OSEAS 2 - Biblia Guarani Tumpa Iñee

¹ YandeYa jei: Jayave pereta perɨkeɨ ani perɨvɨ pe: “Ammi”, jare pereindɨ pe: “Ruhama”.

Tëta Israel jupimbae oiko vae re

² YandeYa jei: “¡Pemboeta pesɨ pe, echa mbaetɨ ma ko roiko kavi jae ndive! ¡Agüɨye mo tiyaguasa pota toiko! ¡Tombosɨrɨ mo iyeugüi iyaguasa reta!

³ Mbaetɨ yave oyapo, apɨ̈rota chugüi imbaembae jare amonandita; añonota jókuae ara ichɨ güi oa ramo yave rami, aipoepɨta ñuu ipombae pe, ɨvɨ otini vae pe, ayukaukata ɨuve pe.

⁴ Ngaraa aiparareko imembɨ reta, echa aguasa pegua michia reta ko.

⁵ Iyaguasa pota oyeapo ichɨ; mbaetɨ oyemboeteuka jei yave: ‘Taja taeka cheaguasa reta; tembíu jare ɨ, vecharaagüe jare lino, olivo iasaite jare kägüi omee cheve vae reta.’

⁶ Jáeramo ayopiata jape ñurati pe jare aroyereta kesemba jese, agüɨye vaerä oväe japerä.

⁷ Ojota iyaguasa reta jaɨkue, ërei ngaraa oupitɨ; oeka tëita, ërei ngaraa oväe chupe. Jayave jeita: ‘Taja ye tenondegua cheme pɨri, echa jókuae ndive ikavi aiko añave vae güi.’

⁸ Ërei jae mbaetɨ oikuaa che ko amee chupe trigo, vino jare olivo iasaite vae; che ko amoïru korepoti jare oro, pɨpe oyapo reta itumpa-raanga Baal vae.

⁹ Jáeramo apɨ̈rota chembae trigo jare vino mbaagüɨye iara pe, apɨ̈rota chembae vecharaagüe jare lino amee chupe reta jemimonderä vae.

¹⁰ Iyaguasa reta jovake amonandita ¡Ngaraa kia oepɨ chegüi!

¹¹ Amboapɨta iyerovia katu, iarete reta, yasɨ pɨau pegua arete reta, ara mbutuu pegua reta jare opaete apirai iara reta.

¹² Amboaita iuvarupa jare iɨvarupa, echa kuae re jei: ‘Cheparavɨkɨ jepɨ ko, cheaguasa reta omee cheve vae ko.’ Aipoepɨta ñana tëɨ vae pe, jare mɨmba ñana rupigua jouta.

¹³ Aiporaraukata chupe ara reta oasagüe re oapɨ ikäti kavi vae incienso baal reta pe vae re, oñemopöra yave moäka-vera pe jare mboɨ pe, ojo iyaguasa reta jupíe jare ñakañɨ chegüi. Jei yandeYa.

Tumpa oaɨu imbae vae reta Israel pegua

¹⁴ Ërei che amokɨ̈reɨta; arajata ñuu pe, jare añataita ipɨa.

¹⁵ Jare joko pe amee yeta chupe iuvarupa, jare aipoepɨta ɨvɨtɨ päu Acor, oasa vaerä mbɨatɨtɨ güi yerovia pe. Joko pe otairarita cheve taɨrusu yave rami, ɨvɨ Egipto güi anoe yave rami.

¹⁶ YandeYa jei: Jókuae ara rupi, chereenɨita ‘Ishi’, ngaraa ye ma pere cheve ‘Baali’.

¹⁷ Echa aekɨta peyuru güi baal reta jee, jare ngaraa ye ma oyeendu jókuae tee reta.

¹⁸ Jókuae ara ayapota peve morogüɨrökuavee päve mɨmba reta ñana rupigua ndive güɨra reta ndive, mboi reta ndive; aekɨta kuae ɨvɨ güi güɨrapa, kɨsepuku jare ñeraro, jare peiko pɨagüiveta.

¹⁹ Jare pogüɨrekota cheyeupe jekuae avei pegua; pogüɨrekota cheyeupe, jupi rupi, morojäa añete vae rupi, mbɨakavi rupi jare mboroparareko rupi.

²⁰ Pogüɨrekota cheyeupe jupi rupi, jare chekuaata che ko jae peYa vae.

²¹ Che peYa jae körai: Jókuae ara rupi, che ayeapɨsakata ara re, jare ara oyeapɨsakata ɨvɨ re;

²² jare ɨvɨ omeeta trigo, vino jare olivo iasaite, jare jae reta oyeapɨsakata Jezreel re.

²³ Añonota cheyeupe chembae reta jókuae ɨvɨ pe chembaeräño; anoita mboroparareko Lo-ruhama re; jaeta Lo-ammi pe: ‘Nde ko jae tëta chembae’, jare jae jeita: ‘¡CheTumpa ko nde!’ ”