NEHEMÍAS 4 - Biblia Guarani Tumpa Iñee

Tovaicho reta oporoyóyai yóyai

¹ Jare Sanbalat oikuaa romopüa ye ko roï tëta guasu ikësea yave, iyarasɨ yae jare iñee jasɨ katu orekotɨ,

² jei iñeïru reta pe jare sundaro reta Samaria pegua jóvai: “¿Mbae jei vae ra oyapo kuae judío paravete vete? ¿Güɨrovia ra, oñemaeñota omee reta ye vaerä mɨmba oyeyukagüe? ¿Güɨrovia ra opata oyapo reta metei ara pe? ¿Ikavita ra ita opa okaigüe pe oñemopüa ye vaerä tëta guasu ikësea?”

³ Jare iyɨpɨ pe oï Tobías, Amón iñemuña, jae jei: “Omopüa reta ñogüɨnoi tëta guasu ikësea vae aguara oyeupi jese yave opata ko oitɨ.”

Nehemías iyerure

⁴ Jayave che ayerure körai: “OreRu Tumpa, emae kërai oreyóyai yóyai reta. Toyevɨ iñee jasɨ katu vae jese reta yeño, toa reta jovaicho reta ipo pe, jare topa toyererajauka tembipɨɨrä ïru ɨvɨ kotɨ.

⁵ Agüɨye neɨ̈ro chupe reta ikavimbae oyapo reta vae re, agüɨye emboai iyoa reta nderóvai güi, echa iñee jasɨ katu reta omopüa ñogüɨnoi tëta guasu ikësea vae reta kotɨ.”

Tovaicho reta iporomomburu

⁶ Romopüa tëta guasu ikësea, ɨvategüe romopüa mbɨte rupi, echa opaete vae oñemoäta ngatu oparavɨkɨ vaerä.

⁷ Ërei ngatu oikuaa yave Sanbalat jare Tobías, jare Arabiaɨgua reta, jare Amón iñemuña reta jare Asdod pegua reta, kërai tëta Jerusalén ikësea oñemopüa ye ma, echa oasavigüe reta omboɨpɨ ma oyeokenda yave, iyarasɨ yae reta;

⁸ jare oyomboatɨ reta oyapo yemongeta metei rami, yogüeru vaerä oporepeña Jerusalén re, opa vaerä omboai.

⁹ Jayave royerure oreTumpa pe, jare jókuae tovaicho reta jeko pegua roñono omae vaerä oreve ara pe jare pɨ̈tu yave.

¹⁰ Jare Judá pegua reta jei: “Tëta guasu ikësea osururugüe jeta yae ramo, imbosɨrɨa reta ipɨtu ma, jare mbaetɨ orepuere romopüa tëta guasu ikësea.”

¹¹ Tovaicho reta jei: “Agüɨye toikuaa reta yaike regua ipɨte reta pe, yayuka jare yamombɨta mbaravɨkɨ reta.”

¹² Ërei judío reta, jókuae tovaicho reta ipɨte rupi yogüɨreko vae yogüeru omombeu oreve mbovɨ ye rupi, kërai oporepeña retata oreré ketɨ ketɨ güi vae,

¹³ jayave ayókuai metei ñavo vae ñogüɨnoi vaerä jo pegua reta ñavo ndive tëta guasu ikësea ɨ̈vɨia japɨpe rupi, oasavi vae ñavo rupi, güɨnoi reve ipo ñavo pe ikɨsepuku, mii jare juvɨ reve reve.

¹⁴ Jare aecha okɨɨye reta ramo, apüa jare jae imboetea vae reta pe, sundaro ruvicha reta pe jare opaete vae reta pe: “Agüɨye pekɨɨye chugüi reta, pemaendúa yandeYa re, tuicha jare kɨɨyea yae vae ko, jare peñeraro perëtara reta re, peraɨ reta re, perayɨ reta re, jare perembireko reta re jare pero reta re.”

¹⁵ Jare tovaicho reta oikuaa ore roikuaa ko chugüi reta, jare kërai Tumpa opa güɨrokomegua oyemongeta tëi oyapo reta vaerä oreve vae yave, opa oyerova yogüɨraja ye; jare opaete ore rojo ye tëta guasu ikësea kotɨ oreparavɨkɨa rupi.

¹⁶ Jókuae ara güive cherupiegua kuimbae reta mbɨte rupi oparavɨkɨ jare ïru mbɨte ñogüɨnoi mii ndive, yeopiaka ndive, juvɨ ndive, jare temimonde ñeraro pegua ndive. Jare jae reta ndive ñogüɨnoi Judá pegua mburuvicha reta omoäta ngatu reta vaerä.

¹⁷ Opaete tëta guasu ikësea imopüaa reta, ita jerokareaa reta jare ombaembosɨrɨ vae reta metei ipo pe oparavɨkɨ reta jare ïru ipo pe güɨnoi ikɨsepuku.

¹⁸ Opaete tëta guasu ikësea imopüaa reta, güɨnoi ikúa re ikɨsepuku oparavɨkɨ ramboeve, jare cheɨpɨ pe oï mimbɨguasu imoñeea,

¹⁹ echa amombarandu voi ma imboetea vae reta, sundaro ruvicha reta jare opaete vae reta, jae: “Jeta mbaravɨkɨ, jare tuicha, jare opa yayomboyao yao ñaï, matɨ matɨ ñaï oyougüi.

²⁰ Jáeramo, peendu oñemoñee jókuae mimbɨguasu yave peyemboatɨ ore ndive, jare ñaneTumpa oñerarota yanderekovia pe.”

²¹ Jökorai, ore orekaaru roparavɨkɨ ramboeve, oregüi mbɨte rupi güɨnoi mii ipo pe köe güive pɨ̈tu regua.

²² Jayave jae vi opaete vae reta pe: “Metei ñavo topɨta Jerusalén pe jembiokuai reta ndive, pɨ̈tu yave oporoäro vaerä, jare ara pe oparavɨkɨ reta vaerä.

²³ Jare che, cherëtara reta, taɨrusu vae reta, ani cherupiegua kuimbae oporoäro vae reta, mbaetɨ romboi oreremimonde, jaeño ete royau vaerä royemboi.”