MIQUEAS 7 - Biblia Guarani Tumpa Iñee

Teko kavi reta oikomegua Israel pe

¹ ¡Tataɨ re! Kuaraɨ guasu pe temitɨ iagüe oeka vae rami ko aï, uva iagüe re oyevɨka reta vae rami, ërei mbaetɨ etei kërai yepe aväe; ayúe tëi mbaagüɨyerɨpɨ.

² Mbaetɨ ma iporoparareko vae ɨvɨ pe; metei ave mbaetɨ jeko sɨmbi vae kuimbae reta ipɨte pe; metei ñavo oäro oporoyuka vaerä; metei ñavo oeka kërai omboeko vaerä japicha.

³ Oikatu yae oyapo reta vaerä ikavimbae; mburuvicha reta oekɨ mbae iyeupe ïru vae reta güi, jare oporojäa vae reta oporojäa jepɨ chupe ramoño; mbaepuere güɨnoi vae imiari ipɨa jeiaño, jare opaete vae reta omborɨ katu.

⁴ Ipɨte reta güi jeko kavi vae ñurati rami ko; jeko sɨmbi vae, temitɨ jäti vae rami ko. Ërei oväeta ara reiporara vaerä, sundaro reta ɨvate güi omae vae omoërakua reta vae; jayave ramo reyembokepeguata.

⁵ Agüɨye erovia ndevɨa-ïru, agüɨye erovia mburuvicha iñee ave; nderembireko güi eyeandu, agüɨye emoë neñee.

⁶ Echa kunumi omboeteä tu, kuñatai oñemopüa ichɨ kotɨ jare membɨtatɨ imesɨ kotɨ; metei o pegua reta oyovaicho oyokotɨ.

⁷ Ërei ngatu, che, yandeYa reño amaeta, Tumpa chereroasayepe vae reño ayekota; jókuae cheTumpa ko chereenduta.

YandeYa güeru tembipe jare yereroasayepe vae

⁸ Nde, cherovaicho agüɨye epuka emae cheré, echa yepe tëi agüɨapi, ërei apüa yeta ko; yepe tëi aiko pɨtumimbi rupi; ërei yandeYa oikota tembipe cheveguarä.

⁹ Aropɨata yandeYa iyarasɨ; echa cheyoa ikotɨ, ojäa regua chereko jare chembojupi regua. Jae cherenoeta tembipe pe jare aechata iporombojupi.

¹⁰ Kuae oechata cherovaicho reta jare imarata opɨta reta; jeise reta cheve: “¿Ketɨ pa oime oï ndeYa Tumpa?” Ërei añave aecha retata opa oñepɨ̈ro jese tuyuapo re tape rupi rami.

¹¹ Jerusalén, oväeta ara oñemopüa pɨau ye vaerä nekësea reta jókuae ara rupi ɨvɨ oñejäagüe oyembopɨguasuta.

¹² Jókuae ara rupi yogüeruta ndekotɨ opaete ketɨ ketɨ güi: Asiria güive Egipto kotɨ güi, ɨ̈aka Nilo güive ɨ̈aka Éufrates kotɨ güi, metei ɨguasu güive ïru ɨguasu kotɨ güi, metei ɨvɨtɨ guasu güive ïru ɨvɨtɨ guasu kotɨ güi.

¹³ Ɨvɨ opɨtata ñuurä, pɨpegua reta jeko pegua; teko pɨ̈chɨi oyapo reta jeko pegua.

YandeYa iporoparareko Israel re

¹⁴ ¡Eyangareko ndembae vae reta re ndepopoka pe; ndevecha reta yogüɨreko ndeɨvɨ pe vae re, ñana rupiño, ɨvɨ kavía rupi yogüɨreko vae re! Eeka kapii Basán pe jare Galaad pe; ïru ara oasagüe rupi reyapo rami.

¹⁵ Eechauka chupe reta mɨakañɨ; Egipto güi renoe reta ramo yave rami.

¹⁶ ¡Toecha ïru tëtaguasu reta, jare timara reta imbaepuere yae tëi reve! ¡Topɨta reta iñeembae jare iyapɨsambae rami!

¹⁷ ¡Ɨvɨ toere reta mboi rami, ipɨtía re oguata vae reta rami! ¡Torɨrɨi toñogüɨnoe jare tokɨɨye reve toyogüeru ndekotɨ, cheYa Tumpa!

¹⁸ Mbaetɨ ïru Tumpa nde rami; echa nde neɨ̈ro ikavimbae iyapoa pe jare neakañɨ ndembae vae reta jembɨregüe iyoa güi, mbaetɨ ndearasɨ avei; echa ndeporoparareko nekɨ̈reɨ ngatu reve.

¹⁹ Enoi ye mboroparareko orekotɨ; eñotɨ orereko jupimbae reta jare emombo ɨguasu pe opaete oreyoa reta.

²⁰ ¡CheYa, embopo neñee, arakae güive rerökuavee nderee re mboroparareko oreñemuñagüe Abraham jare Jacob pe vae!