NÚMEROS 13 - Biblia Guarani Tumpa Iñee

Doce temimondo oporopïaro vae reta

¹ YandeYa jei Moisés pe:

² “Emondo kuimbae reta omae vaerä ɨvɨ Canaán re, che amee Israel iñemuña reta pe vae; emondo ñemuña ñavo güi metei kuimbae, tenondeguarä ñogüɨnoi ipɨte pe vae reta.”

³ Jare Moisés omondo reta ñuu Parán güi, yandeYa jei chupe rami; jare opaete jókuae kuimbae reta Israel iñemuña reta juvicha ko,

⁴ jae kuae reta: Rubén iñemuña reta güi, Samúa, Zacur taɨ.

⁵ Simeón iñemuña reta güi, Safat, Horí taɨ.

⁶ Judá iñemuña reta güi, Caleb, Jefone taɨ.

⁷ Isacar iñemuña reta güi, Igal, José taɨ.

⁸ Efraín iñemuña reta güi, Oseas, Nun taɨ.

⁹ Benjamín iñemuña reta güi, Palti, Rafú taɨ.

¹⁰ Zabulón iñemuña reta güi, Gadiel, Sodi taɨ.

¹¹ José iñemuña reta güi: Gadi, Manasés iñemuña, Susi taɨ.

¹² Dan iñemuña reta güi, Amiel, Gemali taɨ.

¹³ Aser iñemuña reta güi, Setur, Micael taɨ.

¹⁴ Neftalí iñemuña reta güi, Nahbi, Vapsi taɨ.

¹⁵ Gad iñemuña reta güi, Geuel, Maqui taɨ.

¹⁶ Jae ko kuae kuimbae reta Moisés omondo omae vaerä ɨvɨ re vae jee reta; jare Moisés ombojee Oseas, Josué pe; jae ko Nun taɨ.

¹⁷ Moisés omondo omae reta vaerä ɨvɨ Canaán re, jei chupe reta: —Pekua kuae güi ɨvɨ Neguev rupi jare peyeupi ɨvɨtɨ reta rupi,

¹⁸ pemae kavi kërai etei ko ɨvɨ vae, jare joko pegua tëta re, imbaepuere yae reta ra, ani ipɨtu yae reta ra, jeta yae reta ra, ani mbovɨño ra vae.

¹⁹ Kërai ra jókuae ɨvɨ yogüɨreko reta pɨpe vae, ikavi ra ani ikaviä ra; jaeramiño vi kërai etei ra tëta yogüɨreko pɨpe vae, teyupaño ra ani tëta oñekëse kavi yae vae ra;

²⁰ jare kërai etei ra ɨvɨ vae, ikavi ra temitɨ peguarä ani mbaetɨ ra, oime ra ɨvɨra pɨpe ani mbaetɨ ra vae; peñemoäta ngatu jare peru mbaagüɨye jókuae ɨvɨ pegua. Echa uva yagüɨyerɨpɨ iara pe ko kuae.

²¹ Jare jae reta yogüɨraja omae jókuae ɨvɨ re, ñuu Zin güive Rehob kotɨ, Hamat pe yaiketaa pe.

²² Omboɨpɨ oike reta Neguev rupi, yogüɨraja oväe Hebrón pe; joko pe yogüɨreko Ahimán, Sesai jare Talmai, Anac iñemuña reta. Tëta Hebrón yepe oyeapo chiu año ndei oiko mbove tëta Zoán Egipto pegua.

²³ Yogüɨraja oväe ɨ̈aka raɨ Escol pe, joko pe oyasɨa reta metei uva iagüe, jare mókoi kuimbae oyóvai ɨvɨra re jese güeru vaerä; güeru reta vi granada jare ɨva iagüe.

²⁴ Jókuae ɨvɨtɨ päu ipe kavi vae ombojee reta Escol, Israel iñemuña reta oyasɨa uva iagüe joko güi güeru vae jeko pegua.

²⁵ Cuarenta araa pe oyerova reta ye ɨvɨ re opa yogüɨraja omae vae kotɨ güi.

²⁶ Yogüeru reta ye Moisés jare Aarón jare opaete Israel iñemuña reta yatɨ ñogüɨnoia pe, Cades pe, ñuu Parán pe, jare imiari reta chupe jare opaete yatɨ vae reta pe iguata re, jare oechauka chupe reta mbaagüɨye güerugüe.

²⁷ Imiari reta Moisés pe körai: —Rojo roväe jókuae ɨvɨ oremondo romae jesea pe; añetete yepe ɨvɨ ikavi yae; kuae ko jae joko pegua temitɨ iagüe.

²⁸ Ërei ngatu jókuae ɨvɨ pegua reta imbaepuere yae vae ko, tëta tuichagüe ko jare oñekëse kavi yae vae reta ko; jare roecha vi joko pe Anac iñemuña reta.

²⁹ Amalec iñemuña reta oime ñogüɨnoi Neguev pe, heteo reta, jebuseo reta jare amorreo reta ñogüɨnoi ɨvɨtɨ reta re, jare cananeo reta ñogüɨnoi ɨguasu jare ɨ̈aka Jordán ipäu pe.

³⁰ Jayave Caleb omokïrii opaete vae Moisés jóvai ñogüɨnoi vae, jare jei: —¡Yaja ɨmambae, jare ñapɨ̈ro; echa yandepuere ko ñamoamɨri reta!

³¹ Ërei ngatu jókuae kuimbae reta jae ndive yogüɨraja vae jei: —¡Ngaraa yandepuere ñaporepeña jókuae ɨvɨ pegua reta re! Echa imbaepuere yae reta ko yandegüi.

³² Jare jókuae ɨvɨ re yogüɨraja omae vae reta mbaetɨ imiari kavi Israel iñemuña reta pe, jókuae ɨvɨ oechagüe re, jei reta: —Jókuae ɨvɨ rojo romae jese vae ipo reta oyomondo yepembae ko; opaete joko pegua reta ipukugüe katuai ko.

³³ Jare roecha vi joko pe kuimbae ipukugüe, Anac iñemuña reta, kuimbae puku vae iñemuña reta; jare ore romae oreyé tuku rami jae reta jóvai, jare jökorai vi jae reta omae oreré.