Romanos 10 - Biblia Guarani Tumpa Iñee

¹ Cherɨvɨ reta, añetete chepɨa pe aipota yae jare ayerure Tumpa pe vae ko Israel pegua reta oyemboasauka vaerä.

² Echa chepuere chemiari jesegua reta, kërai jae reta ikɨ̈reɨ yae oyeokuai tëi Tumpa pe, ërei mbaetɨ añete vae oikuaa kavi reve.

³ Echa mbaetɨ oecha reta Tumpa iporombojupi, oeka reta kërai jae aeño oyembojupi vaerä. Mbaetɨ oyeko reta Tumpa iporombojupi re.

⁴ Echa Cristo re opa ma oyembopo Moisés iporookuai, opaete oporogüɨrovia vae reta oyembojupiuka vaerä.

⁵ Echa mborookuai rupi oyembojupi vae regua Moisés oikuatía körai: “Kia nunga oyapo kuae mbaembae vae, oikoveta.”

⁶ Ërei mborogüɨrovia rupi oyembojupiuka vae re Tumpa jei körai: “Agüɨye ndepɨa pe ere: ‘¿Kia ra oyeupita ara pe?’ (Kuae ko güeru vaerä ɨvɨ pe Cristo),

⁷ ani agüɨye vi ere: ‘¿Kia ra ogüeyɨta ɨvɨkua guasu pe?’ (Kuae ko güeru vaerä Cristo omanogüe reta ipɨte güi.)”

⁸ Ërei Tumpa ¿mbae pa jei?: “Cheñee köiño oï ndegüi. Ndeyuru pe jare ndepɨa pe.” Jae ko kuae ñee mborogüɨrovia pegua romoërakua ïru vae reta pe vae.

⁹ Nde rere yave Jesús, jae ko yandeYa, jare rerovia ndepɨa pe Tumpa omoingove ye omanogüe reta ipɨte güi yave, reyemboasaukata ko.

¹⁰ Echa yandepɨa ndive ko yaroviata, yayembojupiuka vaerä, ërei yandeyuru pe ko yae yayemboasauka vaerä.

¹¹ Echa Tumpa Iñee pe jei körai: “Opaete güɨrovia jese vae, ngaraa oñemomaraiuka.”

¹² Echa judío jare judiombae vae ndive Tumpa mbaetɨ ko omboyoavɨ. Echa yandeYa ko jae opaete vae iYa, jare jae omee jeta, oyerure chupe vae reta pe.

¹³ Echa opaete oyerure yandeYa jee re vae oyemboasaukata ko.

¹⁴ Ërei ¿këraita pa oyerure yandeYa pe, mbaetɨ yave güɨrovia jese?, jare ¿këraita pa güɨrovia, mbaetɨ yave oendu jesegua?, jare ¿këraita pa oendu, mbaetɨ yave kia omombeu chupe?

¹⁵ Jare ¿këraita pa kia omombeu chupe, mbaetɨ yave kia oyemondo? Echa oyekuatía oï körai: “Ipöra yae ko yogüeru oväe ñee mbɨakatu pegua omombeu vae reta. Ñee ikavi vae omoërakua vae reta.”

¹⁶ Echa mbaetɨ opaete oendu ñee ikavi vae, Isaías jei rami, echa jei: “CheYa, ¿kia ra güɨroviata romoërakuagüe re?”

¹⁷ Echa, yaendu vae rupi ko, yaporogüɨrovia. Jare yaendu vae ko, Tumpa iñee.

¹⁸ Ërei taparandu: ¿Oenduä etei ra? ¡Oendu reta tëi ko! Echa Tumpa Iñee pe oyekuatía oï körai: “Opaete rupi ojo iñee reta, opaete ɨvɨ iyapɨ rupi ojo oväe iñee reta.”

¹⁹ Taparandu ye: ¿Mbaetɨ ra oikuaa Israel pegua reta? Echa tenonde voi Moisés jei körai: “Pomoägüɨroukata tëta mbaetɨ chembae vae rupi.”

²⁰ Jare Isaías jei vi oipoɨumbae reve körai: “Mbaetɨ chereeka vae reta cheväe, ayekuaauka mbaetɨ oparandu cheré vae reta pe.”

²¹ Jare Isaías jei vi Israel pegua reta re körai: “Ara ñavo arökuavee tëi chepo tëta ipɨapochɨ jare iñeereendumbae vae pe.”