Romanos 11 - Biblia Guarani Tumpa Iñee

Israel güi oyeparavogüe

¹ Añave taparandu: ¿Tumpa omombo ra tëta imbae vae? ¡Mbaetɨ ko! Echa che vi ko jae metei Israel pegua, Abraham iñemuña, Benjamín iñemuña pegua.

² Tumpa mbaetɨ ko omombo tëta imbae vae, iyɨpɨ güive oikuaa vae. Peikuaa ko ñeemombeúa Elías regua oyekuatía oï vae. Kërai Elías oyerure Tumpa pe omboeko vaerä Israel pegua reta jei reve:

³ “CheYa, oyuka reta neñeemombeúa reta, jare opa omboai reta mɨmba oyeyuka oyeapɨ jese vae ndembae. Cheño ete apɨta, jare oipota vi cheyuka reta.”

⁴ Ërei Tumpa jei chupe körai: “Oimeño siete mil kuimbae che aiparavo vae reta. Mbaetɨ oyetavatɨka tumpa-raanga Baal jóvai vae reta.”

⁵ Jökorai vi añave oime amogüe jembɨre, Tumpa oiparavo ipɨakavi rupi vae.

⁶ Tumpa ipɨakavi rupi oiparavo reta yave, jayave mbaetɨ ma ko jembiapo reta rupi. Echa oiparavo yave mona jembiapo reta rupi, Tumpa ipɨakavi mbɨakaviä ma ko.

⁷ ¿Kërai pa jayave? Echa Israel pegua reta mbaetɨ güɨnoi jókuae oeka reta tëi güɨnoi vaerä vae. Ërei Tumpa oiparavo vae reta oime güɨnoi. Jare ïru reta oyembopɨatätauka.

⁸ Tumpa Iñee pe jei rami: “Tumpa omee chupe reta agüɨye vaerä iyarakuaa reta. Jáeramo yepe tëi omongeta reta Tumpa Iñee, ërei mbaetɨ oikuaa reta, jare yepe tëi oendu reta Tumpa iñee, ërei mbaetɨ güɨrovia reta añave regua.”

⁹ Jaeramiño vi David jei körai: “Opaete iarete reta tembíu kavi pegua, toï chupe reta ñuai reta rami. Toï chupe reta ogüɨapi vaerä jare oiporara vaerä.

¹⁰ Topɨta reta jesambae rami, agüɨye vaerä oecha reta; toiporara ave reta, voɨta ipoɨ yae vae güɨraja rami.”

Judiombae vae reta iyemboasa

¹¹ Ërei taparandu: ¿Israel pegua reta opa ra oa jekuae avei pegua? ¡Mbaetɨ ko! Iyoa reta jeko pegua yemboasa ou judiombae vae reta pe, jökorai jae reta oñemoägüɨro vaerä.

¹² Israel pegua reta iyoa jare oa vae ikavi ɨvɨ pegua reta, judiombae vae reta pe. ¿Vɨtei pa oñemopüa ye yave? Ikavi yaeta ko.

¹³ Pe judiombae vae reta pe ko chemiari aï. Echa che ko jae Temimondo judiombae vae reta pe. Amboete yae ko kuae cheparavɨkɨ Cristo omee cheve vae;

¹⁴ aipota amoñemoägüɨro pekotɨ judío reta, jökorai oyemboasauka vaerä amogüe.

¹⁵ Echa Tumpa omombo vae rupi ɨvɨ pegua reta güɨnoi mbɨakatu Tumpa ndive. Vɨtei pa Tumpa omboresive reta ye yave, güeruta tekove omano vae reta pe.

¹⁶ Echa mbaagüɨyerɨpɨ reta oñeñono tee Tumpa pe yave, opaete trigokúi oyemombɨugüe oñeñono tee vi ko Tumpa peguarä. Ani metei temitɨ japo reta oñeñono tee Tumpa pe yave, opaete jäka reta oñeñono tee vi ko Tumpa peguarä.

¹⁷ Amogüe jäka oyeekɨ yave, jare nde olivo ñana rupigua reñeñonouka jendagüe re, jökorai reyeapo olivo ete jäkarä, jare reiko japo re jare iyaɨsɨ re.

¹⁸ Ërei agüɨye eyembotuicha yae judío reta güi, echa reyembotuicha yave, nemaendúa jäka reta reä ko oikove japo reta. Japo reta ko omee tekove jäka reta pe.

¹⁹ Güɨramoi pereta: “Tumpa oekɨ omombo judío reta olivo jäka reta oyeasɨa rami, cheñono vaerä jendagüe re.”

²⁰ Añete ko. Mbaetɨ oporogüɨrovia reta ramo ko, oyeekɨuka. Ërei nde reï joko pe, rerovia jeko, jáeramo agüɨye peyembotuicha. Peipoɨuño.

²¹ Echa Tumpa mbaetɨ iñɨ̈ro jemitɨ jäka ete pe. Vɨtei pa nde, ngaraa iñɨ̈ro ndeve.

²² ¡Mase! Tumpa ipɨakavi ko jare iyarasɨ vi. Oiporarauka jókuae Israel pegua oyavɨ vae reta pe. Ërei ipɨakavita ko ndeve reroviaä jese yave, ërei mbaetɨ yave, ndeasɨata vi ndemombo.

²³ Ërei judío reta, oporogüɨrovia yave, oï yeta jókuae jendagüe re, echa Tumpa imbaepuere yae ko, omboyoapɨ ye vaerä jendagüe re.

²⁴ Echa nde olivo ñana rupigua jäka, reñeñono temitɨ olivo ikavi vae re. ¿Vɨtei pa olivo ete jäkagüe reta ikavi potaä oyemboyoapɨ ye jese vaerä?

Israel pegua reta opüa pɨau yeta vae regua

²⁵ Cherɨvɨ reta, aipota peikuaa yaikuaambae vae regua, agüɨye vaerä peyemboete peyé. Jae ko kuae: Amogüe Israel pegua reta ipɨatäta vae, jaeño oikota judiombae vae reta opaete oporogüɨroviata vae oporogüɨrovia regua;

²⁶ kuae oyeapo güire, opaete Israel pegua reta omboasata, oyekuatía oï rami, echa jei: “Sión güi outa Oporoepɨ vae, jae ombosɨrɨta Jacob iñemuña reta güi imbaeyoa reta.

²⁷ Jae kuae cheporogüɨrökuavee päve jae reta ndive, amboai yave imbaeyoa reta.”

²⁸ Israel iñemuña reta oyovaicho ñee ikavi vae re, pepuere vaerä peporogüɨrovia. Ërei Tumpa oaɨu Israel pegua reta, iñemuñagüe reta oiparavo ramo.

²⁹ Echa Tumpa omee chupe reta vae, ngaraa opɨ̈ro ye. Jare oporoenɨi yave, mbaetɨ oipoepɨ.

³⁰ Pe reta tenonde yave, mbaetɨ peyapo Tumpa jei vae. Ërei añave peparareko, Israel pegua reta iñeereendúä ramo.

³¹ Jaeramiño vi añave Israel pegua reta mbaetɨ oyapo Tumpa jei vae, jökorai oñemee peve mboroparareko, jókuae rupi judío reta pe oñemee vaerä vi mboroparareko.

³² Echa Tumpa omaeño opaete vae ñeereendumbae rupi yogüɨreko vaerä. Jökorai oiparareko vaerä opaete vae.

³³ Tumpa yarakuaa tuichagüe yae ko, iyarakuaa katu yae ko. Yaupitɨ rapembae iyemongeta reta. Yaipapa rapeä ko jemimbota reta.

³⁴ Echa, “¿kia pa oupitɨ yandeYa iyemongeta? ¿Kia pa ipuereta omboarakuaa?

³⁵ ¿Kia pa tenonde mbae omee chupe, jae omboekovia ye vaerä chupe?”

³⁶ Echa opaete mbaembae ou yandeYa güi. Jae oyapo opaete mbaembae iyeupeguarä. YandeYa toyemboeteuka jekuae avei pegua. Amén.