San Mateo 18 - Biblia Guarani Tumpa Iñee

¿Kia pa jae tenondegua?

¹ Jókuae ara rupi Jesús jemimboe reta oparandu chupe: —¿Kia pa ko jae tenondegua araɨgua mborookuaía pe?

² Jayave Jesús oenɨi metei michia, jare oñono chupe reta mbɨte pe.

³ Jare jei: —Añete che jae peve, mbaetɨ yave peyeapo jare peiko michia reta rami, ngaraa peike araɨgua mborookuaía pe.

⁴ Ërei oime yave kia oñemomichi kuae michia rami vae, jae tuichagüe yaeta araɨgua mborookuaía pe.

⁵ Jare kia omboresive yave kuae nunga michia cheree re vae, che ko chemboresive.

Oyavɨuka ïru pe vae

⁶ “Kia nunga vae mbaemboavai oñono michia güɨrovia cheré vae pe vae, ikavi ko oñeapɨti iyayu re metei ita tuicha vae mburika pegua oyembaeso pɨpe vae, javoi oyemombo ɨguasu tɨpɨa pe.

⁷ ¡Paravete ɨvɨ pegua reta! Oñono mbaemboavai ïru vae pe vae. Echa jökorai ñotai ko. ¡Paravete jókuae oñono mbaemboavai ïru vae reta pe vae!

⁸ Jáeramo ndepo jare ndepɨ jovaicho oyapouka yave mbaeyoa ndeve, eyasɨa emombo ndeyeugüi. Echa jaekaviño ko renoi vaerä tekove ndepo jovaichombae reve ani ndepɨ jovaichombae reve, tata guasu opambae vae pe mókoi ndepo reve ani mókoi ndepɨ reve reo vaerägüe güi.

⁹ Jaeramiño vi nderesa oyapouka yave mbaeyoa ndeve, eekɨ emombo ndeyeugüi. Echa jaekaviño ko renoi vaerä tekove nderesa jovaichombae reve tata guasu opambae vae pe mókoi nderesa reve reo vaerägüe güi.

Vecha okañɨ vae regua

¹⁰ Agüɨye peröɨro kërai ave yepe oporogüɨrovia ramo vae. Echa che jae peve, araɨgua oyangareko kuae nunga reta re vae, ñogüɨnoi avei ko cheRu ara pe oï vae jóvai.

¹¹ Echa che Kuimbaerä ayeapo vae ayu amboasa vaerä okañɨ Tumpa güi vae reta.

¹² Mase, metei kuimbae güɨnoi cien vecha, ërei metei vecha okañɨ yave, ¿ngaraa pa kuimbae oeya jókuae noventa y nueve ivecha reta, jare ojo ɨvɨtɨ guasu rupi oeka jókuae ivecha okañɨgüe vae?

¹³ Jare oväe chupe yave, añete, oyerovia tai ko jókuae vecha re, noventa y nueve vecha mbaetɨ okañɨ ñogüɨnoi vae güi.

¹⁴ Jökorai ko peRu ara pe oï vae, mbaetɨ oipota kuae oporogüɨrovia ramo vae reta güi, okañɨ metei ave yepe.

Kërai neɨ̈ro vaerä nerëtara pe

¹⁵ Nerëtara iyoa yave ndekotɨ, ekua emboeta chupe kia oikuaambae reve pe aeño pe. Jare jae oyeapɨsaka nderé yave, reï kavita jae ndive.

¹⁶ Ërei mbaetɨ oipota oyeapɨsaka nderé yave, eraja nderupíe metei ani mókoi neïrurä, oikuaa vaerä mókoi ani mboapɨ vae jóvai mbae pere vae.

¹⁷ Jare mbaetɨ oipota yave oyeapɨsaka jese reta ave, emombeu Tumpa jembiparavo reta pe. Ërei nerëtara mbaetɨ oipota oyeapɨsaka jókuae reta re ave yave, emae jese metei judiombae rami ani mburuvicha peguarä okovara vae rami.

¹⁸ Añete che jae peve, peñapɨti yave kia ɨvɨ pe, ara pe oñeapɨtita vi, Jaeramiño vi oime yave kia ɨvɨ pe peyora vae, ara pe oyeyorata vi.

¹⁹ Jare che jae ye peve, mókoi pegüi reta omometei yave iyemongeta kuae ɨvɨ pe oiporu vaerä oipotagüe mbae cheRu ara pe oï vae pe, jae omeeta ko chupe reta oyerure chupe jese vae.

²⁰ Echa mókoi ani mboapɨ vae oyemboatɨ yave cheree re, che oime ko aï jae reta ipɨte pe.”

²¹ Jayave Pedro ou jei Jesús pe: —CheYa, cherëtara iyoa yave chekotɨ, ¿mbovɨ ye pa cheɨ̈rota chupe? ¿Chiu ye pa?

²² Jayave Jesús jei Pedro pe: —Che jae ndeve, neɨ̈ro aveita chupe, mbaetɨ chiuño.

Mókoi kuimbae ipía vae reta

²³ “Echa araɨgua mborookuaía, metei mburuvicha guasu jembiokuai reta pe, ipía re oipota okovara vae rami ko.

²⁴ Omboɨpɨ okovara chupe reta yave, ou oyemboɨ jóvai metei jembiokuai jeta yae korepoti re ipía chupe vae.

²⁵ Jókuae jembiokuai mbaetɨ ipuere omboepɨ ramo, mburuvicha guasu oyókuai oñemee vaerä korepoti re jembiokuai jare jembireko jare imichia reta, jare opaete imbaembae, jökorai ipuere vaerä omboepɨ ipía chupe.

²⁶ Jayave jókuae jembiokuai oyetavatɨka mburuvicha guasu jóvai, jare jei chupe: ‘Cheya, ndepɨaguasu cheve, amboepɨta ko ndeve opaete.’

²⁷ Jayave mburuvicha guasu oiparareko omae jókuae jembiokuai re, oyora jare iñɨ̈ro chupe ipía re.

²⁸ Ërei jókuae tembiokuai oë güire, oväe iñeïru tembiokuai mbovɨño korepoti re ipía chupe vae. Jayave jae oyaseopɨɨ jare jei chupe: ‘¡Emboepɨ cheve ndepía!’

²⁹ Jayave jókuae iñeïru tembiokuai oyetavatɨka jae jóvai, jare omoñera reve jei chupe: ‘¡Ndepɨaguasuño cheve, jare amboepɨta ko ndeve opaete!’

³⁰ Ërei jae mbaetɨ ipɨaguasu chupe. Oñoñauka tembipɨɨrɨru pe opa regua omboepɨ ipía.

³¹ Jare kuae oasa vae, ïru tembiokuai reta ombopɨatɨtɨ yae, jare yogüɨraja omombeu mburuvicha guasu pe opaete oasa vae regua.

³² Jayave mburuvicha guasu oenɨi jókuae jembiokuai, jare jei chupe: ‘Tembiokuai ikavimbae vae.’ Che cheɨ̈ro ndeve opaete ndepía, nde chemoñera jese ramo.

³³ ¿Maera pa nde reipararekoä jókuae neïru tembiokuai, che roparareko rami?

³⁴ Jayave juvicha guasu pochɨ chupe, jare oyókuai tembipɨɨrɨru iyangarekoa reta oiporarauka vaerä chupe opaete ipía omboepɨ regua.”

³⁵ Jökoraita vi cheRu ara pe oï vae oyapo pe ndive, mbaetɨ peɨ̈ro yave opaete pepɨa reve perëtara ombaeyavɨ pekotɨ vae pe.