncrito, Flegonte, Hermas, Patrobas, Hermes jare opaete cherɨvɨ reta ñogüɨnoi jae reta ndive vae.

¹⁵ Jaeramiño vi tamaraeme toñogüɨnoi Filólogo, Julia, Nereo, Nereo jeindɨ, Olimpas jare opaete oporogüɨrovia vae reta ñogüɨnoi jae reta ndive vae.

¹⁶ Peyapo maraetei oyoupe peyovapɨte jare peyomboete reve kavi. Omondo tamaraeme peve opaete oporogüɨrovia Cristo re vae reta.

¹⁷ Añave che pomoñera cherɨvɨ reta, pemae kavi jókuae yemboyao jare oporombogüɨapiuka yemboe pe reta peikuaa vae güi vae reta re, pesɨrɨ chugüi reta.

¹⁸ Echa jókuae reta mbaetɨ ko oyeokuai yandeYa Jesucristo pe. Jaeño oparavɨkɨ reta ikavi chupe reta vaerä jeko peguaño, iñee-yukɨ rupi jare iñee kavi rupi ombotavɨ iyarakuaa katumbae reta.

¹⁹ Peñeereendu jërakua opaete vae pe. Jáeramo ayerovia peré. Aipota pearakuaa peyapo vaerä ikavi vae, ërei agüɨye pearakuaa katu peyapo vaerä ikavimbae;

²⁰ jayave Tumpa mbɨakatu omee vae ɨmambae tomoamɨri Satanás, toñono pepɨ igüɨ pe. YandeYa Jesucristo ipɨakavi toï pe reta ndive.

²¹ Timoteo chemborɨ vae jare cherëtara Lucio, Jasón jare Sosípater omondo tamaraeme peve.

²² Che Tercio, oikuatía kuae tupapire vae amondo vi tamaraeme peve yandeYa jee re.

²³ Gayo omondo vi peve tamaraeme, aiko jo pe vae jare opaete oporogüɨrovia vae reta oyomboatɨ jo pe vae. Omondo vi peve tamaraeme Erasto, tëta guasu pegua korepoti iñovatúa. Jare yanderɨvɨ Cuarto vi.

²⁴ YandeYa Jesucristo ipɨakavi toï opaete pe reta ndive. Amén.

Mbaemboete Tumpa pe

²⁵ Yamboete Tumpa, jae ipuere pemomɨ̈rata ñee ikavi vae Jesucristo regua amoërakua vae rupi. Kuae ñee ikavi vae yaikuaambae oñeomi oiko ndei ɨvɨ oyeapo mbove vae.

²⁶ Ërei añave oyekuaa, ñeemombeúa reta oikuatía Tumpa Iñee vae rupi, Tumpa oiko ñomai vae iporookuai rupi, oikuaauka opaete tëtaguasu reta pe, oporogüɨrovia reta vaerä;

²⁷ Tumpa jaevaeño jare yarakuaa yae vae toyemboeteuka jekuae avei pegua Jesucristo rupi. ¡Amén!