Romanos 15 - Biblia Guarani Tumpa Iñee

¹ Jayave yande ñanepɨ̈rata yandeporogüɨrovia pe vae, yaropɨa ipɨtu iporogüɨrovia pe vae reta, jare agüɨye yandeño yayemboyerovia.

² Metei ñavo yamboyerovia yanderapicha ikavi vae rupi, ipɨ̈rata vaerä iporogüɨrovia pe.

³ Echa Cristo etei mbaetɨ oyemboyerovia jaeño. Ërei, oyapo Tumpa Iñee oyekuatía oï rami: “Ndeangao vae reta cheangao vi.”

⁴ Opaete oyekuatía tenonde Tumpa Iñee pe vae, oyekuatía ko yandemboe vaerä. Echa oyekuatía ko yaikatu vaerä mbɨaguasu jare mbɨakatu rupi ñaäro.

⁵ Tumpa mbɨaguasu jare mbɨakatu güɨnoi vae, tomee peve peiko vaerä metei ramiño Cristo Jesús oiko rami;

⁶ metei rami pemee mbaemboete Tumpa, yandeYa Jesucristo Tu pe.

Ñee ikavi vae judiombae vae reta pe

⁷ Jáeramo metei ñavo peyomboresive kavi, Cristo yandemboresive rami, oyemboete vaerä Tumpa.

⁸ Echa che jae peve kuae: Cristo Jesús ou oyeokuai omborɨ vaerä judío reta, oikuaauka vaerä chupe reta Tumpa iñee añete vae. Echa jae ou oikuaauka vaerä Tumpa güɨrökuavee iñemuñagüe reta pe vae;

⁹ judiombae vae reta omboete vaerä vi Tumpa, jae iporoparareko re, Tumpaa Iñee oyekuatía oï rami: “Jáeramo, che toromboete judiombae vae reta ipɨte pe. Tatairari ndeve.”

¹⁰ Jare jei vi körai: “Judiombae vae reta, peyerovia Tumpa imbae vae reta ndive.”

¹¹ Jei ye vi: “Opaete judiombae vae reta, pemboete yandeYa. Opaete tëta reta, pemee mbaemboete yandeYa pe.”

¹² Jare Isaías jei: “Oïta Isaí güi metei oporookuaita opaete judiombae vae reta re; jese oäro retata.”

¹³ Tumpa moroäro omee vae, tomee peve yerovia jare mbɨakatu peporogüɨrovia rupi. Penoi vaerä moroäro Espíritu Santo imbaepuere rupi.

¹⁴ Cherɨvɨ reta, che etei pokuaa kavi yae, kërai pe reta pepɨakavi yae ko jare peikuaa jeta mbaembae. Jáeramo pepuere peyomboarakuaa.

¹⁵ Ërei aikuatía peve cherɨvɨ reta, akɨɨyembae reve amogüe mbaembae re, pomomaendúa jese vaerä. Kuae ayapo, Tumpa ipɨakavi omee cheve vae rupi,

¹⁶ ayeokuai vaerä Jesucristo pe judiombae vae reta ipɨte pe, amoërakua Tumpa ñee ikavi vae. Judiombae vae reta vi oñemee vaerä mbota Tumpa pe oñemee vae rami, oñono tee Espíritu Santo rupi vae.

¹⁷ Jáeramo chepuere ayemboete Cristo Jesús re. Tumpa peguarä ambaeapo vae re.

¹⁸ Chemiarita Cristo oyapo che rupi vae reño. Kërai judiombae vae reta iñeereendu vaerä. Kuae ayapo chemiari jare ayapo reve;

¹⁹ Espíritu Santo imbaepuere rupi ayapo mɨakañɨ reta. Jare kuae amboɨpɨ Jerusalén güi jare opaete iyɨvɨrigua reta güive Ilírico pe, amotɨnɨe ñee ikavi vae Cristo regua pe.

²⁰ Jökorai, añeñono amombeu vaerä ñee ikavi vae, mbaetɨ etei oendu Cristo regua vae rupi, agüɨye vaerä amopüa ïru vae omopüa ma vae re,

²¹ jaeño, oyekuatía oï rami: “Mbaetɨi oñemoërakua chupe vae reta, oechata. Mbaetɨi oendu jesegua vae, oikuaa retata.”

Pablo ikɨ̈reɨ ojo Roma pe

²² Kuae jeko pegua mbaetɨ chepuere aja pépɨri, yepe tëi mbovɨ ye ma añeñono aja vaerä pépɨri.

²³ Ërei añave opa ma amboapɨ kuae rupi, jare ɨma ma chekɨ̈reɨ yae aja apou pépɨri;

²⁴ España kotɨ aja yave, ajata apou pépɨri, ayerovia vaerä pe ndive mbovɨ ara pegua. Javoi joko güi chemborɨ vaerä aja España kotɨ.

²⁵ Ërei ajata räri Jerusalén pe, araja vaerä yemborɨ oporogüɨrovia vae reta pe.

²⁶ Echa Macedonia jare Acaya pegua reta jei ikavi ko omboatɨ jare omondo vaerä korepoti, Jerusalén pegua oporogüɨrovia vae iparavete vae reta pe.

²⁷ Oecha reta ikavi kuae oyapo vaerä, echa ipía ko judío reta pe. Echa judío reta rupi ou judiombae vae reta pe Tumpa iñee. Jáeramo judiombae vae reta ikavi ko omborɨ vaerä judío reta mbaembae güɨnoigüe pe.

²⁸ Jáeramo, araja oyemboatɨgüe aeya chupe reta yave, ajata perupi aja yave España kotɨ.

²⁹ Jare aikuaa che aja pépɨri yave, arajata peve ñee ikavi vae Cristo iporerekua rupi.

³⁰ Pomoñera cherɨvɨ reta, yandeYa Jesucristo jare Espíritu Santo iporoaɨu rupi, chemborɨ vaerä peyerure cheré Tumpa pe,

³¹ jae chereepɨ vaerä ipɨapochɨ vae reta Judea pe ñogüɨnoi vae güi, jare Jerusalén pegua oporogüɨrovia vae reta omboresive vaerä oyerovia reve kuae arajata chupe reta vae re;

³² jökorai vi ayerovia reve aja vaerä pépɨri Tumpa jemimbota ko yave, jare aputuu vaerä pépɨri.

³³ Tumpa güɨnoi mbɨakatu vae toï opaete pe reta ndive. Amén.