MIQUEAS 5 - Biblia Guarani Tumpa Iñee

Oporoepɨ vae oporookuaita Belén güi

¹ “Añave peñekëse ovapetea guasu pe, Jerusalén pegua reta, echa opa peñeovauka; Israel iñemuña reta juvicha guasu pe oiporarauka yae retata.

² Ërei nde Belén Efrata, nemichi yae reï vaerä opaete Judá pegua ñemuña reta ipɨte pe, ndegüi oëta cheve Israel iYarä vae, jae oiko vae ko iyɨpɨ güive voi, ara reta ndei oyemboɨpɨ güive.”

³ Ërei oeyañota räri imbae vae reta, jókuae imembɨ oata oï vae oa regua; jayave ïru jëtara reta yogüeru yeta oyea Israel iñemuña reta ndive.

⁴ Jae oïta jare oyangarekota yandeYa imbaepuere rupi, yandeYa Tumpa jee tuicha yae vae rupi; jare yogüɨreko kavita, echa yandeYa oyembotuichaukata opaetei ɨvɨ iyapɨ rupi.

⁵ Jae oikota yandemombutuu vaerä, Asiriaɨgua reta yogüeru yave yandeɨvɨ pe, jare opɨ̈ro reta yave yanderuvicha guasu jo, jayave yamboyovaichota ikotɨ reta, chiu omaangareko vae reta, jare juri kuimbae tuichagüe tëta ruvicha.

⁶ Kuae reta omboaita ɨvɨ Asiria pegua reta kɨsepuku pe, Nimrod iɨvɨ; jare yandereepɨta Asiriaɨgua reta güi, yogüeru opɨ̈ro yandeɨvɨ yandegüi yave.

⁷ Jacob iñemuña güi jembɨregüe reta yogüɨrekota ïru tëta guasu reta rupi; yandeYa ombou ɨsápɨi rami; ñana re ama oa rami, kuae reta mbaetɨ oäro kuimbae reta jemimbota.

⁸ Körai eteita ko Jacob iñemuña reta jembɨregüe, ïru tëtaguasu reta rupi; yaguapope, mɨmba ñanaɨgua reta ipɨte rupi rami, yaguapope raɨ vecha reta ipɨte rupi rami; kuae oasa yave mɨmba reta ipɨte rupi, mbaetɨ ipuere ojoyepe chugüi vae.

⁹ Köraita pe pepüa perovaicho reta kotɨ; jare pemboaita opaete perovaicho reta.

¹⁰ YandeYa jei: “Jókuae rupi ayukata pegüi pekavayu reta, jare arokomeguata pekäretou reta;

¹¹ opata vi amboai peɨvɨ pegua tëta guasu reta jare opaete peɨvɨ ikësea reta amboaita;

¹² jökoraiño vi opata amboai pegüi imbaekuaa vae reta jare ngaraa ma oime pepɨte rupi mbaekuaa rupi mbae oecha vae reta;

¹³ opata amboai pegüi pepoki rupi mbae peyapo vae reta, mbae iä reta opata amboai pepɨte güi, ngaraa ye ma pemboete pepo pe peyapogüe reta.

¹⁴ Amboaita Asera iä reta pepɨte güi, jare opata vi amboai perëta guasu reta.

¹⁵ Chearasɨ yae rupi, ayepɨta tëtaguasu reta mbaetɨ chererovia vae re.”