San Mateo 28 - Biblia Guarani Tumpa Iñee

Jesús oikove ye

¹ Ara mbutuu oasa ma yave, ndeimboveasɨ tenondegua ara semana iyɨpɨ pe, María Magdalaɨgua jare ïru María yogüɨraja tɨvɨa kotɨ.

² Jare ɨvɨ täta okana, echa metei yandeYa iaraɨgua ogüeyɨ ara güi jare ombosɨrɨ ita tuicha vae tɨvɨa jöke güi, jare oguapɨ oï jese.

³ Jare jova oyekuaa ama-vera rami. Jare jemimonde tïiasɨ iroɨ tïiasɨ vae rami.

⁴ Jare tɨvɨa re oyangareko ñogüɨnoi vae reta orɨrɨi okɨɨye güi, jare omano rami opɨta reta.

⁵ Ërei araɨgua jei kuña reta pe: —Agüɨye pekɨɨye. Echa aikuaa peeka ko Jesús kurusu re oyekutuuka vae.

⁶ Mbaetɨ ma kuae pe oï. Oikove ye ma ko jae jei rami. Peyu pemae yandeYa jendagüe re.

⁷ Jare pekua voi pere jemimboe reta pe jae oikove ye ma omanogüe reta ipɨte güi vae. Jare ojota perenonde Galilea pe. Joko pe peechata. Kuae ko ayu amombeu peve.

⁸ Jayave kuña reta oë tɨvɨa güi, okɨɨye reta jare oyerovia yae reta reve. Jare osɨi yogüɨraja omombeu vaerä Jesús jemimboe reta pe. Ërei yogüɨraja ramboeve omombeu vaerä.

⁹ Jesús oövaiti jare jei chupe reta: —Kërai pa peï. Jayave kuña reta oyetavatɨka ɨvɨ pe oiküava itɨma rupi jare omboete.

¹⁰ Jayave Jesús jei chupe reta: —Agüɨye pekɨɨye. Pekua pemombeu cherɨvɨ reta pe yogüɨraja vaerä Galilea pe. Joko pe chereecha retata.

Sundaro reta omombeu vae

¹¹ Jare kuña reta yogüɨraja ye ramboeve tɨvɨa güi, amogüe sundaro tɨvɨa re oyangareko vae reta yogüɨraja vi tëta guasu pe, omombeu sacerdote reta itenondegua reta pe, opaete mbae oasagüe.

¹² Jayave sacerdote reta itenondegua reta oyomboatɨ tëta pegua reta itenondegua reta ndive. Jare opa güire oyemongeta reta, omee jeta korepoti sundaro reta pe.

¹³ Jare jei chupe reta: —Körai pere: Jesús jemimboe reta yogüɨraja pɨ̈tu yave, oñomi oregüi Jesús jetegüe, ore roke roï ramboeve.

¹⁴ Jare mburuvicha kuae oikuaa yave, ore romombeuta chupe pe reta mbaetɨ ko teko penoi vae.

¹⁵ Jayave sundaro reta oipɨɨ korepoti jare oyapo reta mburuvicha reta jei chupe reta vae. Jare jókuae jërakua opaete judío reta rupi añave regua.

Jesús oyókuai jemimboe reta

¹⁶ Jare jókuae once Jesús jemimboe reta yogüɨraja Galilea pe, ɨvɨtɨ Jesús omombeu chupe retaa pe.

¹⁷ Jare jemimboe reta oecha yave Jesús, omboete. Ërei amogüe vae mbaetɨ güɨrovia jae ko Jesús vae.

¹⁸ Jare Jesús oya katu jese reta jare jei chupe reta: —Opaete mbaepuere oñemee ma cheve ara pe jare ɨvɨ pe.

¹⁹ Jáeramo pekua pemboe opaete tëtaguasu pegua reta cheremimboerä, jare pembobautisa cheRu jee re, cheree re jare Espíritu Santo jee re.

²⁰ Pemboe reta opaete che poyókuai vae re. Jare che aïta pe ndive opaete ara kuae ɨvɨ iyapɨ regua. ¡Amén!