San Mateo 4 - Biblia Guarani Tumpa Iñee

Aña guasu omomiari Jesús oyavɨuka vaerä tëi chupe

¹ Jayave Espíritu Santo güɨraja Jesús ñuu pe. Jare joko pe aña guasu omomiari oyavɨuka vaerä tëi chupe.

² Jare Jesús cuarenta ara rupi ma oyekuaku tembíu güi yave iyɨmbɨaɨ.

³ Jayave aña guasu omomiari oyavɨuka vaerä chupe, jei: —Nde ko Tumpa Taɨ yave, ere kuae ita reta pe toyepoepɨ mbɨyaperä.

⁴ Ërei Jesús jei chupe: —Tumpa Iñee pe oyekuatía oï körai: “Mbɨyape reñoä ko kuimbae oikoveta, jaeño opaete Tumpa Iñee re.”

⁵ Jayave aña guasu güɨraja Jesús tëta guasu Jerusalén pe jare omboyeupi tupao iyapɨte re.

⁶ Jei chupe: —Nde ko Tumpa Taɨ yave, ea kuae güi. Echa Tumpa iñee pe oyekuatía oï körai: “Tumpa oyokuaita iaraɨgua reta oyangareko vaerä nderé. Jare ipo pe ndeoko retata, agüɨye vaerä nepɨ̈sa-yeyuka ita re.”

⁷ Jayave Jesús jei chupe: —Tumpa Iñee pe oyekuatía vi oï körai: “Agüɨye ejäa ndeYa Tumpa ipɨaguasu.”

⁸ Jayave aña guasu jekuae güɨraja ye Jesús metei ɨvɨtɨ guasu ɨvate yae vae re, jare oechauka chupe opaete ɨvɨ pegua mborookuaía reta, iyemboetea reve reve.

⁹ Jare aña guasu jei chupe: —Tamee ndeve opaete kuae, reyetavatɨka chemboete yave.

¹⁰ Jayave Jesús jei chupe: —Esɨrɨ chegüi, Satanás. Echa Tumpa Iñee pe oyekuatía oï körai: “NdeYa Tumpa emboete, chupeño eyeokuai.”

¹¹ Jayave aña guasu osɨrɨ Jesús güi, jare jupivei araɨgua reta yogüeru oyeokuai chupe.

Jesús omboɨpɨ iparavɨkɨ

¹² Jesús oikuaa yave Juan oime oñoña reta tembipɨɨrɨru pe, ojo ye Galilea pe.

¹³ Mbaetɨ ma oiko Nazaret pe, ojo tëta guasu Capernaum pe jare joko pe oiko. Capernaum ko oï ɨguasu jembeɨ pe Zabulón jare Neftalí iɨvɨ pe.

¹⁴ Oyembopo vaerä ñeemombeúa Isaías jei yave:

¹⁵ “Zabulón iɨvɨ jare Neftalí iɨvɨ, ɨguasu jembeɨ pe, Jordán jovaicho pe, Galilea judiombae vae reta jëta.

¹⁶ Pɨtumimbi pe yogüɨrekose vae reta oecha ma tembipe tuicha yae vae. Mano ipo pe yogüɨrekose vae reta re tembipe oesape.”

¹⁷ Jayave güive Jesús omboɨpɨ omombeu Tumpa iñee, jei: “Peeya peyemongeta ikavimbae vae pepɨa pe penoi vae. Echa ou ma oväe araɨgua mborookuaía.”

Jesús oenɨi irundɨ yeporaka regua

¹⁸ Jesús oguata ramboeve ɨguasu Galilea pegua jembeɨ rupi, oecha Simón, Pedro jee vae, jare tɨvɨ Andrés. Jae reta pɨsa pe oyeporaka ñogüɨnoi ɨguasu pe. Echa jae reta ko yeporaka regua reta.

¹⁹ Jare Jesús jei chupe reta: —Peyu cherupíe, jare che poapota peyeporaka vaerä ïru vae reta re.

²⁰ Jayave jae reta oeya voi ipɨsa reta, jare yogüɨraja jupíe.

²¹ Jesús oasa joko güi, jare oecha mókoi Zebedeo taɨ reta: Jacobo jare tɨvɨ Juan. Kuae reta oyapo katu ñogüɨnoi pɨsa reta barco raɨ pe tu ndive. Jayave Jesús oenɨi reta.

²² Jayave jae reta oeya voi barco raɨ jare tu, jare yogüɨraja jupíe.

Jesús omboe jeta vae

²³ Jare Jesús ojo opaete Galilea rupi, oporomboe reve judío reta itupao ñavo rupi. Omombeu ñee ikavi vae araɨgua mborookuaía regua, jare ombogüera imbaerasɨ vae reta oipotagüe mbaerasɨ güi.

²⁴ Jare opaete ɨvɨ Siria pegua reta pe jërakua Jesús oyapo vae regua. Jare güeru reta chupe oipotagüe mbae jasɨ chupe vae reta, oiporara oipotagüe mbaerasɨ vae, jare aña oya jese vae reta, omano mano vae reta jare jete jëogüe vae. Jare Jesús ombogüera reta.

²⁵ Yogüɨraja Jesús jaɨkue jeta vae Galilea güi, ɨvɨ Decápolis güi, tëta Jerusalén güi, ɨvɨ Judea güi jare ɨ̈aka Jordán jovaicho güi.