Romanos 13 - Biblia Guarani Tumpa Iñee

¹ Opaete vae toiko mburuvicha reta jeia re. Echa Tumpa etei ko oñono mburuvicha reta; jare oime oï vae jae oñonogüe ko.

² Jáeramo, kia mbaetɨ oyapo mburuvicha jeigüe vae, oyovaicho ko Tumpa etei oñonogüe kotɨ. Jare kia oyovaicho mburuvicha kotɨ vae reta, oiporarata ko.

³ Echa mburuvicha reta mbaetɨ ko ñogüɨnoi omongɨɨye vaerä ikavi vae oyapo vae, ikavimbae vae oyapo vae reta peguarä ko. Jáeramo eyapo ikavi vae, agüɨye vaerä rekɨɨye mburuvicha reta güi. Jare jae reta ndererovia katuta;

⁴ echa mburuvicha reta oyeokuai ko ñogüɨnoi Tumpa pe ndemborɨ vaerä. Ërei reyapo ikavimbae vae yave, ekɨɨye. Echa Tumpa omee chupe reta mbaepuere oiporarauka vaerä. Jáeramo oyeokuai ñogüɨnoi Tumpa pe, oiporarauka vaerä ikavimbae oyapo vae reta pe.

⁵ Jáeramo, peiko tai mburuvicha reta jeia re, agüɨye peyapo oiporaraukata peve güiño, jaeño jupi ko pepɨa pe peyapo vaerä vae ramo.

⁶ Kuae jeko pegua ko pemboepɨ mburuvicha reta okovara vae. Echa jae reta oyeokuai ko ñogüɨnoi Tumpa pe; jókuae apo ñogüɨnoi vae reta.

⁷ Pemee opaete vae pe, pemeeta vae: Mburuvicha peguarä oyekovara vae pe, pemee; mbaemboepɨ oï vae, pemboepɨ; pemboeteta vae, pemboete.

⁸ Agüɨye pepía kia pe ave mbae re. Ërei peyoaɨu. Echa japicha oaɨu vae oyapo ko opaete mborookuai jae vae.

⁹ Echa mborookuai jei körai: “Agüɨye peyuvanga menda re. Agüɨye peporoyuka. Agüɨye pemonda. Agüɨye pemiari peapu reve perapicha kotɨ. Agüɨye pembaepotarai.” Jare oime vi ïru mborookuai reta. Ërei opaete kuae mborookuai reta körai oñemometei: “Peaɨu perapicha, pe peyeaɨu rami.”

¹⁰ Echa mboroaɨu güɨnoi vae, ngaraa oyapo ikavimbae japicha pe. Jayave, mboroaɨu rupi oyembopo mborookuai.

¹¹ Pemae mbae ara pe ma yaiko, jare peikuaa oväe ma ko ara ñaïndaivi vaerä, echa köiño yae ma oï yandemboasa ete vaerä, yaporogüɨrovia ramo yave vae güi,

¹² Pɨare katu yae ma, köe seri ma. Jáeramo agüɨye mo yayapo pɨtumimbi jembiapo. Yayemonde tembiporu tembipe pegua pe.

¹³ Yaiko kavi, tembipe pe yogüɨreko vae reta rami. Agüɨye yandearete avei jare yasavaɨpo. Agüɨye ñamomora soo jemimbota ani ñanekuña pota ani kuña imbɨa pota yae. Agüɨye yanderovaicho pota jare yandeakatúä ïru vae re.

¹⁴ Ërei peyemonde etei yandeYa Jesucristo pe. Agüɨye peñemee pesoo jemimbota pe.